ಎಂದು ಹಿರಿಯರು ಹೇಳುವಂತೆ, ನಾವೆಲ್ಲ ಆಟವಾಡುವ ಬೊಂಬೆಗಳಾದರೆ, ಮೇಲೆ ನಿಂತು ಆಟ ಆಡಿಸುವವನು ಭಗವಂತ. ‘ಕ್ರೀಡಾರ್ಥಮಾತ್ಮನ ಇದಂ ತ್ರಿಜಗತ್ ಕೃತಂ ತೇ’ ಎಂಬುದಾಗಿ ಬಲಿಚಕ್ರವರ್ತಿಯ ಹೆಂಡತಿ ವಿಂಧ್ಯಾವಲೀ ಇದೇ ಮಾತನ್ನು ಹೇಳಿದ್ದಾಳೆ. ಭಗವಂತನ ಕೃಪೆ ಇದ್ದರೆ ಎಲ್ಲವೂ ಸುಗಮ. ಭಗವಂತನ ಕೃಪೆ, ದೃಷ್ಟಿ ಇರುವವರೆಗೂ ಗೆಲುವು ದೊರೆಯುತ್ತಿರುತ್ತದೆ. ಸೋಲು ಸನಿಹಕ್ಕೂ ಸುಳಿಯುವುದಿಲ್ಲ. ಬಾಹ್ಯ, ಆಂತರಿಕ ಶತ್ರುಗಳು ನಾಶವಾಗುತ್ತಾರೆ. ಅದೇ ಭಗವಂತನ ಕೃಪೆ ತಪ್ಪಿದರೆ ಸಣ್ಣ ಕಾರ್ಯವೂ ದುರ್ಗಮವೇ. ಅರ್ಜುನನಿಗೆ ಆದಂತೆ ಗೆಲುವು ದೂರವಾಗಿ, ಸೋಲು ಆವರಿಸಿಕೊಳ್ಳುತ್ತದೆ. ಇದು ಎಲ್ಲರ ಜೀವನದಲ್ಲಿಯೂ ಬರುವಂತಹ ಅನುಭವ. ಇದೇ ಭಗವಂತನ ಸ್ವಾತಂತ್ರ್ಯ. ಅದನ್ನು ಅರಿತು ‘ನಾನು ದೊಡ್ಡವ’, ‘ನಾನು ಶ್ರೀಮಂತ’, ‘ನಾನು ಅಧಿಕಾರಿ’ ಇತ್ಯಾದಿ ಅಹಂಕಾರಗಳನ್ನು ಬದಿಗೊತ್ತಿ, ಆ ದೈವಕ್ಕೆ ಶರಣು ಹೋಗುವುದು ವಿವೇಕ. ಭಗವಂತನ ಕೃಪೆ ಇದ್ದಲ್ಲಿ ಎಲ್ಲವೂ ಸಾಧ್ಯ ಎಂಬ ಸತ್ಯವನ್ನು ಮನಗಾಣೋಣ. ಅಹಂಕಾರ, ಒಣ ಪ್ರತಿಷ್ಠೆ, ದೊಡ್ಡಸ್ತಿಕೆಯನ್ನೆಲ್ಲ ತೊರೆದು, ಹೃದಯದಲ್ಲಿ ಭಗವಂತನ ವಾಸವಾಗಲಿ ಎಂದು ಪ್ರಾರ್ಥಿಸೋಣ. ಭಗವತ್ ಕೃಪೆಗಾಗಿ ಸತತವಾಗಿ ಪ್ರಯತ್ನಿಸೋಣ.
