ಕೆಲವರು ಬಾಯಿಯ ದುರ್ವಾಸನೆಯಿಂದ ಮುಜುಗರಕ್ಕೆ ಒಳಗಾಗುತ್ತಿದ್ದರೂ ದಂತವೈದ್ಯರನ್ನು ಭೇಟಿ ಮಾಡಲು ಹಿಂಜರಿಯುತ್ತಿರುತ್ತಾರೆ. ಇದು ಹಲ್ಲುಹುಳುಕು, ನಾಲಗೆ ಮೇಲಿನ ಲೇಪನ, ವಸಡಿನ ಕಾಯಿಲೆ ಅಥವಾ ಹಲ್ಲಿನ ಕೀವಿನಿಂದಾಗಿಯೂ ಇರಬಹುದು. ಯಾವುದೇ ಹಂತದಲ್ಲಿ ಚಿಕಿತ್ಸೆ ಪಡೆಯಬಹುದಾದರೂ ಆರಂಭಿಕ ಹಂತದಲ್ಲಿ ಚಿಕಿತ್ಸೆ ತೆಗೆದುಕೊಳ್ಳುವುದರಿಂದ ಚಿಕಿತ್ಸೆಯು ಸರಳ ಹಾಗೂ ವೇದನಾರಹಿತವಾಗಿರುತ್ತದೆ. ಕೆಲವರು ಯಾವುದೋ ಕಾರಣಕ್ಕಾಗಿ ಹಲ್ಲುಗಳನ್ನು ತೆಗೆಸಿ ಅದನ್ನು ಮತ್ತೆ ಕಟ್ಟಿಸದೆ ಹಾಗೆಯೇ ಬಿಟ್ಟಿರುತ್ತಾರೆ. ಇದರಿಂದ ಆರಂಭಿಕ ಹಂತದಲ್ಲಿ ಯಾವುದೇ ರೀತಿಯ ತೊಂದರೆಯಾಗದಿದ್ದರೂ ಕ್ರಮೇಣ ಅಕ್ಕಪಕ್ಕದ ಹಲ್ಲುಗಳು ಆ ಜಾಗದತ್ತ ಜರುಗುತ್ತವೆ. ಇದರಿಂದ ಮೂಳೆಗಳು ಸವೆಯುತ್ತವೆ.
