ಬೆಂಗಳೂರು: ‘ವಿಕ್ರಾಂತ್ ರೋಣ’ ಬಿಡುಗಡೆಯಾಗಿ ಎರಡೂವರೆ ವರ್ಷಗಳ ಬಳಿಕ ಸುದೀಪ್ ನಾಯಕನಾಗಿ ನಟಿಸುತ್ತಿರುವ ಸಿನಿಮಾ ‘ಮ್ಯಾಕ್ಸ್’. ತಮಿಳಿನ ವಿಜಯ್ ಕಾರ್ತಿಕೇಯನ್ ನಿರ್ದೇಶನದ ಈ ಚಿತ್ರದಲ್ಲಿ ಸುದೀಪ್ ಮಾಸ್ ಅವತಾರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈಗಾಗಲೇ ಟ್ರೇಲರ್ನಲ್ಲಿ ಕಿಚ್ಚ ಮಿಂಚಿದ್ದು, ಅಭಿಮಾನಿಗಳಲ್ಲಿ ‘ಮ್ಯಾಕ್ಸ್’ ನಿರೀಕ್ಷೆ ಹೆಚ್ಚಿಸಿದೆ. ಇದೇ ತಿಂಗಳ 25ರಂದು ಸಿನಿಮಾ ಬಿಡುಗಡೆಯಾಗಲಿದೆ. ವರಲಕ್ಷ್ಮೀ ಶರತ್ಕುಮಾರ್, ಸುಕೃತಾ ವಾಗ್ಲೆ, ಸಂಯುಕ್ತ ಹೊರನಾಡು ತಾರಾಗಣದಲ್ಲಿದ್ದಾರೆ. ಇತ್ತೀಚೆಗೆ ಚಿತ್ರದ ‘ಲಯನ್ಸ್ ರೋರ್’ ಎಂಬ ಲಿರಿಕಲ್ ಆಡಿಯೋ ರಿಲೀಸ್ ಮಾಡಲಾಗಿದೆ. ‘ಸಿಂಹ ಮೆರೆಯುವ ಕಾಡಿನಲಿ, ಕದ್ದು ಬಂತು ಗುಳ್ಳೆ ನರಿ. ಸುಳ್ಳು, ಮೋಸ, ಕಪಟದಲ್ಲಿ ಸಿಂಹ ಗುಳೆಯೊಳಗೆ ನರಿ’ ಎಂದು ಸಾಗುವ ಗೀತೆಗೆ ಅನೂಪ್ ಭಂಡಾರಿ ಸಾಹಿತ್ಯ, ಅಜನೀಷ್ ಲೋಕನಾಥ್ ಸಂಗೀತವಿದ್ದು ವಿಜಯ್ ಪ್ರಕಾಶ್ ಧ್ವನಿಯಾಗಿದ್ದಾರೆ. ನಟಿ ಸಂಯುಕ್ತಾ ಹೊರನಾಡು, ‘ಈ ಸಿನಿಮಾದಲ್ಲಿ ಕಿಚ್ಚ ಸರ್ ಡಾನ್ಸ್ ಮತ್ತು ಆ್ಯಕ್ಷನ್ ಎರಡನ್ನೂ ಒಟ್ಟಿಗೆ ನೋಡಬಹುದು’ ಎಂದರು. ಸುಕೃತಾ ವಾಗ್ಲೆ, ‘ಸುದೀಪ್ ಸರ್ ಜತೆ ಕೆಲಸ ಮಾಡಿರುವ ಬಗ್ಗೆ ಒಂದು ಶಬ್ದದಲ್ಲಿ ಹೇಳಲು ಸಾಧ್ಯವಿಲ್ಲ. ಅದೊಂದು ಯೂನಿವರ್ಸಲ್ ಅನುಭವ’ ಎಂದರು.
