ಆರೋಪಿ ಮುಸ್ತಫಾ ಗುರುವಾರ ರಾತ್ರಿ ಸುಲೇಮಾನ್ಗೆ ಕರೆ ಮಾಡಿ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದ. ಇದರಿಂದ ಬೇಸರಗೊಂಡ ಸುಲೇಮಾನ್ ಅವರು ಮಾತುಕತೆಗೆಂದು ತನ್ನ ಇಬ್ಬರು ಮಕ್ಕಳು ಹಾಗೂ ಇನ್ನೋರ್ವ ಸಂಬಂಧಿ ಜತೆ ಮುಸ್ತಫಾನ ಮನೆಗೆ ಹೋಗಿದ್ದರು. ಮೂವರನ್ನು ಮನೆಯ ಹೊರಗೆ ನಿಲ್ಲಿಸಿ, ಮನೆಯೊಳಗೆ ತೆರಳಿ ಮಾತುಕತೆ ನಡೆಸಿದ್ದಾರೆ. ಈ ನಡುವೆ ಎದ್ದು ಬಂದ ಸುಲೇಮಾನ್ ಅವರು, ಮಾತುಕತೆ ವಿಫಲವಾಯಿತು. ನಾವು ಮನೆಗೆ ಹೋಗೋಣ ಎಂದು ಹೇಳುತ್ತಾ ವೇಗವಾಗಿ ಹಿಂದಕ್ಕೆ ಬರುತ್ತಿದ್ದಾಗಲೇ ತಲವಾರು ಹಿಡಿದು ಅಟ್ಟಿಸಿಕೊಂಡು ಬಂದ ಮುಸ್ತಫಾ ಬ್ಯಾರಿ ಭಾಷೆಯಲ್ಲಿ ಬೆದರಿಕೆಯೊಡ್ಡಿ, ನೇರವಾಗಿ ಸುಲೇಮಾನ್ ಅವರ ಕುತ್ತಿಗೆಗೆ ಕಡಿದಿದ್ದಾನೆ. ಗಂಭೀರ ಗಾಯಗೊಂಡು ಸುಲೇಮಾನ್ ಸ್ಥಳದಲ್ಲೇ ಕುಸಿದು ಬಿದ್ದಿದ್ದಾರೆ. ಈ ಸಂದರ್ಭ ತಡೆಯಲು ಬಂದ ಅವರ ಪುತ್ರರ ಮೇಲೂ ಚೂರಿಯಿಂದ ಇರಿದಿದ್ದು, ಸಿಯಾಬ್ಗೆ ಎದೆಯ ಎಡಭಾಗಕ್ಕೆ ಮತ್ತು ರಿಯಾಬ್ಗೆ ಬಲ ತೋಳಿಗೆ ಇರಿದು ಅವರನ್ನೂ ಕೊಲೆ ಮಾಡಲು ಯತ್ನಿಸಿದ್ದಾನೆ.
