34 ವರ್ಷಗಳಿಂದ ಲಾಟರಿ ಖರೀದಿಸುತ್ತಲೇ ಇದ್ದವನಿಗೆ 2.5 ಕೋಟಿ ರೂ. ಬಂಪರ್​ ಬಹುಮಾನ!

ಪಂಜಾಬ್​: ಈತನಿಗೆ ಲಾಟರಿ ಖರೀದಿಸುವ ವ್ಯಸನ ಅಂಟಿಕೊಂಡಿದ್ದು, ನಿನ್ನೆ ಮೊನ್ನೆಯಿಂದಲ್ಲ. ಬರೋಬ್ಬರಿ 34 ವರ್ಷಗಳಿಂದಲೂ ಈತ ಲಾಟರಿ ಖರೀದಿಸುತ್ತಲೇ ಇದ್ದ. ಒಂದಲ್ಲ ಒಂದು ದಿನ ಬಂಪರ್ ಪ್ರೈಸ್​ ಬರುತ್ತೆ ಎಂಬ ವಿಶ್ವಾಸದಿಂದಲೇ ನಿರಂತರವಾಗಿ ಲಾಟರಿ ಖರೀದಿಸುತ್ತಿದ್ದ ಈತನಿಗೆ ಕೊನೆಗೂ ಕೋಟ್ಯಂತರ ರೂಪಾಯಿ ಬಹುಮಾನ ಬಂದಿದೆ.

ಪಂಜಾಬ್​ ಬತಿಂಡ ಜಿಲ್ಲೆಯ ರೋಷನ್​ ಸಿಂಗ್​ ಕೊನೆಗೂ ಲಾಟರಿಯಲ್ಲಿ ಬಂಪರ್​ ಪ್ರೈಸ್​ ಗೆದ್ದಿದ್ದು, ಪಂಜಾಬ್​ ರಾಜ್ಯದ ಡಿಯರ್ ಬೈಸಾಖಿ ಬಂಪರ್​ ಲಾಟರಿ 2022ರಲ್ಲಿ ಈತನಿಗೆ 2.5 ಕೋಟಿ ರೂ. ಬಂಪರ್ ಬಹುಮಾನ ಬಂದಿದೆ.

1987ರಲ್ಲಿ ಬಟ್ಟೆ ಅಂಗಡಿಯಲ್ಲಿ ಕೆಲಸಕ್ಕೆ ಸೇರಿದ್ದ ರೋಷನ್​, ಬಳಿಕ ಹಲವರ ಬಳಿ ಕೆಲಸ ಮಾಡಿ ಸ್ವಂತ ಬಟ್ಟೆ ಅಂಗಡಿ ಇರಿಸಿಕೊಂಡಿದ್ದ. 1988ರಿಂದಲೂ ಲಾಟರಿ ಖರೀದಿಸುತ್ತಲೇ ಇರುವ ರೋಷನ್​ಗೆ ಆಗಾಗ 100-200 ರೂ. ಬಹುಮಾನ ಬಂದಿದ್ದು ಬಿಟ್ಟರೆ ಹೆಚ್ಚಿಗೆ ಬಂದಿರಲಿಲ್ಲ. ಅದಾಗ್ಯೂ ಒಂದಲ್ಲ ಒಂದು ದಿನ ಬಂಪರ್ ಬರುತ್ತೆ, ಕಳೆದುಕೊಂಡಿದ್ದ ಹಣವೆಲ್ಲ ವಾಪಸ್​ ಸಿಗುತ್ತೆ ಅಂತ ಈತ ಲಾಟರಿ ಖರೀದಿ ಮುಂದುವರಿಸಿದ್ದ.

18 ವರ್ಷಗಳಿಂದ ಬಟ್ಟೆ ಅಂಗಡಿಯ ಮಾಲೀಕನಾಗಿ ದುಡಿಯುತ್ತಿದ್ದರೂ ಮನಸಿಗೆ ಬಂದಷ್ಟು ಖರ್ಚು ಮಾಡುವಷ್ಟು ಸಂಪಾದನೆ ಇಲ್ಲ ಎಂಬ ಕೊರಗು ರೋಷನ್​ಗಿತ್ತು. ಪತಿಯ ಲಾಟರಿ ಗೀಳು ತಪ್ಪಿಸಲು ಪತ್ನಿ ಸಾಕಷ್ಟು ಪ್ರಯತ್ನ ಮಾಡಿದರೂ ಫಲ ಕೊಟ್ಟಿರಲಿಲ್ಲ.

ಆದರೆ ಇತ್ತೀಚೆಗೆ ರಾಂಪುರ ಫುಲ್​ ಲಾಟರಿ ಸೆಂಟರ್​ನಿಂದ ರೋಷನ್​ಗೆ ಕರೆ ಬಂದಿದ್ದು, 2.5 ಕೋಟಿ ರೂ. ಬಹುಮಾನ ಬಂದಿರುವ ವಿಷಯ ತಿಳಿಯುತ್ತದೆ. ಒಂದಲ್ಲ ಒಂದು ದಿನ ದೊಡ್ಡ ಮೊತ್ತ ಬರುತ್ತೆ, ಕನಿಷ್ಠ 10 ಲಕ್ಷ ರೂ. ಬರುತ್ತೆ ಅಂದುಕೊಂಡಿದ್ದೆ. ಆದರೆ ದೇವರ ದಯೆಯಿಂದ ಬಂಪರ್​ ಬಹುಮಾನ ಬಂದಿವೆ. ಎಲ್ಲ ತೆರಿಗೆ ಕಳೆದು 1.75 ಕೋಟಿ ರೂ. ಸಿಕ್ಕಿದೆ, ಈ ಹಣ ತನ್ನ ಮೂವರು ಮಕ್ಕಳ ಭವಿಷ್ಯಕ್ಕೆ ಬಳಸುವುದಾಗಿ ರೋಷನ್ ಹೇಳಿದ್ದಾನೆ.

https://www.vijayavani.net/police-registered-3-cases-against-the-youth-who-romanced-on-moving-bike/

https://www.vijayavani.net/accident-while-taking-friends-dead-body-to-native-another-3-men-died-on-the-road/