ಬೆಂಗಳೂರು: ಲಾಕ್‌ಡೌನ್ ವೇಳೆ ಹಲವಾರು ಮಾಜಿ-ಹಾಲಿ ಕ್ರಿಕೆಟಿಗರು ತಮ್ಮದೇ ಕನಸಿನ ತಂಡಗಳನ್ನು ರಚಿಸುತ್ತಿದ್ದಾರೆ. ಕ್ರಿಕೆಟ್ ಪ್ರೇಮಿಗಳೂ ಇದರಿಂದ ಹೊರತಾಗಿಲ್ಲ. ಇದೇ ರೀತಿ ಅಭಿಮಾನಿಯೊಬ್ಬರು, ಅದೃಷ್ಟದ ಕೊರತೆಯಿಂದಾಗಿ ಐಪಿಎಲ್‌ನಲ್ಲಿ ಮಿಂಚಲು ವಿಲರಾಗಿರುವ ಕ್ರಿಕೆಟಿಗರ ‘ಫ್ಲಾಪ್ ಇಲೆವೆನ್’ ರಚಿಸಿದ್ದಾರೆ. ಬಂಗಾಳದ ಬ್ಯಾಟ್ಸ್‌ಮನ್ ಮನೋಜ್ ತಿವಾರಿ ಹೆಸರನ್ನೂ ಅದರಲ್ಲಿ ಸೇರಿಸಲಾಗಿದೆ. ಇದಕ್ಕೆ ಕೆರಳಿರುವ ಮನೋಜ್ ತಿವಾರಿ ಪತ್ನಿ ಸುಷ್ಮಿತಾ ರಾಯ್, ‘ನಿನಗೆಷ್ಟು ಧೈರ್ಯ?’ ಎಂದು ಗರಂ ಆಗಿದ್ದಾರೆ.
ಕ್ರಿಕೆಟ್ ಅಭಿಮಾನಿಯೊಬ್ಬನ ‘ಫ್ಯಾನ್ ಪೇಜ್’ನ ಸ್ಕ್ರೀನ್‌ಶಾಟ್‌ಅನ್ನು ಇನ್‌ಸ್ಟಾಗ್ರಾಂನಲ್ಲಿ ಪ್ರಕಟಿಸಿರುವ ಸುಷ್ಮಿತಾ ರಾಯ್, ‘ಈ ಪ್ರೊಫೈಲ್ ರಚಿಸಿರುವವನಿಗೆ ಎಷ್ಟು ಧೈರ್ಯ? ನನ್ನ ಪತಿಯ ಹೆಸರನ್ನು ಇದರಲ್ಲಿ ಸೇರಿಸಲಾಗಿದೆ. ನೀನು ಅಂಕಿ-ಅಂಶಗಳನ್ನು ಪರಿಶೀಲಿಸುವುದು ಉತ್ತಮ. ನಿನ್ನ ಕೆಟ್ಟ ಬದುಕಿನಲ್ಲಿ ಜನರ ಬಗ್ಗೆ ಈ ರೀತಿಯ ಪೋಸ್ಟ್‌ಗಳನ್ನು ಹಾಕುವ ಬದಲಾಗಿ ಆ ಕೆಲಸವನ್ನಾದರೂ ಮಾಡು. ಬದುಕಿಕೋ ಹೋಗು’ ಎಂದು ಬರೆದಿದ್ದಾರೆ.
ಇದನ್ನೂ ಓದಿ: ಮೊಹಮದ್ ಶಮಿ ಕಾರ್ಯಕ್ಕೆ ಬಿಸಿಸಿಐ ಮೆಚ್ಚುಗೆ
ದೇಶೀಯ ಕ್ರಿಕೆಟ್‌ನಲ್ಲಿ ಮಿಂಚಿದ್ದರೂ 34 ವರ್ಷದ ಮನೋಜ್ ತಿವಾರಿ ಭಾರತ ಪರ ಇದುವರೆಗೆ 12 ಏಕದಿನ ಮತ್ತು 3 ಟಿ20 ಪಂದ್ಯಗಳನ್ನಷ್ಟೇ ಆಡಿದ್ದಾರೆ. ಐಪಿಎಲ್‌ನಲ್ಲೂ ವಿವಿಧ ತಂಡಗಳ ಪರ ಆಡಿದ್ದರೂ, ಕಳೆದ ಹರಾಜಿನಲ್ಲಿ ಯಾವುದೇ ತಂಡಕ್ಕೆ ಬಿಕರಿಯಾಗಿರಲಿಲ್ಲ. 2018ರಿಂದ ಅವರು ಐಪಿಎಲ್‌ನಲ್ಲಿ ಯಾವುದೇ ತಂಡದ ಪರ ಆಡಿಲ್ಲ. ಆದರೆ ಈ ವರ್ಷ ರಣಜಿ ಟ್ರೋಫಿಯಲ್ಲಿ ಚೊಚ್ಚಲ ತ್ರಿಶತಕವನ್ನೂ ಸಿಡಿಸಿ ಮಿಂಚಿದ್ದ ಮನೋಜ್ ತಿವಾರಿ, ಬಂಗಾಳ ತಂಡ ಫೈನಲ್ ಪ್ರವೇಶಿಸುವಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದ್ದರು.