ಮಹಿಳೆಯರ ಸುರಕ್ಷತೆಗಾಗಿ 'ಮಿಷನ್ ಶಕ್ತಿ'; ಹೊಸ ಅಭಿಯಾನಕ್ಕೆ ಸಿಎಂ ಯೋಗಿ ಚಾಲನೆ

ಉತ್ತರಪ್ರದೇಶ: ಹಾಥರಸ್​ ಪ್ರಕರಣದ ಬಳಿಕ ಉತ್ತರ ಪ್ರದೇಶದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದ್ದರಿಂದ ಹಾಗೂ ಮಹಿಳೆಯರ ಸುರಕ್ಷತೆಗಾಗಿ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್​ ಮಹತ್ವದ ಹೆಜ್ಜೆಯೊಂದನ್ನು ಇಟ್ಟಿದ್ದಾರೆ.

ರಾಜ್ಯದಲ್ಲಿ ಮಹಿಳೆಯರ ಮೇಲೆ ದೌರ್ಜನ್ಯ ಎಸಗುವವರ ಮೇಲೆ ಸೂಕ್ತ ಕ್ರಮಕೈಗೊಂಡು ತಕ್ಕಶಾಸ್ತಿ ಮಾಡುವ ಹಿನ್ನೆಲೆಯಲ್ಲಿ ರಾಜ್ಯದ 1,535 ಪೊಲೀಸ್​ ಠಾಣೆಗಳಲ್ಲಿ ಮಹಿಳಾ ದೂರುಗಳಿಗೆಂದೇ ಪ್ರತ್ಯೇಕ ವ್ಯವಸ್ಥೆ ಮಾಡಲಾಗಿದೆ ಎಂದು ಅವರು ತಿಳಿಸಿದರು. ಮಹಿಳಾ ಸುರಕ್ಷತೆಗಾಗಿ 'ಮಿಷನ್​ ಶಕ್ತಿ' ಅಭಿಯಾನಕ್ಕಾಗಿ ಅವರು ಚಾಲನೆ ನೀಡಿ ಮಾತನಾಡಿದರು.

ಸಂತ್ರಸ್ತರಿಗೆ ಶ್ರದ್ಧಾಂಜಲಿ ಸಲ್ಲಿಸುವುದು ತುಂಬ ದುಃಖಕರ ವಿಷಯ ಎಂದ ಅವರು, ಬಲರಾಮ್​ಪುರದಿಂದಲೇ ಈ ಮಿಷನ್​ ಶಕ್ತಿಗೆ ಚಾಲನೆ ಕೊಡಲು ನಿರ್ಧರಿಸಿದ್ದಾಗಿ ಹೇಳಿದರು. ಇದು ರಾಜ್ಯದ ಪ್ರತಿ ಮಹಿಳೆಗೂ ಗೌರವ ಹಾಗೂ ಸುರಕ್ಷತೆ ಖಚಿತ ಎಂಬುದಾಗಿ ಅವರು ಭರವಸೆ ನೀಡಿದರು.

ಮಿಷನ್​ ಶಕ್ತಿ ಆರು ತಿಂಗಳ ಮಹಿಳಾ ಸಬಲೀಕರಣ ಕಾರ್ಯಕ್ರಮವಾಗಿದ್ದು, ಇದಕ್ಕೆ ರಾಜ್ಯಪಾಲೆ ಆನಂದಿಬೆನ್​ ಪಟೇಲ್​ ಲಕ್ನೋದಲ್ಲಿ ಚಾಲನೆ ನೀಡಿದ್ದರೆ, ಉತ್ತರಪ್ರದೇಶದ ಬಲರಾಂಪುರದಲ್ಲಿ ಯೋಗಿ ಆದಿತ್ಯನಾಥ್​ ಚಾಲನೆ ನೀಡಿದರು. ಶರದ್​ ನವರಾತ್ರಿಯಂದು ಆರಂಭಗೊಂಡಿರುವ ಈ ಅಭಿಯಾನ ಏಪ್ರಿಲ್​ನಲ್ಲಿನ ಚೈತ್ರ ನವರಾತ್ರಿಯವರೆಗೆ ನಡೆಯಲಿದೆ.