ಕ್ಯಾನ್ಸರ್​ ಗೆಲ್ಲೋಣ: ಧ್ವನಿ ಪೆಟ್ಟಿಗೆಯಲ್ಲಿ ಉಂಟಾಗುವ ಓಕಲ್​ ಕ್ಯಾನ್ಸರ್​ಗೆ ಇದೆ ಚಿಕಿತ್ಸೆ

ಧೂಮಪಾನದಿಂದ ಸಂಭವಿಸುವ ಕ್ಯಾನ್ಸರ್​ಗಳಲ್ಲಿ ಓಕಲ್ ಕ್ಯಾನ್ಸರ್ ಸಹ ಒಂದಾಗಿದ್ದು, ಗಂಟಲಿನ ಧ್ವನಿ ಪೆಟ್ಟಿಗೆಯಲ್ಲಿ ಉಂಟಾಗುವ ಈ ಕ್ಯಾನ್ಸರ್ ಬಾರದಂತೆ ತಡೆಯಲು ಧೂಮಪಾನ ಹಾಗೂ ಧೂಮಪಾನ ಮಾಡುವವರಿಂದ ದೂರ ಇರಬೇಕು.

ಆರಂಭದಲ್ಲಿ ಧ್ವನಿಯಲ್ಲಿ ಬದಲಾವಣೆ ಉಂಟು ಮಾಡುವ ಈ ಕ್ಯಾನ್ಸರ್ ನಂತರದಲ್ಲಿ ತೀವ್ರ ಕೆಮ್ಮು ಕಾಣಿಸಿಕೊಳ್ಳುತ್ತದೆ. ಗಂಟಲಿನ ನಾಳ ವಿಂಡ್ ಪೈಪ್ ಅನ್ನು ಬ್ಲಾಕ್ ಮಾಡುತ್ತದೆ. ಇದರಿಂದ ಆಹಾರ ಸೇವನೆ ಹಾಗೂ ಉಸಿರಾಟಕ್ಕೆ ತೀವ್ರ ಕಷ್ಟವಾಗುತ್ತದೆ. ಹೀಗಾಗಿ ಧ್ವನಿಯಲ್ಲಿ ಬದಲಾವಣೆ (ಕರ್ಕಶ ಧ್ವನಿ) ಕಾಣಿಸಿಕೊಂಡು ಅದು ಎರಡು ವಾರಗಳ ಕಾಲ ಹಾಗೇ ಮುಂದುವರಿದರೆ ಕೂಡಲೇ ಇಎನ್​ಟಿ ತಜ್ಞರಲ್ಲಿ ತಪಾಸಣೆ ಮಾಡಿಸಿಕೊಳ್ಳಬೇಕು.

ವೈದ್ಯಕೀಯ ಕ್ಷೇತ್ರದಲ್ಲಿ ತಂತ್ರಜ್ಞಾನ ಬಹಳಷ್ಟು ಮುಂದುವರಿದಿದೆ. ಹೀಗಾಗಿ ಓಕಲ್ ಕ್ಯಾನ್ಸರ್ ಆರಂಭಿಕ ಹಂತದಲ್ಲೇ ಪತ್ತೆಯಾದರೆ ಚಿಕಿತ್ಸೆ ಮೂಲಕ ಸಂಪೂರ್ಣ ಗುಣಪಡಿಸಬಹುದಾಗಿದೆ. ಪ್ರಾರಂಭದಲ್ಲಿ ಇದಕ್ಕೆ ಕೇವಲ ರೇಡಿಯೋಥೆರಪಿ ಹಾಗೂ ಔಷಧಗಳನ್ನು ನೀಡಿ ಗುಣಪಡಿಸಬಹುದು. ಇದಕ್ಕೂ ವಾಸಿಯಾಗದಿದ್ದರೆ, ಕೆಲವೊಮ್ಮೆ ಶಸ್ತ್ರಚಿಕಿತ್ಸೆ ನಡೆಸಲಾಗುವುದು.