ಶಾಸ್ತ್ರ, ಸಂಪ್ರದಾಯ, ಜ್ಯೋತಿಷ್ಯ ಬಲ್ಲವರೆಲ್ಲ, ‘ಸುಳ್ಳು, ಕುಟಿಲತೆಯ ಭಾರಕ್ಕೆ ಈ ಹಳ್ಳಿಯ ಅವಸಾನ ತಡೆಯಲು ಆ ಭಗವಂತನಿಂದಲೂ ಸಾಧ್ಯವಿಲ್ಲ’ ಎಂದು ಹೇಳಿದರು. ಈ ನಡುವೆ ಅಲ್ಲೊಬ್ಬ ಧ್ಯೇಯವಾದಿ ಸಂನ್ಯಾಸಿ ಬಂದ. ಆ ಯುವ ಸಂನ್ಯಾಸಿ ಸುಸಂಸ್ಕೃತ ವ್ಯಕ್ತಿತ್ವದ ನೀತಿವಂತನಾಗಿದ್ದ. ಆತನ ಆಳವಾದ ಜ್ಞಾನ, ಸ್ವಾರ್ಥತ್ಯಾಗದ ಪರೋಪಕಾರಿ ಬುದ್ಧಿ ಊರಿನವರ ಗಮನ ಸೆಳೆಯಿತು. ಆರಂಭದಲ್ಲಿ ಆ ಊರಿನ ಸುಳ್ಳಿನ ಕುಟಿಲತೆಗೆ ತಾನೇ ಸಂತ್ರಸ್ತನಾದರೂ ಇದಕ್ಕೆಲ್ಲ ಇತಿಶ್ರೀ ಹಾಡಲು ಸಂನ್ಯಾಸಿ ಸಂಕಲ್ಪಿತನಾಗಿದ್ದ. ಹೊಸ ತಲೆಮಾರಿನ ಹುಡುಗರೊಂದಿಗೆ ಸ್ನೇಹ ಬಯಸಿ ಅವರಳಗೊಬ್ಬನಾದ ಸಂನ್ಯಾಸಿ ತನ್ನ ವಿಶುದ್ಧ ವ್ಯಕ್ತಿತ್ವದಿಂದ ಎಲ್ಲರ ಗಮನ ಸೆಳೆದ. ನೋಡ ನೋಡುತ್ತಿದ್ದಂತೆ ಸಂನ್ಯಾಸಿಯ ಸಾಂಗತ್ಯ ಎಲ್ಲರಿಗೂ ಆಪ್ಯಾಯಮಾನ ಎನಿಸಿತು. ಮಕ್ಕಳು ಮತ್ತು ಪ್ರೌಢಾವಸ್ಥೆಯ ಹುಡುಗರಿಗೆ ಆತನ ವ್ಯಕ್ತಿತ್ವ ಅನುಸರಿಸಲು ಬಯಸುವ ಕೇಂದ್ರಬಿಂದು ಎನಿಸಿತು. ಕೆಲವೇ ವರ್ಷಗಳಲ್ಲಿ ಊರಿನ ಮಕ್ಕಳ ಅಲೋಚನಾ ಲಹರಿಯೇ ಬದಲಾಯಿತು. ಅವರೊಳಗೆ ಪರಿವರ್ತನೆಯ ಬೀಜ ಬಿತ್ತಿ ಅದರೊಳಗೆ ಸತ್ಯ ಬದುಕಿನ ಫಸಲನ್ನು ಆ ಸಂನ್ಯಾಸಿ ತೆಗೆದಿದ್ದ.
