ಮ್ಯೂಚುವಲ್​ ಫಂಡ್​ ಹೂಡಿಕೆ: ದಾಖಲೆಯ ರೂ. 58.6 ಲಕ್ಷ ಕೋಟಿಗೆ ಏರಿಕೆ

ಮುಂಬೈ: ಮ್ಯೂಚುವಲ್ ಫಂಡ್ ಆಸ್ತಿಗಳು ಮೇ ತಿಂಗಳಲ್ಲಿ 58.6 ಟ್ರಿಲಿಯನ್ (58.6 ಲಕ್ಷ ಕೋಟಿ) ರೂಪಾಯಿಗಳಿಗೆ ಏರಿಕೆ ಕಂಡಿವೆ. ಇದು ಒಂದು ವರ್ಷದೊಳಗೆ ಅಂದಾಜು 10 ಟ್ರಿಲಿಯನ್ (10 ಲಕ್ಷ ಕೋಟಿ) ರೂಪಾಯಿಗಳ ದಾಖಲೆಯ ಹೆಚ್ಚಳವಾಗಿದೆ.

ಸೋಮವಾರ ಬಿಡುಗಡೆಯಾದ ಅಂಕಿಅಂಶಗಳ ಪ್ರಕಾರ ದೇಶದ ಮ್ಯೂಚುವಲ್ ಫಂಡ್ ಉದ್ಯಮದ ಇತಿಹಾಸದಲ್ಲಿ ಇದು ಅತ್ಯಂತ ವೇಗದ ಬೆಳವಣಿಗೆ ಸೂಚಿಸುತ್ತದೆ.

1964ರಲ್ಲಿ ಪ್ರಾರಂಭವಾದ ಮ್ಯೂಚುವಲ್ ಫಂಡ್ ಉದ್ಯಮವು ತನ್ನ ಮೊದಲ 10 ಲಕ್ಷ ಕೋಟಿ ರೂಪಾಯಿ ಆಸ್ತಿಯನ್ನು ಸಂಗ್ರಹಿಸಲು 5 ದಶಕಗಳನ್ನು ತೆಗೆದುಕೊಂಡಿತು. ಆದರೆ, ಈಗ ಕಳೆದ 6 ತಿಂಗಳೊಳಗೆ 9 ಲಕ್ಷ ಕೋಟಿ ರೂಪಾಯಿ ಸಂಗ್ರಹಗೊಂಡಿದೆ.

ಹಿಂದಿನ ತಿಂಗಳಿಗೆ ಹೋಲಿಸಿದರೆ ಈಕ್ವಿಟಿ ಮ್ಯೂಚುವಲ್ ಫಂಡ್‌ಗಳಿಗೆ ಒಳಹರಿವು ಮೇ ತಿಂಗಳಲ್ಲಿ 83% ರಷ್ಟು ಏರಿಕೆಯಾಗಿದ್ದು, 34,967 ಕೋಟಿ ರೂಪಾಯಿಗಳಿಗೆ ತಲುಪಿದೆ.

ಅಸೋಸಿಯೇಷನ್ ​​ಆಫ್ ಮ್ಯೂಚುಯಲ್ ಫಂಡ್ಸ್ ಇನ್ ಇಂಡಿಯಾ (AMFI) ಮಾಹಿತಿ ಪ್ರಕಾರ, ಹೂಡಿಕೆದಾರರು ಸಣ್ಣ ಮತ್ತು ಮಧ್ಯಮ ಕ್ಯಾಪ್ ಫಂಡ್‌ಗಳಿಗೆ ಒಲವು ತೋರಿದ್ದಾರೆ.

ನಿಫ್ಟಿ 50 ಸೂಚ್ಯಂಕವು ಕಳೆದ 39 ತಿಂಗಳುಗಳಲ್ಲಿ ಅಂದಾಜು 55% ರಷ್ಟು ಏರಿಕೆಯಾಗಿದ್ದು, ಈ ಮ್ಯೂಚುಯಲ್ ಫಂಡ್ ಒಳಹರಿವುಗಳಿಂದ ಬೆಂಬಲಿತವಾಗಿದೆ. ಹೆಚ್ಚಿನ ಮೌಲ್ಯಮಾಪನಗಳ ಬಗ್ಗೆ ಕೆಲವು ಆತಂಕಗಳ ಹೊರತಾಗಿಯೂ, ಸ್ಮಾಲ್-ಕ್ಯಾಪ್ ಫಂಡ್‌ಗಳ ಒಳಹರಿವು ಮೇ ತಿಂಗಳಲ್ಲಿ 23.4% ರಷ್ಟು ಹೆಚ್ಚಾಗಿ, 2,725 ಕೋಟಿ ರೂಪಾಯಿಗಳಿಗೆ ಏರಿದೆ.

ಕಳೆದ ಮೇ ತಿಂಗಳಲ್ಲಿ ನಿಫ್ಟಿ 50 ಸೂಚ್ಯಂಕವು 0.33% ರಷ್ಟು ಕುಸಿದಿದೆ. ಸ್ಮಾಲ್-ಕ್ಯಾಪ್ ಸೂಚ್ಯಂಕವು 1.85% ರಷ್ಟು ಇಳಿಕೆಯಾಗಿದೆ. ಆದರೆ, ಮಿಡ್-ಕ್ಯಾಪ್ ಸೂಚ್ಯಂಕವು 1.65% ರಷ್ಟು ಏರಿಕೆ ಕಂಡಿದೆ. ಇದೇ ಸಮಯದಲ್ಲಿ, ವ್ಯವಸ್ಥಿತ ಹೂಡಿಕೆ ಯೋಜನೆಗಳಲ್ಲಿ (SIP) ಹೂಡಿಕೆಗಳು ಈ ತಿಂಗಳಿಗೆ ಸಾರ್ವಕಾಲಿಕ ಗರಿಷ್ಠ ಮಟ್ಟವಾದ 20,904 ಕೋಟಿ ರೂಪಾಯಿ ತಲುಪಿದವು.