ಲಕ್ಷಾಂತರ ಕಡಲಾಮೆಗಳು ಮೊಟ್ಟೆ ಇಡಲು ಸಾವಿರಾರು ಕಿ.ಮೀ. ದೂರದಿಂದ ವಿವಿಧ ದಿಕ್ಕಿನಿಂದ ಒಂದೇ ದಿವಸ ಒಂದೇ ಕಡೆ ಹೇಗೆ ಬಂದು ಸೇರುತ್ತವೆ? ಇದಕ್ಕೆ ಸಮುದ್ರದ ನೀರಿನ ಉಷ್ಣಾಂಶ ನಿರ್ಧಾರ ಮಾಡಬಹುದೇ? ಅಥವಾ ಭೂಮಿಯ ಕಾಂತೀಯ ಶಕ್ತಿ ನಿರ್ಧಾರ ಮಾಡುತ್ತದೆಯೇ? ಒಂದೊಂದು ಆಮೆಯೂ ನೂರು, ನೂರಿಪ್ಪತ್ತು, ನೂರೈವತ್ತು, ಇನ್ನೂರು ಮೊಟ್ಟೆ ಇಡುತ್ತದೆ. ಅಷ್ಟೊಂದು ಮೊಟ್ಟೆಗಳನ್ನು ಇಡಲು ಅಷ್ಟೊಂದು ಆಮೆಗಳು ಜಾಗವನ್ನು ಪ್ರತ್ಯೇಕವಾಗಿ ಹೇಗೆ ತಯಾರಿ ಮಾಡಿಕೊಳ್ಳುತ್ತವೆ? ಎಲ್ಲ ಮೊಟ್ಟೆಗಳೂ ಮರಿಗಳಾಗುವುದಿಲ್ಲ. ಅಂದರೆ ಉಳಿದ ಮೊಟ್ಟೆಗಳ ಪರಿಣಾಮ ಏನಾಗಬಹುದು? ಅವುಗಳನ್ನು ಕರಗಿಸಲು ಆ ಮರಳಿನಲ್ಲಿ ಎಂತಹ ಕ್ರಿಮಿ ಕೀಟಗಳು, ಹುಳಗಳು, ಸೂಕ್ಷ್ಮಜೀವಿಗಳು ಇರಬಹುದು? ಮುಂತಾದ ಹಲವು ಪ್ರಶ್ನೆಗಳು ಮೂಡುವುದು ಸಹಜ. ಇದಕ್ಕೆಲ್ಲ ಜೈವಿಕ ವ್ಯವಸ್ಥೆ ಕಾರಣ ಎನ್ನಬಹುದು. ಪ್ರತಿ ಸ್ಥಳದಲ್ಲೂ ಪ್ರತಿಯೊಂದು ವಸ್ತುವನ್ನು ಕರಗಿಸಲು ವಿವಿಧ ಜಾತಿಯ ಬ್ಯಾಕ್ಟೀರಿಯಾ ಮತ್ತು ಇತರ ಸಣ್ಣ ಸಣ್ಣ ಕೀಟಗಳು ಇರುವಂತೆ ಸಮುದ್ರದ ದಡದಲ್ಲಿಯು ಕೂಡ ಇಂತಹ ಜೈವಿಕ ವ್ಯವಸ್ಥೆ ಸೃಷ್ಟಿಯಾಗಿರುತ್ತದೆ.
