ಮಕ್ಕಳ ಚಿಕಿತ್ಸೆಗಾಗಿ ಅಂಗಾಂಗಗಳನ್ನೇ ಮಾರಾಟಕ್ಕಿಟ್ಟ ಮಹಾತಾಯಿ!

ಕೇರಳ: ಮಕ್ಕಳ ಚಿಕಿತ್ಸೆಗೆ ಹಣ ಹೊಂದಿಸಲಾಗದ ತಾಯಿ, ತನ್ನ ಅಂಗಾಂಗಳನ್ನೇ ಮಾರಾಟಕ್ಕಿಟ್ಟು ಗಮನ ಸೆಳೆದಿದ್ದಾರೆ. ಕೇರಳದ ಕೊಚ್ಚಿಯ ಹೊರವಲಯದಲ್ಲಿ ನೆಲೆಸಿರುವ ಈ ಮಹಾತಾಯಿ ದೊಡ್ಡ ತ್ಯಾಗಕ್ಕೆ ಸಜ್ಜಾಗಿದ್ದರು.

ಈಕೆಗೆ ಐವರು ಮಕ್ಕಳಿದ್ದು, ಆ ಪೈಕಿ ಹಿರಿಯ ಇಬ್ಬರು ಗಂಡು ಮಕ್ಕಳಿಗೆ ಅಪಘಾತಕ್ಕೀಡಾಗಿದ್ದು, ಗಂಭೀರವಾಗಿ ಗಾಯಗೊಂಡಿದ್ದಾರೆ. ಮತ್ತೊಬ್ಬ ಹೆಣ್ಣು ಮಗಳಿಗೆ ದೀರ್ಘಕಾಲದಿಂದ ನರರೋಗವಿದ್ದು ಆಕೆಯ ದೃಷ್ಟಿಗೂ ತೊಂದರೆ ಉಂಟಾಗಿದೆ. ಜತೆಗೆ ಈಕೆ ಪತಿಯಿಂದ ಪರಿತ್ಯಕ್ತಳಾಗಿದ್ದು, ಮನೆ ಬಾಡಿಗೆ ಕಟ್ಟಲಾಗದೆ ಗುಡಿಸಲಿನಲ್ಲಿ ವಾಸವಾಗಿದ್ದರು.

ಹೀಗೆ ಅನಾರೋಗ್ಯದಲ್ಲಿರುವ ಮಕ್ಕಳ ಚಿಕಿತ್ಸೆಗೆ ಹಣ ಹೊಂದಿಸಲಾಗದ ಈಕೆ, "ಮಕ್ಕಳ ಚಿಕಿತ್ಸೆಗಾಗಿ ಹಾಗೂ ಸಾಲ ತೀರಿಸಲು ಹೃದಯವೂ ಸೇರಿ ತಾಯಿಯ ಅಂಗಾಂಗಳು ಮಾರಾಟಕ್ಕಿವೆ" ಎಂದು ಗುಡಿಸಲಿನ ಮುಂದೆ ಬರೆದು ನೇತು ಹಾಕಿದ್ದರು.

ಭಾನುವಾರ ಈ ವಿಷಯ ಅಲ್ಲಿನ ಸರ್ಕಾರದ ಗಮನಕ್ಕೆ ಬಂದಿದ್ದು, ಕುಟುಂಬವನ್ನು ಅನಾಥಾಶ್ರಮಕ್ಕೆ ಸ್ಥಳಾಂತರಿಸಲಾಗಿದ್ದು, ಮಕ್ಕಳಿಗೆ ಚಿಕಿತ್ಸೆ ಕೊಡಿಸುವ ಭರವಸೆ ಸರ್ಕಾರದಿಂದ ಸಿಕ್ಕಿದೆ. ಜತೆಗೆ ಕೆಲವು ಸ್ವಯಂಸೇವಾ ಸಂಸ್ಥೆಗಳೂ ಸಹಾಯಕ್ಕೆ ಮುಂದಾಗಿವೆ. ಹೀಗಾಗಿ, ಕುಟುಂಬ ಕೊನೆಗೆ ಬಾಡಿಗೆ ಮನೆಗೆ ಮರಳಿದೆ. (ಏಜೆನ್ಸೀಸ್​)