ಅಪ್ಪಟ ಭಾರತೀಯ ಮೂಲದ ಫಲ ಬೇಲದ ಹಣ್ಣು. ಈ ಹಣ್ಣಿಗೆ ಕನ್ನಡದಲ್ಲಿ ಬೇಲ, ಬ್ಯಾಲ, ಬಳೂಲ, ಬೆಳವಲ ಮುಂತಾದ ಹೆಸರುಗಳಿವೆ. ಸಂಸ್ಕೃತದಲ್ಲಿ ದಂತಫಲ, ಗಂಧಫಲ, ಗೋಪಕರ್ಣ, ಗ್ರಂಥಿಫಲ, ಕಪಿಪ್ರಿಯ, ಕಪಿತ್ಥ, ಮನ್ಮಥ ಎಂಬ ಹೆಸರುಗಳಿವೆ. ಭಾರತದೇಶವನ್ನು ಬಿಟ್ಟರೆ ಶ್ರೀಲಂಕಾ, ಬಾಂಗ್ಲಾ, ಚೀನಾ ಹಾಗೂ ದಕ್ಷಿಣ ಏಷ್ಯದ ಕೆಲವು ದೇಶಗಳಲ್ಲಿಯೂ ಇದು ಕಂಡುಬರುತ್ತದೆ. ಮಧ್ಯಮ ಗಾತ್ರದಿಂದ ದೊಡ್ಡ ಗಾತ್ರದವರೆಗಿರವ ಇದರ ಹಣ್ಣುಗಳು ಗೋಲಾಕಾರದಲ್ಲಿರುತ್ತವೆ. ಹಣ್ಣಿನ ಮೇಲ್ಭಾಗ ಒರಟಾಗಿದ್ದು ಬೂದುಬಣ್ಣವನ್ನು ಹೊಂದಿದ್ದರೆ, ಕರಟದ ಭಾಗವು ಗಡುಸಾಗಿರುತ್ತದೆ. ಅದನ್ನು ಕತ್ತರಿಸಿದಲ್ಲಿ ವಿಶಿಷ್ಟ ವಾಸನೆಯ ಸಿಹಿ-ಹುಳಿ ಮಿಶ್ರಣದ ಮೃದು ತಿರುಳಿದ್ದು, ಅದರಲ್ಲಿ ಅನೇಕ ಸಣ್ಣ ಬೀಜಗಳಿರುತ್ತವೆ. ಹಣ್ಣು ನೋಡಲು ಬಿಲ್ವದ ಹಣ್ಣನ್ನು ಹೋಲುತ್ತದೆ.
