ಉಪವಾಸ: ‘ಉಪ’ ಎಂದರೆ ಹತ್ತಿರ, ‘ವಾಸ’ ಎಂದರೆ ಇರುವುದು. ಅಂದರೆ ಭಗವಂತನ ಸಮೀಪ ವಾಸಿಸುವುದೇ ಉಪವಾಸವಾಗಿದೆ. ಉಪವಾಸದ ಸಮಯದಲ್ಲಿ ಯಾರು ಧ್ಯಾನ, ಪೂಜೆ, ಭಜನೆ, ವಿಷ್ಣು ಸಹಸ್ರನಾಮ ಪಠಣ, ಜಾಗರಣೆ ಮಾಡುತ್ತಾರೋ ಅವರಿಗೆ ಅಂತ್ಯದಲ್ಲಿ ಮೋಕ್ಷ ಕರುಣಿಸುವನು. ಪ್ರತಿ ವರ್ಷ ವೈಕುಂಠ ಏಕಾದಶಿ ಬರುವುದು ಪುಷ್ಯ ಮಾಸದ ಶುಕ್ಲ ಪಕ್ಷದ ಏಕಾದಶಿ ದಿನ. ಅಂದು ಸ್ವರ್ಗದ ಬಾಗಿಲು ತೆರೆಯುತ್ತದೆ ಎಂಬ ಪ್ರತೀತಿ ಇದೆ. ಮುಕ್ಕೋಟಿ ದೇವತೆಗಳಿಗೆ ನಾರಾಯಣನು ದರ್ಶನ ನೀಡುವನು. ನಾರಾಯಣನ ಅಕ್ಷರಗಳಲ್ಲಿ ವಿಶೇಷತೆ ಇದೆ. ನಾ-ಎಂದರೆ ಕಾರಣ ರೂಪ ಜಲದ ಮೇಲೆ ನಿವಾಸವನ್ನು ಕಲ್ಪಿಸಿಕೊಂಡಿರುವವನು, ರಾ-ಎಂದರೆ ಎಲ್ಲ ಮಾನವ ಜೀವಿಗಳು ನೆಲೆಗೊಳ್ಳುವ ಸ್ಥಾನ, ಯ-ಎಂದರೆ ಎಲ್ಲ ಮಾನವರ ಹೃದಯಗಳಲ್ಲಿ ವಾಸಿಸುವವನು, ಣ-ಎಂದರೆ ಮಾನವ ಕೋಟಿಯ ಅಂತಿಮ ಗಮ್ಯಸ್ಥಾನ.
