ಡಿ.25ರ ಕ್ರಿಸ್​ಮಸ್​ ಹಬ್ಬವನ್ನು ರಷ್ಯನ್ನರೇಕೆ ಜನವರಿ 7ರಂದು ಆಚರಿಸುತ್ತಾರೆ? ಇಲ್ಲಿದೆ ಉತ್ತರ... Christmas

ಕ್ರಿಸ್​​ಮಸ್​: ಪ್ರಪಂಚದ ಹೆಚ್ಚಿನ ಭಾಗವು ಡಿಸೆಂಬರ್ 25 ರಂದು ಕ್ರಿಸ್‌ಮಸ್ (Christmas) ಆಚರಿಸಿದರೆ, ರಷ್ಯಾ, ಉಕ್ರೇನ್, ಸೆರ್ಬಿಯಾ ಮತ್ತು ಇತರ ದೇಶಗಳು ಜನವರಿ 7 ರಂದು ಹಬ್ಬವನ್ನು ಆಚರಿಸುತ್ತವೆ. ಈ ವ್ಯತ್ಯಾಸವು ಪ್ರಪಂಚದ ಹೆಚ್ಚಿನ ಜನಗಳನ್ನು ಆಶ್ಚರ್ಯಗೊಳಿಸುತ್ತದೆ. ಆದರೆ ಇದು ಸಾಂಸ್ಕೃತಿಕ ಕಾಕತಾಳೀಯವಲ್ಲ, ಬದಲಿಗೆ ಇದು ಸಂಕೀರ್ಣವಾದ ಇತಿಹಾಸ ಮತ್ತು ದಿನಾಂಕಗಳನ್ನು ಎಣಿಸುವ ವಿಧಾನವನ್ನು ಮರುರೂಪಿಸಿದ ಫಲಶ್ರುತಿಯಾಗಿದೆ.

ಜೂಲಿಯನ್ ಕ್ಯಾಲೆಂಡರ್​ನ್ನು ಕ್ರಿ.ಪೂ. 45 ರಲ್ಲಿ ಜೂಲಿಯಸ್ ಸೀಸರ್ ಪರಿಚಯಿಸಿದ್ದು, ಇದು ಸುಮಾರು 1,500 ವರ್ಷಗಳಿಗೂ ಹೆಚ್ಚು ಕಾಲ ಯುರೋಪಿನಾದ್ಯಂತ ಬಳಕೆಯಲ್ಲಿತ್ತು. ಈ ಕ್ಯಾಲೆಂಡರ್​ನಲ್ಲಿ ಒಂದು ವರ್ಷವನ್ನು 365 ದಿನಗಳು ಮತ್ತು 6 ಗಂಟೆಗಳಾಗಿ ಲೆಕ್ಕಹಾಕಲಾಯಿತು. ಪ್ರತಿ ನಾಲ್ಕು ವರ್ಷಗಳಿಗೊಮ್ಮೆ, ಹೆಚ್ಚುವರಿ ಗಂಟೆಗಳು ಹೆಚ್ಚುವರಿ ದಿನವನ್ನು ರೂಪಿಸಿ, 366 ದಿನಗಳ ಅಧಿಕ ವರ್ಷವನ್ನು ಸೃಷ್ಟಿಸುತ್ತಿತ್ತು.

1582 ರಲ್ಲಿ, ಪೋಪ್ ಗ್ರೆಗೊರಿ XIII ಒಂದು ಪ್ರಮುಖ ಸುಧಾರಣೆಯನ್ನು ಪರಿಚಯಿಸಿ ಅದನ್ನು ಗ್ರೆಗೋರಿಯನ್ ಕ್ಯಾಲೆಂಡರ್ ಎಂದು ಕರೆದರು. ಹೊಸ ವ್ಯವಸ್ಥೆಯು ಅಧಿಕ ವರ್ಷದ ನಿಯಮವನ್ನು ಸರಿಹೊಂದಿಸಿ,ಪ್ರತಿ 400 ವರ್ಷಗಳ ಚಕ್ರದಲ್ಲಿ ಅಧಿಕ ವರ್ಷಗಳ ಸಂಖ್ಯೆಯನ್ನು 100 ರಿಂದ 97 ಕ್ಕೆ ಇಳಿಸಿತು. ಇದು 11 ನಿಮಿಷಗಳ ದೋಷವನ್ನು ಗಣನೆಗೆ ತೆಗೆದುಕೊಂಡಿತು. ಯುರೋಪಿನ ಕ್ಯಾಥೊಲಿಕ್ ದೇಶಗಳು ಈ ಸರಿಪಡಿಸಿದ ಕ್ಯಾಲೆಂಡರ್ ಅನ್ನು ತ್ವರಿತವಾಗಿ ಅಳವಡಿಸಿಕೊಂಡವು.

ರಷ್ಯಾದಲ್ಲಿ ಕ್ರಿಸ್‌ಮಸ್ ಹಬ್ಬವನ್ನು ಜನವರಿ 7ರಂದು ಆಚರಿಸುವುದಕ್ಕೆ ಪ್ರಮುಖ ಕಾರಣ ಕ್ಯಾಲೆಂಡರ್‌ಗಳ ವ್ಯತ್ಯಾಸ ಮತ್ತು ಆ ದೇಶದ ಧಾರ್ಮಿಕ ಪರಂಪರೆ. ರಷ್ಯಾದ ಬಹುಸಂಖ್ಯಾತ ಕ್ರೈಸ್ತರು ರಷ್ಯನ್ ಆರ್ಥಡಾಕ್ಸ್ ಚರ್ಚ್‌ಗೆ ಸೇರಿದ್ದು, ಈ ಚರ್ಚ್ ಇಂದಿಗೂ ಹಳೆಯ ಜೂಲಿಯನ್ ಕ್ಯಾಲೆಂಡರ್ ಅನ್ನು ಧಾರ್ಮಿಕ ಹಬ್ಬಗಳಿಗಾಗಿ ಬಳಸುತ್ತದೆ.

ಗ್ರೆಗೋರಿಯನ್ ಕ್ಯಾಲೆಂಡರ್ ಜೂಲಿಯನ್ ಕ್ಯಾಲೆಂಡರ್‌ಗಿಂತ ಹೆಚ್ಚು ನಿಖರವಾಗಿದ್ದು, ಎರಡರ ನಡುವೆ ಪ್ರಸ್ತುತ ಸುಮಾರು 13 ದಿನಗಳ ವ್ಯತ್ಯಾಸ ಇದೆ. ಅಂದರೆ ಜೂಲಿಯನ್ ಕ್ಯಾಲೆಂಡರ್‌ನಲ್ಲಿ ಡಿಸೆಂಬರ್ 25 ಎಂದು ಲೆಕ್ಕಿಸುವ ದಿನ, ಗ್ರೆಗೋರಿಯನ್ ಕ್ಯಾಲೆಂಡರ್‌ನಲ್ಲಿ ಜನವರಿ 7ಕ್ಕೆ ಬರುತ್ತದೆ. ಪಶ್ಚಿಮ ದೇಶಗಳ ಬಹುಪಾಲು ಚರ್ಚ್‌ಗಳು ಗ್ರೆಗೋರಿಯನ್ ಕ್ಯಾಲೆಂಡರ್​ನ್ನು ಅಂಗೀಕರಿಸಿದ ಕಾರಣ ಅವರು ಕ್ರಿಸ್‌ಮಸ್​ನ್ನು ಡಿಸೆಂಬರ್ 25ರಂದು ಆಚರಿಸುತ್ತಾರೆ. ಆದರೆ ರಷ್ಯನ್ ಆರ್ಥಡಾಕ್ಸ್ ಚರ್ಚ್ ತನ್ನ ಹಳೆಯ ಧಾರ್ಮಿಕ ಸಂಪ್ರದಾಯಗಳನ್ನು ಕಾಪಾಡಿಕೊಳ್ಳಲು ಜೂಲಿಯನ್ ಕ್ಯಾಲೆಂಡರ್‌ನನ್ನೇ ಮುಂದುವರಿಸಿದೆ.

1918ರಲ್ಲಿ ರಷ್ಯಾ ಸರ್ಕಾರ ಅಧಿಕೃತವಾಗಿ ಗ್ರೆಗೋರಿಯನ್ ಕ್ಯಾಲೆಂಡರ್‌ಗೆ ಬದಲಾಯಿಸಿತು. ಆದರೆ ಸರ್ಕಾರ ಕ್ಯಾಲೆಂಡರ್ ಬದಲಿಸಿದರೂ, ಧಾರ್ಮಿಕ ಆಚರಣೆಗಳಲ್ಲಿ ಚರ್ಚ್‌ಗೆ ಸ್ವಾತಂತ್ರ್ಯ ನೀಡಲಾಯಿತು. ಹೀಗಾಗಿ ರಷ್ಯಾದಲ್ಲಿ ಸರ್ಕಾರಿ ಕೆಲಸಗಳು ಮತ್ತು ದೈನಂದಿನ ಜೀವನ ಗ್ರೆಗೋರಿಯನ್ ಕ್ಯಾಲೆಂಡರ್ ಪ್ರಕಾರ ನಡೆಯುತ್ತವೆ. ಆದರೆ ಕ್ರಿಸ್‌ಮಸ್, ಈಸ್ಟರ್ ಮುಂತಾದ ಧಾರ್ಮಿಕ ಹಬ್ಬಗಳು ಜೂಲಿಯನ್ ಕ್ಯಾಲೆಂಡರ್ ಪ್ರಕಾರ ಆಚರಿಸಲಾಗುತ್ತವೆ. ಈ ಕಾರಣದಿಂದಲೇ ರಷ್ಯಾದ ಕ್ರಿಸ್‌ಮಸ್ ಜನವರಿ 7ರಂದು ಬರುತ್ತದೆ.

ರಷ್ಯಾದಲ್ಲಿ ಹೊಸ ವರ್ಷವಾದ ಜನವರಿ 1ನ್ನು ದೊಡ್ಡ ಹಬ್ಬವಾಗಿ ಆಚರಿಸಿದರೂ, ಕ್ರಿಸ್‌ಮಸ್ ಧಾರ್ಮಿಕವಾಗಿ ಬಹಳ ಮಹತ್ವ ಹೊಂದಿದೆ. ಈ ರೀತಿಯಾಗಿ, ಕ್ಯಾಲೆಂಡರ್‌ಗಳ ವ್ಯತ್ಯಾಸ, ಇತಿಹಾಸ ಮತ್ತು ರಷ್ಯನ್ ಆರ್ಥಡಾಕ್ಸ್ ಚರ್ಚ್‌ನ ಹಳೆಯ ಪರಂಪರೆಯ ಕಾರಣದಿಂದ ರಷ್ಯಾದಲ್ಲಿ ಕ್ರಿಸ್‌ಮಸ್ ಅನ್ನು ಜನವರಿ 7ರಂದು ಆಚರಿಸಲಾಗುತ್ತದೆ,(ಏಜನ್ಸೀಸ್).