ಸಹಜ ವೀರ್ಯಾಣು ಮತ್ತು ಅಂಡಾಣುಗಳಿದ್ದರೂ ಸಮ್ಮಿಲನವಾದಾಗೆಲ್ಲ ಗರ್ಭಧಾರಣೆ ಆಗುವುದಿಲ್ಲ. ಯಾವುದೋ ರ್ನಿದಿಷ್ಟ ಸಮ್ಮಿಲನದಿಂದ ಮಾತ್ರ ಆಗುತ್ತದೆ. ಹೆರಿಗೆಯಾಗುವ ತನಕ ಮತ್ತು ನಂತರ ಪ್ರತಿದಿನ, ಪ್ರತಿತಿಂಗಳು, ಪ್ರತಿವರ್ಷಗಳಲ್ಲಾಗಬೇಕಾದ ಪೂರ್ವನಿಗದಿತ ಬೆಳವಣಿಗೆಗಳು, ಬದಲಾವಣೆಗಳು ಕರಾರುವಕ್ಕಾಗಿ ಮಗುವಿನಲ್ಲಿ ಆಗುತ್ತವೆ. ಗರ್ಭಧಾರಣೆಯಾದ ಕೆಲದಿನಗಳ ನಂತರ ಹಿಗ್ಗಲು ಪ್ರಾರಂಭಿಸಿದ ಗರ್ಭಕೋಶ, ಬೆಳೆಯುವ ಗರ್ಭಕೂಸಿಗನುಗುಣವಾಗಿ ಹಿಗ್ಗುತ್ತಾ 9 ತಿಂಗಳಾಗುತ್ತಿದ್ದಂತೆ ಸ್ವಯಂಪ್ರೇರಿತವಾಗಿ ಕುಗ್ಗಿ ಹೆರಿಗೆಗೆ ಅನುವುಮಾಡಿಕೊಡುತ್ತದೆ. ಕಿರಿದಾಗಿದ್ದ ಯೋನಿ ಬಹುಗಾತ್ರದ ಕೂಸನ್ನು ಹೊರಹಾಕುವಷ್ಟರ ಮಟ್ಟಿಗೆ ಹಿಗ್ಗಿ ಹೆರಿಗೆಯಾದಾಕ್ಷಣ ಸಹಜ ಸ್ಥಿತಿ ತಲುಪುತ್ತದೆ. ಇದೆಂತಹ ವಿಸ್ಮಯ! ಹೆರಿಗೆಯಾದ ನಂತರದ ಹಾಲು ಸುರಿಕೆ, ಹಾಲಿನಲ್ಲಿರುವ ವಿಶಿಷ್ಟ ಪೌಷ್ಟಿಕಗಳು ಮತ್ತು ರೋಗನಿರೋಧಕಗಳು, ನಿಗದಿತ ಅವಧಿಯಲ್ಲುಂಟಾಗುವ ಮಗುವಿನ ಬೆಳವಣಿಗೆಯ ಮೈಲುಗಲ್ಲುಗಳು, ಪ್ರೌಢಾವಸ್ಥೆ, ಯೌವ್ವನ, ಮುಪ್ಪು, ಸಾವು ಇವೆಲ್ಲವೂ ನಿಗದಿತ ಸಮಯಕ್ಕೆ ಚಾಚೂತಪ್ಪದೆ ಸ್ವಯಂಚಾಲಿತವಾಗಿ ಜರುಗುತ್ತವೆ. ಲೈಂಗಿಕ ಅಂಗಾಂಗಗಳು (ವೃಷಣ,ಅಂಡಾಶಯ) ಹುಟ್ಟಿನಿಂದಲೇ ದೇಹದಲ್ಲಿದ್ದರೂ ಪ್ರೌಢಾವಸ್ಥೆ ತಲುಪುವವರೆಗೂ ಕಾರ್ಯನಿರ್ವಹಿಸುವುದಿಲ್ಲ. ವಯಸ್ಸಿಗನುಗುಣವಾಗಿ ಮನಸ್ಸು ಮತ್ತು ಭಾವಗಳಲ್ಲೂ ನಿಗದಿತ ಬದಲಾವಣೆಗಳುಂಟಾಗುತ್ತವೆ. ಜೀವಕೋಶದ ಆಯಸ್ಸು ಹುಟ್ಟಿದ ದಿನದಂದೇ ನಿರ್ಧಾರವಾಗುವುದನ್ನು ಅಪಾಪೋಸಿಸ್ ಎಂದು ಕರೆಯಲಾಗಿದ್ದು, ಹುಟ್ಟು ಮತ್ತು ಸಾವುಗಳೂ ಅತೀತ ಶಕ್ತಿಯ ನಿಯಂತ್ರಣದಲ್ಲಿವೆ ಎಂಬುದನ್ನು ದೃಢೀಕರಿಸುತ್ತವೆ.
