ಶಾಲೆಯಲ್ಲಿ ಪಾಠ ಮಾಡಿ ತಮ್ಮ ಕರ್ತವ್ಯ ಮುಗಿಸುವ ಶಿಕ್ಷಕರು ಬಹುಸಂಖ್ಯೆಯಲ್ಲಿದ್ದಾರೆ. ಆದರೆ ಬೆರಳೆಣಿಕೆಯಷ್ಟು ಶಿಕ್ಷಕರು ಮಾತ್ರ ಇದರಾಚೆಯೂ ಯೋಚಿಸಿ ಇಡೀ ಶಾಲೆಗೆ ಒಳ್ಳೆಯ ಹೆಸರು ತರುವುದು ಮಾತ್ರವಲ್ಲದೇ, ಯಾರಿಗೂ ಬೇಡ ಎನಿಸಿರುವ ಶಾಲೆಯ ಕಡೆಗೂ ಚಿತ್ತ ಹರಿಸುವಂತೆ ಮಾಡುತ್ತಿದ್ದಾರೆ. ಅಂಥ ಅಪರೂಪದ ಶಿಕ್ಷಕರಲ್ಲಿ ಒಬ್ಬರು ಈರಣ್ಣ ಕಡಕೋಳ. ಇವರ ಸತತ ಶ್ರಮದ ಫಲವಾಗಿ ಸರ್ಕಾರಿ ಶಾಲೆಯೊಂದು ಇಂದು ಉನ್ನತ ಸ್ಥಾನದಲ್ಲಿ ನಿಂತಿದೆ. ಈರಣ್ಣ ಅವರು, ತಮ್ಮ ಶಾಲೆಯಲ್ಲಿ ಮಕ್ಕಳಿಗೆ ಗುಣಮಟ್ಟದ ಶಿಕ್ಷಣ ಹಾಗೂ ಉನ್ನತ ವ್ಯಾಸಂಗಕ್ಕಾಗಿ ಅನೇಕ ಕಲಿಕಾ ಚಟುವಟಿಕೆಗಳನ್ನು ಏರ್ಪಡಿಸುತ್ತಿದ್ದಾರೆ. ಇದರ ಫಲವಾಗಿ 2010-11ರಲ್ಲಿ 110 ಇದ್ದ ಮಕ್ಕಳ ಸಂಖ್ಯೆ ಇಂದು 567ಕ್ಕೇರಿದೆ. ಕಲಿಕೆಯಲ್ಲಿ ಹಿಂದುಳಿದ ಮಕ್ಕಳಿಗೆ ಕಲಿಕಾ ಮಟ್ಟಕ್ಕೆ ತಕ್ಕಂತೆ ಪಾಠ ಬೋಧಿಸಿ ಆಗಾಗ್ಗೆ ಪರೀಕ್ಷೆಗಳನ್ನು ಆಯೋಜಿಸುತ್ತಾರೆ. ಮಕ್ಕಳಿಗೆ ಪ್ರೋತ್ಸಾಹಿಸಲು ಹೆಚ್ಚು ಅಂಕ ಗಳಿಸಿದ ಮಕ್ಕಳಿಗೆ ‘ಹೆಮ್ಮೆಯ ಕನ್ನಡಿಗ’, ‘ಹೆಮ್ಮೆಯ ಭಾರತೀಯ’ ಎಂಬ ಬಿರುದು ನೀಡಿ, ಧ್ವಜ ಮತ್ತು ಶಾಲು ನೀಡಿ ಗೌರವಿಸುತ್ತಿದ್ದಾರೆ.
