ಕೋವಿಡ್​ ಹೆಸರಿನಲ್ಲಿ ಲಕ್ಷಾಂತರ ರೂ.ದುರ್ಬಳಕೆ: ಬಿಬಿಎಂಪಿ ಇಬ್ಬರು ವೈದ್ಯರಿಗೆ ನೋಟಿಸ್​ ಜಾರಿ

ಬೆಂಗಳೂರು:ಕೋವಿಡ್​-19 ನಿರ್ವಹಣೆಯಲ್ಲಿ ಹಣ ದುರುಪಯೋಗ ಕೇಸ್​ ಸಂಬಂಧ ವಿಚಾರಣೆಗೆ ಬರುವಂತೆ ಬಿಬಿಎಂಪಿ ಆರೋಗ್ಯಧಿಕಾರಿ ಡಾ.ಎಸ್​.ಕೆ.ಸವಿತಾ,ಆರೋಗ್ಯ ವೈದ್ಯಾಧಿಕಾರಿ ಡಾ.ಜಿ.ಶ್ರೀನಿವಾಸ್​ಗೆ ನಗರಾಭಿವೃದ್ಧಿ ಇಲಾಖೆ ನೋಟಿಸ್​ ಜಾರಿ ಮಾಡಿದೆ. ನೋಟಿಸ್​ ತಲುಪಿದ 15 ದಿನದೊಳಗೆ ವಿಚಾರಣೆ ಹಾಜರಾಗಬೇಕೆಂದು ಆದೇಶದಲ್ಲಿ ಸೂಚಿಸಲಾಗಿದೆ.

ರಾಜರಾಜೇಶ್ವರಿನಗರ ಮತ್ತು ಬೊಮ್ಮನಹಳ್ಳಿ ವಲಯದಲ್ಲಿ ಆರೋಗ್ಯಧಿಕಾರಿ ಹುದ್ದೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ವೇಳೆ ಡಾ.ಎಸ್​.ಕೆ.ಸವಿತಾ, ತಮ್ಮ ಪುತ್ರ ಸಿ.ಸಿದ್ದರಾಜು ಚಿರಾಗ್​ ಒಡೆತನದ ಎಂ/ಎಸ್​.ಎವಿಎಸ್​ ಎಂಟರ್​ಪ್ರೆಸಸ್​ ಎಂಬ ನಕಲಿ ಸಂಸ್ಥೆಗೆ ಅಕ್ರಮವಾಗಿ ಕಾರ್ಯಾದೇಶ ಪತ್ರ ನೀಡಿದ್ದರು. ಕಾರ್ಯಾದೇಶ ಪಡೆದ ನಂತರ ಈ ಸಂಸ್ಥೆ, ಸಿಬ್ಬಂದಿಗೆ ವೇತನ ಪಾವತಿಸದೆ ಸಂಸ್ಥೆಯ ಹೆಸರಿನಲ್ಲಿ ನಿಯಮಬಾಹಿರವಾಗಿ 41 ಲಕ್ಷ ರೂ.ಗುಳಂ ಮಾಡಿತ್ತು.

ಅಲ್ಲದೆ, ಪೂರ್ವ ವಲಯದಲ್ಲಿ ಸೊಳ್ಳೆ ನಿಯಂತ್ರಣ ಕೆಲಸ ಮಾಡದಿದ್ದರೂ 2018-19 ಮತ್ತು 2019-20ರಲ್ಲಿ ಎಂ/ಎಸ್​.ಎವಿಎಸ್​ ಎಂಟರ್​ಪ್ರೆಸಸ್​ನ ನಕಲು ವರ್ಕ್​ ಡನ್​ ಪತ್ರ ಉಪಯೋಗಿಸಿಕೊಂಡು ಬೊಮ್ಮನಹಳ್ಳಿ, ಮಹದೇವಪುರ ಮತ್ತು ಪೂರ್ವ ವಲಯದಲ್ಲಿ ಟಂಡರ್​ ಹಾಕಿ ಸರಬರಾಜು ಕಾರ್ಯಾದೇಶ ಪತ್ರ ಪಡೆಯಲಾಗಿತ್ತು. ಅಲ್ಲದೆ, ನಿಯಮದನ್ವಯ ಸರ್ಕಾರಿ ನೌಕರರು ಮತ್ತು ಅವರ ಕುಟುಂಬದ ಸದಸ್ಯರಿರುವ ಯಾವುದೇ ಕಂಪನಿ ಪರವಾಗಿ ವ್ಯವಹಾರ ಮಾಡಲು ಅವಕಾಶ ಇರುವುದಿಲ್ಲ. ಆದರೆ, ಈ ನಿಯಮ ಉಲ್ಲಂಘಿಸಿ ಸವಿತಾ, ತಮ್ಮ ಪುತ್ರ ಒಡೆತನದ ಕಂಪನಿಗೆ 20ಕ್ಕೂ ಅಧಿಕ ಕಾರ್ಯದೇಶ ಪತ್ರ ನೀಡಿ ಗಂಭೀರ ಕರ್ತವ್ಯಲೋಪ ಎಸೆಗಿದ್ದಾರೆ.

ಆರೋಗ್ಯ ಇಲಾಖೆಯಿಂದ ಬಿಬಿಎಂಪಿಯಲ್ಲಿ ಎರವಲು ಸೇವೆಯ ಮೇಲೆ ಆರೋಗ್ಯ ವೈದ್ಯಾಧಿಕಾರಿ (ಶಾಂತಿನಗರ) ಹುದ್ದೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ವೇಳೆ ಡಾ.ಜಿ.ಶ್ರೀನಿವಾಸ್​, ಕೋವಿಡ್​-19 ನಿಯಂತ್ರಣಕ್ಕೆ ಸಂಬಂಧಪಟ್ಟಂತೆ ಸ್ವಾಬ್​ ಕೆಲಕ್ಟರ್​, ಗಣಕಯಂತ್ರ ನಿರ್ವಾಹಕರಗಳ ಹೆಸರಿನಲ್ಲಿ ಬಿಬಿಎಂಪಿ ನೌಕರರ ಮತ್ತು ಅವರ ಕುಟುಂಬದ ಸದಸ್ಯರ ಖಾತೆಗೆ ಅಕ್ರಮವಾಗಿ ಲಕ್ಷಾಂತರ ರೂಪಾಯಿ ಹಣ ವರ್ಗಾಯಿಸಿದ್ದರು. ಕ್ಯಾನ್ಸರ್​ ಕೇರ್​ ಇಂಡಿಯಾ ಟ್ರಸ್ಟ್​ನಿಂದ ನೇಮಿಸಿಕೊಂಡಿದ್ದ ಸಿಬ್ಬಂದಿ ನಿಯೋಜಿಸುವ ಹುದ್ದೆಗಳಲ್ಲಿ ಕರ್ತವ್ಯ ನಿರ್ವಹಿಸಲು ಅರ್ಹತೆ ಹೊಂದಿರುವ ಬಗ್ಗೆ ಪರಿಶೀಲಿಸದೆ ಬೇಜವಾಬ್ದಾರಿತನದಿಂದ ಇವರು ಕರ್ತವ್ಯ ಲೋಪ ಎಸಗಿದ್ದಾರೆ. ವಲಯ ಆಯುಕ್ತರ ಅನುಮೋದನೆ ಪಡೆಯದೆ ಇವರಿಬ್ಬರೂ ಕೋವಿಡ್​ ಹೆಸರಿನಲ್ಲಿ ಪಾಲಿಕೆಗೆ ಹತ್ತಾರು ಲಕ್ಷ ರೂಪಾಯಿ ವಂಚಿಸಿರುವುದು ಮೇಲ್ನೋಟಕ್ಕೆ ಕಂಡುಬಂದಿದೆ.

https://www.vijayavani.net/give-mercy-to-the-examinees-and-earn-their-merit-kpsc-candidates-write-to-the-president