ಮುಂಬೈ: ಗಂಡ ಹೆಂಡತಿ ಮಧ್ಯೆ ಜಗಳವಾಗುವುದಕ್ಕೆ ದೊಡ್ಡ ವಿಚಾರಗಳೇ ಬೇಕೆಂದೇನಿಲ್ಲ. ಸಣ್ಣ ಪುಟ್ಟ ವಿಚಾರಕ್ಕೂ ಜಗಳ ಆಗುತ್ತಲೇ ಇರುತ್ತದೆ. ಆದರೆ ಈ ದಂಪತಿಯ ಜಗಳಕ್ಕೆ ಕಾರಣ ಕೇಳಿದರೆ ನಿಮಗೆ ನಗು ಬರುವುದರಲ್ಲಿ ಡೌಟ್ ಇಲ್ಲ.
ಮಹಾರಾಷ್ಟ್ರದ ಬುಲ್ಖಾನಾ ಜಿಲ್ಲೆಯ ಸಖರ್ಖರ್ದಾ ಗ್ರಾಮದಲ್ಲಿ ಇಂತದ್ದೊಂದು ವಿಚಿತ್ರ ಘಟನೆ ನಡೆದಿದೆ. ಆ ಮನೆಯಲ್ಲಿ ಗಂಡ ಹೆಂಡತಿ ಹಾಗೂ ಅವರ ಮುದ್ದಿನ ಮಗಳು ವಾಸಿಸುತ್ತಿದ್ದಾರೆ. ಇತ್ತೀಚೆಗೆ ಗಂಡ ಮಾರ್ಕೆಟ್ನಿಂದ ಮೂರು ಮೊಟ್ಟೆ ತಂದು, ಎಗ್ ಬುರ್ಜಿ ಮಾಡು ಎಂದು ಹೆಂಡತಿಗೆ ಹೇಳಿದ್ದಾನೆ. ಇಲ್ಲೇ ಹೊರಗಡೆ ಹೋಗಿ ಬರ್ತೀನಿ ಅಷ್ಟರಲ್ಲಿ ಮಾಡಿಡು ಎಂದು ಹೇಳಿ ಹೊರಟುಹೋಗಿದ್ದಾನೆ.
ಗಂಡನ ಆಸೆಯಂತೆ ಮೂರು ಮೊಟ್ಟೆ ಹಾಕಿ ಹೆಂಡತಿ ಎಗ್ ಬುರ್ಜಿ ಮಾಡಿದ್ದಾಳೆ. ಅಷ್ಟರಲ್ಲಿ ಮಗಳು ಹಸಿವಾಗುತ್ತಿದೆ ಎಂದಿದ್ದು ಎಗ್ ಬುರ್ಜಿಯನ್ನು ಪೂರ್ತಿಯಾಗಿ ತಿಂದು ಮುಗಿಸಿದ್ದಾಳೆ. ಗಂಡನ ಬದಲು ಮಗಳು ತಿಂದಿದ್ದಾಳೆ ಬಿಡು ಎಂದು ಹೆಂಡತಿ ಸುಮ್ಮನಾಗಿದ್ದಾಳೆ. ಆದರೆ ಹಸಿದ ಹೊಟ್ಟೆಯಲ್ಲಿ ಮನೆಗೆ ಬಂದ ಗಂಡ ಎಗ್ ಬುರ್ಜಿ ಎಲ್ಲೆಂದು ಹುಡುಕಲಾರಂಭಿಸಿದ್ದಾನೆ. ಮಗಳು ತಿಂದು ಖಾಲಿ ಮಾಡಿದಳು ಎಂದು ಹೇಳಿದಾಗ ಸಿಟ್ಟಿನಿಂದ ಹೆಂಡತಿಯ ಮೇಲೆ ರೇಗಾಡಲಾರಂಭಿಸಿದ್ದಾನೆ. ಅವರಿಬ್ಬರ ಜಗಳ ಎಷ್ಟರ ಮಟ್ಟಿಗೆ ಹೋಗಿದೆಯೆಂದರೆ, ಇಬ್ಬರು ಜಗಳವಾಡಿಕೊಳ್ಳುತ್ತಲೇ ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದಾರೆ.
ದಂಪತಿ ತಮ್ಮ ಜಗಳವನ್ನು ಸಖರ್ಖರ್ದಾ ಪೊಲೀಸ್ ಅಧಿಕಾರಿಗಳ ಮುಂದೆ ಹೇಳಿಕೊಂಡಿದ್ದಾರೆ. ಜಗಳದ ಕಾರಣ ಕೇಳುತ್ತಲೇ ಅಧಿಕಾರಿಗಳು ಬಿದ್ದು ಬಿದ್ದು ನಗಲಾರಂಭಿಸಿದ್ದಾರೆ. ನಕ್ಕು ಸುಧಾರಿಸಿಕೊಂಡ ನಂತರ, ಒಬ್ಬ ಸಿಬ್ಬಂದಿ ಅಂಗಡಿಗೆ ಹೋಗಿ ಮೂರು ಮೊಟ್ಟೆಗಳನ್ನು ತಂದು ದಂಪತಿಯ ಕೈಗೆ ಕೊಟ್ಟಿದ್ದಾನೆ. ಮೊಟ್ಟೆ ಸಿಕ್ಕ ಖುಷಿಯಲ್ಲಿ ದಂಪತಿ ಮನೆಗೆ ತೆರಳಿದ್ದಾರೆ. (ಏಜೆನ್ಸೀಸ್)
106ನೇ ವಯಸ್ಸಿಗೆ 6ನೇ ಆಲ್ಬಂ ರಿಲೀಸ್ ಮಾಡ್ತಿದ್ದಾರೆ ಈ ವೃದ್ಧೆ! ಈಕೆಯ ಬದುಕೇ ಸ್ಫೂರ್ತಿ
ಡೆತ್‌ನೋಟ್‌ನಲ್ಲಿ ಹೀಗೇಕೆ ಬರೆದರು ಧರ್ಮೇಗೌಡ? ಪೊಲೀಸರೂ ಭೇದಿಸಲಾಗದ ರಹಸ್ಯವಿದು!