ಪರ್ವತದ ಏರುತಗ್ಗಿನ ಮೊನಚಾದ ಶಿಖರ ಪ್ರದೇಶದಲ್ಲಿ ಅಲೆದಾಡಬಾರದು. ಮಂಗಗಳು ಸಲೀಸಾಗಿ ಏರಬಲ್ಲವೆಂದು ಮನುಷ್ಯರು ಅನಿವಾರ್ಯತೆಯಿಲ್ಲದೆ ಮರವನ್ನು ಹತ್ತಬಾರದು. ನದಿ ಸ್ನಾನ ಒಳ್ಳೆಯದೆಂದು ಪುಸ್ತಕದಲ್ಲಿ ಓದಿ ತಿಳಿದುಕೊಂಡು ಉಕ್ಕಿ ಹರಿಯುವ ನದಿಯಲ್ಲಿ ಸ್ನಾನವನ್ನು ಮಾಡಬಾರದು. ನದಿಯ ಪಕ್ಕದ ದಂಡೆಯ ನೆರಳಿನಲ್ಲಿ ಕುಳಿತು ಮೈಮರೆಯಬಾರದು. ಅಗ್ನಿಯ ಜ್ವಾಲಾಮುಖಿಯೆಡೆಗೆ ಹೋಗುವ ದುಸ್ಸಾಹಸವನ್ನೂ ಮಾಡಬಾರದು. ಬೆಂಕಿಯ ಜ್ವಾಲೆಯ ಸಮೀಪ ಹೋಗುವುದೂ ಒಳ್ಳೆಯದಲ್ಲ, ಬೆಂಕಿಯನ್ನು ಕೆಳಗಿಟ್ಟು ಅದರ ಶಾಖದಿಂದ ದೇಹ ಕಾಯಿಸಲು ಕುಳಿತುಕೊಳ್ಳಬಾರದು. ಮಲಿನ ಪ್ರದೇಶ, ಹೊಟ್ಟುಧಾನ್ಯಗಳ ಬೂದಿಯ ರಾಶಿ, ಹಸಿಮಣ್ಣಿನ ದೊಡ್ಡಹೆಂಟೆ, ಯಜ್ಞಭೂಮಿ ಹಾಗೂ ಸ್ನಾನದ ಸ್ಥಳಗಳಿಗೆ ಕಾಲಿಡಕೂಡದು. ತನ್ನದೇ ನೆರಳನ್ನು ನೋಡಲು ನೀರಿನ ಬಾವಿ ಅಥವಾ ಕೆರೆಗಳೆಡೆಗೆ ಬಗ್ಗಬಾರದು. ಆಳ ತಿಳಿಯದ ಕೆರೆ, ಸರೋವರಗಳಲ್ಲಿ ಮುಳುಗಿ ಸ್ನಾನ ಮಾಡುವ ಗೋಜಿಗೆ ಹೋಗಬಾರದು. ಮೊಸಳೆ ಮೊದಲಾದ ಆಪತ್ತು ತರಬಹುದಾದ ಪ್ರಾಣಿಗಳು ವಾಸವಿರಬಹುದಾದ ಕೆರೆಗಳಿಗೆ ಇಳಿಯುವ ದುಸ್ಸಾಹಸಕ್ಕೂ ಮುಂದಾಗಬಾರದು. ಬಿಸಿಲು, ಮಳೆಯಿಂದ ರಕ್ಷಿಸಿಕೊಳ್ಳಲು ಛತ್ರಿಯ ಬಳಕೆ ಯೋಗ್ಯವಾದುದು.
