ನವೆಂಬರ್​ 22ರಿಂದ ಪ್ರತಿಷ್ಠಿತ ಬಾರ್ಡರ್​-ಗಾವಸ್ಕರ್​ ಟ್ರೋಫಿ; ಪರ್ತ್​ನಲ್ಲಿ ಭಾರತ-ಆಸೀಸ್​ ಮೊದಲ ಟೆಸ್ಟ್​

ಮೆಲ್ಬೋರ್ನ್​: ಪ್ರವಾಸಿ ಭಾರತ ಮತ್ತು ಆಸ್ಟ್ರೆಲಿಯಾ ತಂಡಗಳ ನಡುವಿನ ಪ್ರತಿಷ್ಠಿತ ಬಾರ್ಡರ್​-ಗಾವಸ್ಕರ್​ ಟ್ರೋಫಿಗೆ ನವೆಂಬರ್​ 22ರಂದು ಪರ್ತ್​ನ ಆಪ್ಟಸ್​ ಸ್ಟೇಡಿಯಂನಲ್ಲಿ ಚಾಲನೆ ಸಿಗಲಿದೆ. ಐದು ಪಂದ್ಯಗಳ ಸರಣಿಯಲ್ಲಿ ಡಿಸೆಂಬರ್​ 6ರಿಂದ ಅಡಿಲೇಡ್​ನಲ್ಲಿ ನಡೆಯಲಿರುವ 2ನೇ ಟೆಸ್ಟ್​ ಅಡಿಲೇಡ್​ನಲ್ಲಿ ನಿಗದಿಯಾಗಿದೆ. ಕ್ರಿಕೆಟ್​ ಆಸ್ಟ್ರೆಲಿಯಾ ಮಂಗಳವಾರ 2024-25ರ ಸಾಲಿನ ತವರಿನ ಸರಣಿಗಳ ವೇಳಾಪಟ್ಟಿಯನ್ನು ಬಿಡುಗಡೆಗೊಳಿಸಿದೆ.

ಡಿಸೆಂಬರ್​ 14ರಿಂದ ಸರಣಿಯ 3ನೇ ಟೆಸ್ಟ್​ ಬ್ರಿಸ್ಬೇನ್​ನಲ್ಲಿ ನಡೆಯಲಿದ್ದರೆ, ಕೊನೇ 2 ಟೆಸ್ಟ್​ ಪಂದ್ಯಗಳು ಸಾಂಪ್ರದಾಯಿಕ ಬಾಕ್ಸಿಂಗ್​ ಡೇ ಟೆಸ್ಟ್​ (ಮೆಲ್ಬೋರ್ನ್​) ಮತ್ತು ನ್ಯೂ ಇಯರ್​ ಟೆಸ್ಟ್​ (ಸಿಡ್ನಿ) ಪಂದ್ಯಗಳಾಗಿರಲಿವೆ. ಸರಣಿಯ ಮೊದಲ 2 ಪಂದ್ಯಗಳ ನಡುವೆ 9 ದಿನಗಳ ಅಂತರವಿದೆ. ಪಿಂಕ್​ಬಾಲ್​ನಲ್ಲಿ ನಡೆಯಲಿರುವ 2ನೇ ಟೆಸ್ಟ್​ ಪಂದ್ಯಕ್ಕೆ ಸಿದ್ಧತೆ ನಡೆಸಲು ಆಟಗಾರರಿಗೆ ಹೆಚ್ಚಿನ ಸಮಯ ನೀಡುವುದು ಇದರ ಹಿಂದಿನ ಉದ್ದೇಶವಾಗಿದೆ. 2020-21ರ ಆಸೀಸ್​ ಪ್ರವಾಸದಲ್ಲಿ ಅಡಿಲೇಡ್​ನಲ್ಲೇ ನಡೆದ ಅಹರ್ನಿಶಿ ಟೆಸ್ಟ್​ನಲ್ಲಿ ಕೇವಲ 36 ರನ್​ಗೆ ಆಲೌಟ್​ ಆಗಿ ಸೋತಿದ್ದ ಭಾರತ, ನಂತರ ತಿರುಗೇಟು ನೀಡಿ ಸರಣಿ ಜಯಿಸಿತ್ತು.

ಸಾಮಾನ್ಯವಾಗಿ ಭಾರತ ತಂಡ ಆಸೀಸ್​ ಪ್ರವಾಸದಲ್ಲಿ ಬ್ರಿಸ್ಬೇನ್​ನಲ್ಲೇ ಸರಣಿಯ ಮೊದಲ ಟೆಸ್ಟ್​ ಆಡುತಿತ್ತು. ಆದರೆ ಈ ಬಾರಿ ಉಭಯ ದೇಶಗಳ ವೀಕ್ಷಕರಿಗೂ ಅನುಕೂಲಕರ ಎನಿಸುವ ಸಮಯ ವಲಯದ ಕಾರಣಕ್ಕಾಗಿ ಪರ್ತ್​ಗೆ ಮೊದಲ ಟೆಸ್ಟ್​ ಆತಿಥ್ಯ ವಹಿಸಲಾಗಿದೆ ಎಂದು ಕ್ರಿಕೆಟ್​ ಆಸ್ಟ್ರೆಲಿಯಾದ ಮುಖ್ಯಸ್ಥ ಪೀಟರ್​ ರೋಚ್​ ಸ್ಪಷ್ಟಪಡಿಸಿದ್ದಾರೆ.

ಬ್ರಿಸ್ಬೇನ್​ ಬೌನ್ಸಿ ಪಿಚ್​ ಹೊಂದಿರುವ ಕಾರಣಕ್ಕೆ ಆಸೀಸ್​ ಯಾವಾಗಲೂ ಪ್ರವಾಸಿ ಭಾರತ ತಂಡಕ್ಕೆ ಮೊದಲ ಪಂದ್ಯದಲ್ಲೇ ಕಠಿಣ ವಾತಾವರಣ ನಿರ್ಮಿಸುತ್ತಿತ್ತು. ಆದರೆ ಪರ್ತ್​ ಕೂಡ ಬೌನ್ಸಿ ಮತ್ತು ಆಸೀಸ್​ ನೆಲದ ಕಠಿಣ ಪಿಚ್​ ಒಳಗೊಂಡಿದೆ. ಹೀಗಾಗಿ ಈ ಬಾರಿ ಮೊದಲೆರಡೂ ಪಂದ್ಯಗಳಲ್ಲಿ ಆತಿಥೇಯರಿಗೆ ಹೆಚ್ಚು ಲಾಭ ಸಿಗಲಿದೆ ಎಂದೂ ರೋಚ್​ ವಿವರಿಸಿದ್ದಾರೆ. ಪರ್ತ್​ನ ಹೊಸ ಸ್ಟೇಡಿಯಂನಲ್ಲಿ ಆಸೀಸ್​ ಇದುವರೆಗೆ ಆಡಿರುವ 4 ಟೆಸ್ಟ್​ಗಳಲ್ಲೂ ಗೆದ್ದ ಅಜೇಯ ದಾಖಲೆ ಹೊಂದಿದೆ.

1991-92ರ ಬಳಿಕ ಮೊದಲ ಬಾರಿಗೆ ಭಾರತ-ಆಸೀಸ್​ ನಡುವೆ 5 ಪಂದ್ಯಗಳ ಟೆಸ್ಟ್​ ಸರಣಿ ನಿಗದಿಯಾಗಿದೆ. ಉಭಯ ತಂಡಗಳ ಕೊನೇ 4 ಸರಣಿಗಳಲ್ಲಿ ಭಾರತವೇ ಜಯಿಸಿದೆ. ಇದರಲ್ಲಿ ಆಸೀಸ್​ ನೆಲದ ಕೊನೇ 2 ಸರಣಿಗಳೂ ಸೇರಿವೆ. 2024-25ರ ಸಾಲಿನ ಆಸೀಸ್​ ತವರಿನ ಅಂತಾರಾಷ್ಟ್ರೀಯ ಕ್ರಿಕೆಟ್​ ಋತು ನವೆಂಬರ್​ 4ರಂದು ಶುರುವಾಗಲಿದೆ. ಮೊದಲಿಗೆ ಪಾಕಿಸ್ತಾನ ವಿರುದ್ಧ 3 ಪಂದ್ಯಗಳ ಏಕದಿನ ಸರಣಿ ನಡೆದರೆ, ನಂತರ ನವೆಂಬರ್​ 14ರಿಂದ ಪಾಕ್​ ವಿರುದ್ಧವೇ ಮತ್ತೆ 3 ಟಿ20 ಪಂದ್ಯಗಳು ನಡೆಯಲಿವೆ.

ಟೆಸ್ಟ್​ ಸರಣಿ ವೇಳಾಪಟ್ಟಿ

ಪಂದ್ಯ ದಿನಾಂಕ ಸ್ಥಳ

1. ನ. 22-26 ಪರ್ತ್​

2. ಡಿ.6-10 ಅಡಿಲೇಡ್​*

3. ಡಿ. 14-18 ಬ್ರಿಸ್ಬೇನ್​

4. ಡಿ. 26-30 ಮೆಲ್ಬೋರ್ನ್​

5. ಜ.3-7 ಸಿಡ್ನಿ

*ಅಹರ್ನಿಶಿ

ಭಾರತದ ಮಹಿಳೆಯರಿಗೆ ಆಸೀಸ್​ನಲ್ಲಿ ಏಕದಿನ ಸರಣಿ

ಪುರುಷರ ತಂಡದ ಪ್ರವಾಸದ ಸಮಯದಲ್ಲೇ ಭಾರತದ ಮಹಿಳಾ ತಂಡವೂ ಆಸೀಸ್​ಗೆ ತೆರಳಲಿದ್ದು, ಡಿಸೆಂಬರ್​ 5, 8, 11ರಂದು 3 ಏಕದಿನ ಪಂದ್ಯಗಳ ಸರಣಿ ಆಡಲಿದೆ. ಆಸೀಸ್​ ಮಹಿಳೆಯರ 2024-25ರ ತವರಿನ ಸರಣಿಯ ವೇಳಾಪಟ್ಟಿಯಲ್ಲಿ ಪ್ರಕಟಿಸಲಾಗಿದ್ದು, 1949ರ ಬಳಿಕ ಮೊದಲ ಬಾರಿಗೆ ಮೆಲ್ಬೋರ್ನ್​ ಕ್ರಿಕೆಟ್​ ಗ್ರೌಂಡ್​ನಲ್ಲಿ ಮಹಿಳೆಯರ ಟೆಸ್ಟ್​ ನಿಗದಿಯಾಗಿದೆ. ಮಹಿಳಾ ಆಶಸ್​ನ 90ನೇ ವರ್ಷಾಚರಣೆಯ ಹಿನ್ನೆಲೆಯಲ್ಲಿ ಈ ಪಂದ್ಯ ಜನವರಿ 30ರಿಂದ ಅಹರ್ನಿಶಿಯಾಗಿ ನಡೆಯಲಿದೆ.

https://www.vijayavani.net/all-round-csk-outclass-titans-to-make-it-two-in-row