ಶೀತ, ಕೆಮ್ಮು, ಅಲರ್ಜಿ ನಿಯಂತ್ರಣಕ್ಕೆ ಯೋಗ ಮುದ್ರೆ

ಶೀತ ಅಲರ್ಜಿಯ ತೊಂದರೆಗಳು

ಋತುಮಾನಗಳು ಬದಲಾದಂತೆ ಅನೇಕರು ವಿವಿಧ ರೀತಿಯ ಅಲರ್ಜಿಯ ಸ್ಥಿತಿಗಳಿಗೆ ಬಲಿಯಾಗುತ್ತಾರೆ. ನೇರ ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳುವುದು, ಹೂವುಗಳಿಂದ ಬರುವ ಪರಾಗ, ಮೊಳಕೆಯೊಡೆಯುವ ಮರಗಳು, ಹೂವುಗಳು ಅಥವಾ ಹಣ್ಣುಗಳ ಲ್ಯಾಟೆಕ್ಸ್ ಅಥವಾ ಧೂಳು ಅಲರ್ಜಿಗಳನ್ನು ನಮ್ಮಲ್ಲಿ ಹೆಚ್ಚಿನವರು ಸಾಮಾನ್ಯವಾಗಿ ಅನುಭವಿಸುತ್ತಾರೆ. ವೈದ್ಯಕೀಯವಾಗಿ ಜ್ವರ ಎಂದು ಕರೆಯಲ್ಪಡುವ ಅಲರ್ಜಿಕ್ ರಿನಿಟಿಸ್ ಒಬ್ಬ ವ್ಯಕ್ತಿಯು ಕೆಲವು ಅಲರ್ಜಿನ್ ಅಥವಾ ವಿದೇಶಿ ಕಣಗಳಿಗೆ ಒಡ್ಡಿಕೊಂಡಾಗ ಸಂಭವಿಸುವ ಸಾಮಾನ್ಯ ಅಲರ್ಜಿಯ ಸ್ಥಿತಿಯಾಗಿದೆ. ಮಾನವ ದೇಹವು ಹಿಸ್ಟಮೈನ್​ಗಳನ್ನು ಉತ್ಪಾದಿಸುವ ಮೂಲಕ ತನ್ನನ್ನು ತಾನು ರಕ್ಷಿಸಿಕೊಳ್ಳಲು ಪ್ರಯತ್ನಿಸುತ್ತದೆ.

ದೇಹದಿಂದ ಬಿಡುಗಡೆಯಾಗುವ ಈ ರಾಸಾಯನಿಕವು ಸಾಮಾನ್ಯವಾಗಿ ಮೂಗಿನ ಮಾರ್ಗದ ಉರಿಯೂತ, ಕಣ್ಣುಗಳ ಸೂಕ್ಷ್ಮತೆ ಅಥವಾ ಕೆಂಪಾಗುವಿಕೆ, ಊತ, ಮೂಗಲ್ಲಿ ನೀರು ಬರುವುದು, ಗಂಟಲು ನೋವು, ಕಪ್ಪು ವರ್ತಲಗಳು, ತಲೆನೋವು, ಸೀನುವಿಕೆ, ಕೆಮ್ಮು, ಚರ್ಮದ ಗುಳ್ಳೆಗಳು ಮತ್ತು ಆಯಾಸದಿಂದ ನಿರೂಪಿಸಲ್ಪಟ್ಟಿದೆ. ಧೂಳು, ಪರಾಗ, ಲ್ಯಾಟೆಕ್ಸ್ ಮುಂತಾದ ಸಾಮಾನ್ಯ ಅಲರ್ಜಿನ್​ಗಳ ಹೊರತಾಗಿ ಅನಾರೋಗ್ಯಕರ ಆಹಾರ, ಒತ್ತಡ ಮತ್ತು ಪರಿಸರದ ಅಂಶಗಳಿಂದಾಗಿ ಅಲರ್ಜಿಕ್ ರಿನಿಟಿಸ್ ಸಹ ಸಂಭವಿಸಬಹುದು. ಮೊದಲಿಗೆ ಅಲರ್ಜಿಯ ಕಿರಿಕಿರಿ ಲಕ್ಷಣ ಎಲ್ಲಿಂದ ಬರುತ್ತದೆ ಎಂದು ಕಂಡು ಹಿಡಿಯಲು ಪ್ರಯತ್ನಿಸಿ ಮತ್ತು ವೈದ್ಯರೊಂದಿಗೆ ಸಮಾಲೋಚಿಸಿ.

ಅಲರ್ಜಿಯ ನಿಯಂತ್ರಣಕ್ಕೆ ಯೋಗ

ಬಹುತೇಕ ಎಲ್ಲಾ ಪರಿಸ್ಥಿತಿಗಳಿಗೆ ಯೋಗವು ಸಂಪೂರ್ಣ ನೈಸರ್ಗಿಕ ನಿಯಂತ್ರಣವನ್ನು ನೀಡುತ್ತದೆ. ಕೆಲವು ಯೋಗ ಭಂಗಿಗಳನ್ನು ಪರಿಣಾಮಕಾರಿಯಾಗಿ ಅಭ್ಯಾಸ ಮಾಡಿದಾಗ ಉಸಿರಾಟವನ್ನು ಸುಧಾರಿಸುತ್ತದೆ ಮತ್ತು ದೇಹವನ್ನು ಅಲರ್ಜಿಗಳ ವಿರುದ್ಧ ಪ್ರತಿರಕ್ಷಿಸುತ್ತದೆ ಮಾತ್ರವಲ್ಲದೆ ಶ್ವಾಸಕೋಶದ ಸ್ನಾಯುಗಳನ್ನು ಬಲಪಡಿಸುತ್ತದೆ. ಮಾನಸಿಕ ಸ್ಥಿತಿಯನ್ನು ಹೆಚ್ಚಿಸುತ್ತದೆ ಮತ್ತು ತ್ರಾಣವನ್ನು ಉತ್ತೇಜಿಸುತ್ತದೆ. ಯೋಗ ಪ್ರಾಣಾಯಾಮವು, ಉಸಿರಾಟವನ್ನು ಸುಧಾರಿಸುವುದು ಮಾತ್ರವಲ್ಲದೆ ಶರೀರದ ಆಂತರಿಕ ಕಾರ್ಯವನ್ನು ಸುಧಾರಿಸುತ್ತದೆ. ಮಾನಸಿಕ ಸ್ಥಿತಿ ಉತ್ತಮಗೊಳ್ಳುತ್ತದೆ. ದೇಹದಲ್ಲಿ ಪ್ರತಿರಕ್ಷಣಾ ವ್ಯವಸ್ಥೆ ಅಥವಾ ರೋಗ ನಿರೋಧಕ ವ್ಯವಸ್ಥೆ ಬಲಗೊಳ್ಳಲು ಯೋಗ, ಪ್ರಾಣಾಯಾಮ ಸಹಕಾರಿಯಾಗಿದೆ.

ಯೋಗಾಸನಗಳಿಂದ ದೇಹದ ಒಳಗಿನ ಅಂಗಕ್ಕೆ ವ್ಯಾಯಾಮ ದೊರಕಿ, ರಕ್ತ ಸಂಚಲನೆ ಸುಗಮವಾಗಿ ರಕ್ತ ಶುದ್ಧಿಯಾಗುತ್ತದೆ. ಪ್ರಾಣಾಯಾಮದಿಂದ ಶ್ವಾಸಕೋಶದ ಸಾಮರ್ಥ್ಯ ಹೆಚ್ಚಾಗುತ್ತದೆ. ಮೂಗಿನ ವಾಯು ಸಂಚಾರದ ಮಾರ್ಗ ಬಲಗೊಂಡು ಶ್ವಾಸನಾಳಗಳು ಆರೋಗ್ಯಕರವಾಗುತ್ತವೆ. ಅದರಲ್ಲಿ ಮುಖ್ಯವಾಗಿ ಉಸಿರಾಟದ ವ್ಯಾಯಾಮ, ಮೊಲ ಉಸಿರಾಟ (ಶಶಾಂಕಾಸನ) ಅಲರ್ಜಿ ಶೀತವನ್ನು ನಿಯಂತ್ರಿಸುತ್ತದೆ. ಇಲ್ಲಿ ಹೆಚ್ಚಿನ ಆಮ್ಲಜನಕವನ್ನು ಶ್ವಾಸಕೋಶ ಹೀರಿಕೊಳ್ಳುತ್ತದೆ. ಶ್ವಾಸಕೋಶದ ಸಮಸ್ಯೆಗಳು, ಉಸಿರಾಟದ ತೊಂದರೆಗಳನ್ನು ನಿಯಂತ್ರಿಸಲು, ಅಲರ್ಜಿಯ ಸ್ಥಿತಿಗಳಿಂದ ಪರಿಹಾರ ನೀಡುವ ಸುಲಭ ಯೋಗಾಸನ ಭಂಗಿಗಳು.

ಆಸನಗಳಲ್ಲಿ ಅರ್ಧಚಕ್ರಾಸನ, ಪಾದ ಹಸ್ತಾಸನ, ವಜ್ರಾಸನ, ಶಶಾಂಕಾಸನ, ಉಷ್ಟ್ರಾಸನ, ವಕ್ರಾಸನ, ಪವನಮುಕ್ತಾಸನ, ಸೇತುಬಂಧ ಸರ್ವಾಂಗಾಸನ, ವಿಪರೀತಕರಣೀ ಅಧೋಮುಖ ಶ್ವಾನಾಸನ, ಅರ್ಧಚಂದ್ರಾಸನ, ವೀರಭದ್ರ್ರಾಸನ-1, ತ್ರಿಕೋಣಾಸನ, ಶವಾಸನ ಸಹಕಾರಿಯಾಗುತ್ತದೆ.

ಪ್ರಾಣಾಯಾಮ : ನಾಡೀಶುದ್ಧಿ ಪ್ರಾಣಾಯಾಮ, ಉಜ್ಜಯೀ ಪ್ರಾಣಾ ಯಾಮ, ಸೂರ್ಯನುಲೋಮ, ಸುಖ ಪ್ರಾಣಾಯಾಮ ಇತ್ಯಾದಿ.

ಕ್ರಿಯೆಗಳು: ಶುದ್ಧೀಕರಣಕ್ಕಾಗಿ, ಕಪಾಲಬಾತಿ, ಜಲನೇತಿ, ಸೂತ್ರನೇತಿ ಯಿಂದ ಶೀತ ಅಲರ್ಜಿಯನ್ನು ಹತೋಟಿಯಲ್ಲಿಡಬಹುದು.

ಮುದ್ರೆಗಳಲ್ಲಿ ಪ್ರಾಣಮುದ್ರೆ, ಚಿನ್​ಮುದ್ರೆ, ಅದಿತಿಮುದ್ರೆ, ಸಹಜ ಶಂಖಮುದ್ರೆ, ಶಂಖ ಮುದ್ರೆ, ಭ್ರಮರ ಮುದ್ರೆ, ಸೂರ್ಯಮುದ್ರೆ, ಲಿಂಗ ಮುದ್ರೆ. ಯೋಗ, ಮುದ್ರೆಗಳನ್ನು ಗುರುಮುಖೇನವೇ ಕಲಿತು ಅಭ್ಯಾಸ ಮಾಡಿ. ಆದ್ದರಿಂದ ಶೀತ ಕೆಮ್ಮು, ಅಲರ್ಜಿಯಿಂದ ಬಳಲುತ್ತಿರುವವರು ವೈದ್ಯರ ತಪಾಸಣೆ, ಉಪಚಾರದೊಂದಿಗೆ, ಅಗತ್ಯ ವ್ಯಾಯಾಮ, ಸೂರ್ಯ ನಮಸ್ಕಾರ, ಯೋಗ ಮುದ್ರೆ, ಪ್ರಾಣಾಯಾಮವನ್ನು ನಿತ್ಯ ಅಭ್ಯಾಸ ಮಾಡಿದರೆ ಪ್ರಯೋಜನವಾಗುವುದು.

https://www.vijayavani.net/tamannaah-open-talk-about-netizens-troll