ಕಳೆದ 15 ವರ್ಷಗಳಿಂದ ಕೂಚುಪುಡಿ ನೃತ್ಯವೇ ಬಸವರಾಜ ಅವರ ಉಸಿರಾಗಿದೆ. 10 ವರ್ಷಗಳಿಂದ ಸ್ತ್ರೀ ವೇಷಧಾರಿಯಾಗಿಯೇ ಗುರುತಿಸಿಕೊಂಡಿದ್ದಾರೆ. ಇದುವರೆಗೆ ಒಂದು ಸಾವಿರಕ್ಕೂ ಹೆಚ್ಚಿನ ಪ್ರದರ್ಶನ ನೀಡಿದ್ದಾರೆ. ರಾಜ್ಯದ ಎಲ್ಲ ಜಿಲ್ಲೆಗಳು, 15 ರಾಜ್ಯ, ದುಬೈ, ಕೆನಡಾ, ನೆದರ್ಲೆಂಡ್, ಸ್ವಿಜರ್ಲೆಂಡ್ ಸೇರಿದಂತೆ 10 ವಿವಿಧ ದೇಶಗಳಲ್ಲಿ ನೃತ್ಯ ಪ್ರದರ್ಶಿಸಿದ್ದಾರೆ. ಭಾಮಾ ಕಲಾಪದಲ್ಲಿ ಸತ್ಯಭಾಮಾ, ಮೋಹಿನಿ ಭಸ್ಮಾಸುರದಲ್ಲಿ ಮೋಹಿನಿ, ಸೀತಾ ಸ್ವಯಂವರದಲ್ಲಿ ಸೀತೆ, ಪಾರ್ವತಿ ಕಲ್ಯಾಣದಲ್ಲಿ ಪಾರ್ವತಿ, ರುಕ್ಮಿಣಿ ಪಾತ್ರಗಳ ಜತೆಗೆ ಕಿತ್ತೂರು ರಾಣಿ ಚನ್ನಮ್ಮ ನೃತ್ಯರೂಪಕಕ್ಕೆ ಬಸವರಾಜ ಹೆಸರುವಾಸಿಯಾಗಿದ್ದಾರೆ. ಬಿಎ ಹಾಗೂ ನೃತ್ಯದಲ್ಲಿ ಎಂಎ ಮತ್ತು ಡಿಪ್ಲೊಮಾ ಪದವಿ ಪಡೆದಿದ್ದಾರೆ. 27 ವರ್ಷದ ಬಸವರಾಜ ಬಲಕುಂದಿ ಸಿರಗುಪ್ಪದ ಶಾಲೆಯೊಂದರಲ್ಲಿ ನೃತ್ಯ ಶಿಕ್ಷಕರಾಗಿಯೂ ಕೆಲಸ ಮಾಡುತ್ತಿದ್ದಾರೆ. ಹಂಪಿ, ಆನೆಗುಂದಿ, ಕಿತ್ತೂರು, ಬೆಳವಡಿ ಉತ್ಸವ, ಮೈಸೂರು ದಸರಾ, ಅಖಿಲ ಭಾರತ ಸಾಹಿತ್ಯ ಸಮ್ಮೇಳನದಲ್ಲಿ ನೃತ್ಯ ಪ್ರದರ್ಶನ ನೀಡಿದ್ದಾರೆ. ಸ್ತ್ರೀ ವೇಷ ಧರಿಸಿದಾಗ ಸ್ತ್ರೀ ಸಹಜ ಗುಣಗಳಂತೆಯೇ ವರ್ತಿಸುತ್ತಾರೆ. ಸ್ತ್ರೀಯರ ಘನತೆ ಕಾಪಾಡುವುದು ಅದರ ಉದ್ದೇಶ. ಪ್ರದರ್ಶನ ಹೊರತುಪಡಿಸಿ ಬೇರೆ ಸಂದರ್ಭಗಳಲ್ಲಿ ಇವರೇ ಬಸವರಾಜ ಬಲಕುಂದಿ ಎಂದು ಗುರುತಿಸುವುದೇ ಕಷ್ಟ. ಈ ಬಗ್ಗೆ ಸ್ವತಃ ಬಸವರಾಜ ಅವರಿಗೇ ಬೇಸರ ಇದೆ.
