ಉಡುಪಿ ಜಿಲ್ಲೆಯಲ್ಲಿ ಸಂಭ್ರಮದಿಂದ ಮಿಲಾದುನ್ನಬಿ ಆಚರಣೆ

ಮುಸ್ಲಿಂ ಸಮುದಾಯದಿಂದ ಪೈಗಂಬರ್​ ಜನ್ಮದಿನಾಚರಣೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಜಿಲ್ಲೆಯಲ್ಲಿ ಮುಸ್ಲಿಂ ಸಮುದಾಯದವರು ಪ್ರವಾದಿ ಮುಹಮ್ಮದ್​ (ಸ.) ಪೈಗಂಬರ್​ ಜನ್ಮದಿನಾಚರಣೆ ಮಿಲಾದುನ್ನಬಿಯನ್ನು ಸೆಪ್ಟೆಂಬರ್​ 5ರಂದು ಸಂಭ್ರಮದಿಂದ ಆಚರಿಸಿದರು.

ಕಾಪು ಪೊಲಿಪು ಜುಮಾ ಮಸೀದಿಯಿಂದ ಹೊರಟ ಮೆರವಣಿಗೆಯು ಕೊಪ್ಪಲಂಗಡಿಯವರೆಗೆ ಸಾಗಿ, ಬಳಿಕ ಮಜೂರು ಮಲ್ಲಾರ್​ ಪಕೀರನ ಕಟ್ಟೆ ಮಸೀದಿಗಳಿಂದ ಆಗಮಿಸಿದ ಮೆರವಣಿಗೆಯ ಜತೆಗೆ ವಾಪಸ್​ ಪೊಲಿಪು ಮಸೀಗೆ ಆಗಮಿಸಿ ಸಮಾಪ್ತಿಗೊಂಡಿತು. ಮೆರವಣಿಗೆಯಲ್ಲಿ ಅಲಂಕೃತ ವಾಹನಗಳಲ್ಲಿ ದಫ್​ ಕುಣಿತ, ತಾಲೀಮು, ಪ್ರವಾದಿ ಸಂದೇಶ, ದಫ್​ ಕುಣಿತ, ಸ್ಕೌಟ್ಸ್​ ಹಾಗೂ ಮದರಸಾದ ಮಕ್ಕಳು ಸಾಗಿಬಂದರು.

ಶುಕ್ರವಾರ ಜುಮಾ ನಮಾಝಿನ ಕಾರಣ ಉಡುಪಿಯ ನೇಜಾರು, ದೊಡ್ಡಣಗುಡ್ಡೆ, ಗಂಗೊಳ್ಳಿ ಸೇರಿದಂತೆ ವಿವಿಧ ಕಡೆಗಳಲ್ಲಿ ಮೀಲಾದುನ್ನಬಿ ಮೆರವಣಿಗೆಯನ್ನು ಶನಿವಾರ ಹಾಗೂ ರವಿವಾರ ನಡೆಸಲು ಉದ್ದೇಶಿಸಲಾಗಿದೆ.