ಆದರೆ ಎಲ್ಲ ಮಣ್ಣಿನಲ್ಲಿಯೂ ಬೆಳೆ ಬೆಳೆಯುತ್ತದೆ, ಜೀವ ಕೊಡುತ್ತದೆ. ನೀವೂ ಹಾಗೆಯೇ ನಿಮ್ಮಲ್ಲಿರುವ ಜ್ಞಾನವನ್ನು ಇನ್ನೊಬ್ಬರು ಬಂದು ಅರಳಿಸಲಿ ಎಂದು ಕಲ್ಲಿನಂತೆ ಕಾಯದೇ ನಿಮ್ಮಲ್ಲಿರುವ ಜ್ಞಾನವನ್ನು ನೀವೇ ಪೋಷಿಸಿ ಮಣ್ಣಿನಂತೆ ಎಲ್ಲ ಸತ್ವಗಳನ್ನೂ ಹೀರಿಕೊಂಡು, ನಿಮ್ಮಲ್ಲಿ ಅಂತರ್ಗತ ವಾದ ವಿದ್ಯೆ ಎಂಬ ಮರ, ಗಿಡಗಳನ್ನು ಚೆನ್ನಾಗಿ ಬೆಳೆಸಿ ಮರಗಿಡಗಳು ಜನರಿಗೆ ನೆರಳು, ಹೂವು, ಹಣ್ಣು, ಕಾಯಿಗಳನ್ನು ನೀಡುವಂತೆ ನೀವೂ ನಿಮ್ಮ ಜ್ಞಾನ ಎಂಬ ಮರದಿಂದ ನ್ಯಾಯ, ನೀತಿ, ಧರ್ಮ ಎಂಬ ಹೂವು, ಹಣ್ಣು, ಕಾಯಿಗಳನ್ನು ಜನತೆಗೆ ನೀಡುವಂತಾಗಲಿ. ಇದೇ ನನ್ನ ಅಂತರಂಗದ ಮಾತು’ ಎಂದರು. ನಾವೂ ನಮ್ಮ ಬದುಕಿನಲ್ಲಿ ಕಲ್ಲಿನಂತಾಗದೇ ಮಣ್ಣಿನಂತೆ ಸತ್ವಭರಿತರಾಗೋಣ. ನಮ್ಮ ಒಳ್ಳೆಯತನವನ್ನು, ಇತರ ಒಳ್ಳೆಯ ಮೌಲ್ಯವನ್ನು ಇನ್ನೊಬ್ಬರು ಬಂದು ಅರಳಿಸಲಿ ಎಂದು ಕಾಯದೇ ನಾವೇ ಅರಳಿಸುತ್ತ ಅದರಿಂದ ಜನತೆಗೆ ಉಪಕಾರಿಯಾಗುವಂತೆ ಬಾಳೋಣ.
