ಈ ಮೊದಲು ಕೆಲಸದ ಒತ್ತಡದಿಂದ ವ್ಯಾಯಾಮಕ್ಕೆ ಸಮಯವಿಲ್ಲ ಎಂದು ಅನೇಕರು ಹೇಳುತ್ತಿದ್ದರು. ಆದರೆ ಈಗ ಸಮಯವೂ ಇದೆ, ದೃಢಸಂಕಲ್ಪವೊಂದೇ ಬೇಕಾಗಿರುವುದು. ಸತತ ಮೂರು ವಾರ ವ್ಯಾಯಾಮ ಮಾಡಿದರೆ ಅದು ಹವ್ಯಾಸವಾಗಿಬಿಡುತ್ತದೆ. ನಂತರ ಪ್ರತಿನಿತ್ಯ ಮುಂದುವರಿಸಲು ಸಾಧ್ಯವಾಗುತ್ತದೆ. ನಮ್ಮ ಶರೀರವು ಜೀವಕೋಶಗಳು, ಮೂಳೆ, ಅಂಗಾಂಗಗಳಿಂದ ರಚನೆಯಾಗಿದೆ. ಇವೆಲ್ಲದರ ಸರಿಯಾದ ಚಟುವಟಿಕೆಗೆ ವ್ಯಾಯಾಮ ಬಹು ಮುಖ್ಯ. ಇತ್ತೀಚಿನ ದಿನಗಳಲ್ಲಿ ನಾವು ಆಹಾರವನ್ನು ಸೇವಿಸುತ್ತಿದ್ದೇವೆಯೇ ಹೊರತು ಅದಕ್ಕೆ ತಕ್ಕಂತೆ ದೈಹಿಕವಾಗಿ ಶ್ರಮಿಸುತ್ತಿಲ್ಲ. ಇದರಿಂದಾಗಿ ನಾವು ಸೇವಿಸುವ ಆಹಾರದಲ್ಲಿನ ಗ್ಲುಕೋಸ್ ಅಂಶವು ಕೊಬ್ಬಿನಾಂಶವಾಗಿ ಪರಿವರ್ತನೆಗೊಂಡು ದೇಹದಲ್ಲಿ ಶೇಖರಣೆಯಾಗಿ ಹೃದಯ ಸಮಸ್ಯೆ, ಅಧಿಕ ರಕ್ತದೊತ್ತಡ ಮುಂತಾದ ಆರೋಗ್ಯ ಸಮಸ್ಯೆಗೆ ಕಾರಣವಾಗುತ್ತದೆ.
