ಅಂದರೆ ಮಿದುಳು ಅಥವಾ ಬುದ್ಧಿಗೆ ಸಂಬಂಧಪಟ್ಟ ಎಲ್ಲಾ ವಿಷಯಗಳಲ್ಲಿಯೂ ಇದು ಅನುಕೂಲಕರ ಎಂದರ್ಥ. ಅದರಲ್ಲಿಯೂ ವಿಶೇಷವಾಗಿ, ಬೆಳೆಯುತ್ತಿರುವ ಮಕ್ಕಳಿಗೆ ಇದನ್ನು ಕೊಡುವುದರಿಂದ ಅವರ ಮಿದುಳು, ಮನಸ್ಸು, ಬುದ್ಧಿಯಲ್ಲಿ ಧನಾತ್ಮಕ ವಿಷಯಗಳಾದ ನೆನಪಿನ ಶಕ್ತಿ, ಧೈರ್ಯ, ಸಾತ್ವಿಕ ಗುಣ ಹೆಚ್ಚಾಗಿ ಋಣಾತ್ಮಕ ಅಂಶಗಳಾದ ಮರೆವು, ಭಯ, ಮಾನಸಿಕ ನಿಶ್ಶಕ್ತಿ ಕಡಿಮೆಯಾಗಲು ಸಹಾಯವಾಗುತ್ತದೆ. ಮಕ್ಕಳ ಬುದ್ಧಿ ಶಕ್ತಿ ಹೆಚ್ಚಾಗಬೇಕು ಎಂದಿರುವವರು ಇದರ ಜೊತೆಗೆ ಆಹಾರದಲ್ಲಿ ತುಪ್ಪ, ಕೊಬ್ಬರಿ ಎಣ್ಣೆ, ಬಾದಾಮಿ, ಬೂದುಗುಂಬಳ, ಪಿಸ್ತಾ, ಎಳ್ಳು, ಶೇಂಗಾ, ವಾಲ್ನಟ್, ಅಗಸೆ ಬೀಜ, ಮೊಳಕೆ ಕಾಳು, ಎಲ್ಲ ರೀತಿಯ ಹಣ್ಣುಗಳನ್ನು ಕೊಡಬೇಕು. ಬಿಸ್ಕೆಟ್, ಚಾಕೊಲೇಟ್, ಚಿಪ್ಸ್, ಬೇಕರಿ ತಿನಿಸುಗಳು, ಹೊರಗಡೆ ಸಿಗುವ ಕರಿದ ಪದಾರ್ಥಗಳನ್ನು ಕೊಡುವುದನ್ನು ನಿಲ್ಲಿಸಬೇಕು. ಸಕ್ಕರೆಯ ಬಳಕೆಯನ್ನು ಸಾಧ್ಯವಾದಷ್ಟು ಕಡಿಮೆ ಮಾಡಿ ಬದಲಿಗೆ ಜೋನಿಬೆಲ್ಲ ಅಥವಾ ಶುದ್ಧವಾದ ಜೇನುತುಪ್ಪವನ್ನು ಬಳಸಿದರೆ ಒಂದೆಲಗದ ಪೂರ್ಣ ಪ್ರಯೋಜನ ಸಿಗಲು ಸಾಧ್ಯವಾಗುತ್ತದೆ.
