ಹಳ್ಳಿಯಲ್ಲಿ ವ್ಯವಸಾಯವನ್ನೇ ನೆಚ್ಚಿಕೊಂಡು ಬದುಕುತ್ತಿದ್ದ ಒಂದು ಕುಟುಂಬದ ಯಜಮಾನ ತೀರಿಕೊಂಡ. ಅವನ ಇಬ್ಬರು ಗಂಡುಮಕ್ಕಳು ಪೇಟೆಯಲ್ಲಿ ಉದ್ಯೋಗದಲ್ಲಿದ್ದರು. ಇನ್ನು ಮುಂದೆ ತನ್ನ ಇಬ್ಬರು ಮಕ್ಕಳು ಹಳ್ಳಿಯಲ್ಲಿಯೇ ಉಳಿದು ವ್ಯವಸಾಯ ಮಾಡಲಿ ಎಂಬುದು ತಾಯಿಯ ಇಚ್ಛೆ ಆಗಿತ್ತು. ಮಕ್ಕಳಿಬ್ಬರು ನಗರದಲ್ಲಿ ಅಂತಹ ತೃಪ್ತಿಕರ ಹುದ್ದೆಯಲ್ಲಿರದ ಕಾರಣ, ಊರಿಗೆ ಬಂದು ತಂದೆಯ ಆಸ್ತಿಯಲ್ಲಿ ಪಾಲು ತೆಗೆದುಕೊಂಡು ಬದುಕಲಾರಂಭಿಸಿದರು. ಕೆಲವೇ ತಿಂಗಳುಗಳಲ್ಲಿ ಅಣ್ಣನಿಗೆ ಹಳ್ಳಿಯ ಜೀವನ ಬೇಸರ ತಂದಿತು. ಆತನಿಗೆ ಹಳ್ಳಿಯ ದುಡಿಮೆಗೆ ತನ್ನನ್ನು ಒಗ್ಗಿಸಿಕೊಳ್ಳಲಾಗಲಿಲ್ಲ. ಅಗತ್ಯ ಸೌಲಭ್ಯಗಳಿಲ್ಲದೆ ಬದುಕು ಅಸ್ತವ್ಯಸ್ತವಾದಂತೆ ಅನ್ನಿಸಿ, ಈ ಹಳ್ಳಿ ಬದಲಾಗದ ಹೊರತು ತನಗಿಲ್ಲಿ ಇರಲು ಸಾಧ್ಯವೇ ಇಲ್ಲ... ಎಂದು ಜಮೀನನ್ನು ತಮ್ಮನಿಗೆ ವಹಿಸಿ ಪಟ್ಟಣದ ಹಾದಿ ಹಿಡಿದ. ಅವನ ಸಹೋದರ ತುಂಬ ಹೊಂದಾಣಿಕೆ ಸ್ವಭಾವ ಮತ್ತು ಚುರುಕು ಬುದ್ಧಿಯವನಾಗಿದ್ದು ಮೊದಲು ಹಳ್ಳಿಯ ಜೀವನಶೈಲಿಗೆ ಹೊಂದಿ ಕೊಳ್ಳುವಂತೆ ತನ್ನನ್ನು ಬದಲಿಸಿಕೊಂಡ. ತನ್ನ ತಿಳಿವಳಿಕೆಯಿಂದ ಹೊಸ ಹೊಸ ತಂತ್ರಜ್ಞಾನ, ಆವಿಷ್ಕಾರಗಳನ್ನು ವ್ಯವಸಾಯದಲ್ಲಿ ಬಳಸಿದ. ಹಳ್ಳಿಯ ಜನರಲ್ಲೂ ಅರಿವು ಮೂಡಿಸಿ, ಮೂಢನಂಬಿಕೆ, ಕಂದಾಚಾರ ಹೋಗಲಾಡಿಸಿ ಆಧುನಿಕ, ಸುಸಂಸ್ಕೃತ ಜೀವನದ ಪರಿಚಯ ಮಾಡಿಸಿದ. ಅವನ ಪ್ರಗತಿಯನ್ನು ಗಮನಿಸಿದ ಊರ ಜನರು ನಿಧಾನವಾಗಿ ಅವನನ್ನು ಅನುಸರಿಸಿದರು. ಹೀಗೆ ಆತ ಕೆಲವೇ ವರ್ಷಗಳಲ್ಲಿ ಊರಿಗೆ ನಾಯಕನಾಗಿ ಬದಲಾದ. ಹಳ್ಳಿಯೂ ಸ್ವಚ್ಛ, ಸ್ವತಂತ್ರ, ಸುಖದ ಬೀಡಾಗಿ ಬದಲಾಯಿತು. ಹೀಗೆ ಸಹೋದರ ಮೊದಲು ತನ್ನನ್ನು ತಾನು ಬದಲಿಸಿಕೊಂಡು ನಂತರ ಊರನ್ನು ಬದಲಿಸಿದ.
