ಇಂದು ಹುತಾತ್ಮರ ದಿನ; ದೇಶಕ್ಕಾಗಿ ಪ್ರಾಣತ್ಯಾಗ ಮಾಡಿದ ವೀರರನ್ನು ನೆನಪಿಸಿಕೊಂಡ ಪ್ರಧಾನಿ

ನವದೆಹಲಿ: ಬ್ರಿಟಿಷರ ಕಪಿಮುಷ್ಠಿಯಲ್ಲಿದ್ದ ಭಾರತವನ್ನು ಸ್ವತಂತ್ರಗೊಳಿಸುವ ಸಲುವಾಗಿ ಹೋರಾಡಿದ ಭಗತ್​ ಸಿಂಗ್​, ರಾಜ್​ಗುರು ಮತ್ತು ಸುಖದೇವ್​ ಗಲ್ಲಿಗೇರಿದ ದಿನವಿದು. 1931ರಲ್ಲಿ ದೇಶಕ್ಕಾಗಿ ಪ್ರಾಣ ತ್ಯಾಗ ಮಾಡಿದ ಮೂರು ವೀರರ ಸ್ಮರಣಾರ್ಥ ಪ್ರತಿ ವರ್ಷ ಈ ದಿನವನ್ನು ಹುತಾತ್ಮರ ದಿನವಾಗಿ ಆಚರಿಸಿಕೊಂಡು ಬಂದಿದ್ದು, ಇಂದು ಪ್ರಧಾನಿ ಮೋದಿ ಸೇರಿದಂತೆ ಕೆಲ ರಾಜಕೀಯ ಮುಖಂಡರು ಈ ವೀರರ ಸ್ಮರಣೆ ಮಾಡಿದ್ದಾರೆ.

ಟ್ವಿಟ್ಟರ್​ನಲ್ಲಿ ಹುತಾತ್ಮರ ಸ್ಮರಣೆ ಮಾಡಿರುವ ಪ್ರಧಾನಿ ನರೇಂದ್ರ ಮೋದಿ, "ತಾಯಿ ಭಾರತೀಯ ವೀರ ಮಕ್ಕಳಾದ ಭಗತ್​ ಸಿಂಗ್​, ಸುಖದೇವ್​ ಮತ್ತು ರಾಜ್​ಗುರು ಅವರನ್ನು ಸ್ಮರಿಸುತ್ತೇನೆ. ಅವರಿಗೆ ಕೃತಜ್ಞರಾಗಿರುವ ರಾಷ್ಟ್ರವು ಅವರು ಮಾಡಿರುವ ತ್ಯಾಗವನ್ನು ಯಾವಾಗಲೂ ಸ್ಮರಿಸುತ್ತದೆ. ಜೈ ಹಿಂದ್​!" ಎಂದು ಟ್ವೀಟ್​ ಮಾಡಿದ್ದಾರೆ. ಗೃಹ ಸಚಿವ ಅಮಿತ್​ ಶಾ ಕೂಡ ಟ್ವೀಟ್​ ಮಾಡಿದ್ದು, "ಭಗತ್​ ಸಿಂಗ್​, ಸುಖದೇವ್​ ಮತ್ತು ರಾಜ್​ಗುರು ಕೇವಲ ಸ್ವಾತಂತ್ರ್ಯ ಹೋರಾಟದಿಂದ ಮಾತ್ರವಲ್ಲ ತ್ಯಾಗದಿಂದಲೂ ಸಹ ಭಾರತದ ಜನರ ಮನಸ್ಸನ್ನು ಗೆದ್ದಿದ್ದಾರೆ. ಈ ಮೂವರು ರಾಷ್ಟ್ರೀಯವಾದಿಗಳು ಸ್ವಾತಂತ್ರ್ಯ ಚಳವಳಿಯ ಅಮರ ಸಂಕೇತಗಳಾಗಿದ್ದಾರೆ. ರಾಷ್ಟ್ರದ ಸೇವೆ ಮತ್ತು ಐಕ್ಯತೆಗೆ ಯಾವಾಗಲೂ ನಮಗೆ ಸ್ಫೂರ್ತಿ ನೀಡುತ್ತಾರೆ." ಎಂದು ಬರೆದುಕೊಂಡಿದ್ದಾರೆ.

ಕಾಂಗ್ರೆಸ್​ನ ನಾಯಕ ರಾಹುಲ್​ ಗಾಂಧಿ ಕೂಡ ಹುತಾತ್ಮರ ದಿನದಂದು ದೇಶಭಕ್ತರನ್ನು ನೆನಪಿಸಿಕೊಂಡಿದ್ದು, "ದೇಶದ ಸ್ವಾತಂತ್ರ್ಯಕ್ಕಾಗಿ ಪ್ರಾಣತ್ಯಾಗ ಮಾಡಿದ ಭಗತ್​ ಸಿಂಗ್​, ಸುಖದೇವ್​ ಮತ್ತು ರಾಜ್​ಗುರುಗೆ ನಮನಗಳು" ಎಂದು ಟ್ವೀಟ್​ ಮಾಡಿದ್ದಾರೆ. (ಏಜೆನ್ಸೀಸ್​)

https://www.vijayavani.net/a-68-year-old-man-from-the-philippines-who-tested-positive-for-coronavirus-infection-and-later-recovered-has-died/