ತೂಕ ಎತ್ತುವ ಸಂದರ್ಭ ನಿಮ್ಮ ಕೆಳಬೆನ್ನಿನಲ್ಲಿ ಮತ್ತು ಎಡಗಾಲು ನೋವು ಉಂಟಾಗಿದೆ. ಬೆನ್ನುಮೂಳೆಯ ಸುತ್ತಲಿನ ಮಾಂಸಖಂಡ ಹಾಗೂ ನರಗಳಿಗೆ ಅತಿ ಒತ್ತಡ ಉಂಟಾಗಿ ನೋವು ಬಂದಿದೆ. ಇದಕ್ಕೆ ಆರಂಭದಲ್ಲಿ ವಿಶ್ರಾಂತಿ ನೀಡಬೇಕಿತ್ತು. ನರಗಳ ಬಲ ಹೆಚ್ಚಿಸುವ ಆಸನಗಳನ್ನು ಮಾತ್ರ ನಿಧಾನವಾಗಿ ಯೋಗ ಚಿಕಿತ್ಸಕರದ ಮುಖಾಂತರ ಕಲಿತು ಅಭ್ಯಾಸ ಮಾಡಿ. ಮುಂದಕ್ಕೆ ಬಾಗುವ ಆಸನಗಳನ್ನು ಅಭ್ಯಾಸ ಮಾಡುವುದು ಬೇಡ. ಆರಂಭದಲ್ಲಿ ಮಲಗಿಕೊಂಡು ಒಂದೊಂದು ಕಾಲನ್ನು ಎತ್ತುವ ಉತ್ಥಿತ ಏಕಪಾದಾಸನವನ್ನು 6ರಿಂದ 9 ಬಾರಿ ಮಾಡಿ. ತಿರುಚುವಿಕೆಯ ಮತ್ತು ಇತರ ಆಸನಗಳನ್ನು (ಭರದ್ವಾಜಸನ, ವಕ್ರಾಸನ, ಕಟಿಚಕ್ರಾಸನ, ಅರ್ಧಕಟಿಚಕ್ರಾಸನ, ಮಾರ್ಜಾಲಾಸನ, ಮಕರಾಸನ, ಬಾಲಾಸನ, ಶಲಭಾಸನ ಕೊನೆಯಲ್ಲಿ ಶವಾಸನ ಸಹಕಾರಿ. ಕುರ್ಚಿಯಲ್ಲಿ ಕುಳಿತು ಮುಂಜಾನೆ ತಲಾ ಹತ್ತು ನಿಮಿಷ ಪ್ರಾಣಾಯಾಮ, ಧ್ಯಾನ ಅಭ್ಯಾಸ ಮಾಡಿ. ಬಿಡುವಿನ ವೇಳೆಯಲ್ಲಿ ತಲಾ ಇಪ್ಪತ್ತು ನಿಮಿಷ ವಾಯುಶೂನ್ಯಮುದ್ರೆ ಹಾಗೂ ಪ್ರಾಣಮುದ್ರೆ ಮಾಡಿ. ಸಂಜೆ ಹೊತ್ತು ನೋವು ಇರುವ ಭಾಗಕ್ಕೆ ಸ್ವಲ್ಪ ಬಿಸಿ ಎಳ್ಳೆಣ್ಣೆಯನ್ನು ಹಚ್ಚಿ ಒಂದು ತಾಸು ಬಿಡಿ.
