ಪ್ರಕೃತಿದತ್ತ ಆಹಾರವು ಆರೋಗ್ಯಕ್ಕೆ ಉಪಯುಕ್ತ. ಆಯಾ ಪ್ರದೇಶಗಳಲ್ಲಿ, ಆಯಾ ಕಾಲದಲ್ಲಿ ಸಿಗುವ ಮತ್ತು ಬೆಳೆಯುವ ಹಣ್ಣು, ತರಕಾರಿಗಳನ್ನು ಸೇವಿಸಬೇಕು. ದೈನಂದಿನ ಆಹಾರದಲ್ಲಿ ಮೊಳಕೆಕಾಳುಗಳು, ನಟ್ಸ್ ಸೇವಿಸಬೇಕು. ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವಲ್ಲಿ ವಿಟಮಿನ್ ಸಿ ಅಂಶ ಹೊಂದಿರುವ ಆಹಾರಪದಾರ್ಥಗಳು ಬಹು ಮುಖ್ಯ. ಕಿವಿ ಹಣ್ಣು, ನೆಲ್ಲಿಕಾಯಿ, ನಿಂಬೆಹಣ್ಣು, ಪೇರಳೆ (ಸೀಬೆ) ಹಣ್ಣು, ಪಪ್ಪಾಯ, ಅನಾನಸ್ ಮುಂತಾದವು ವಿಟಮಿನ್ ಸಿ ಇರುವ ಪದಾರ್ಥಗಳು. ಅರಿಶಿಣದಲ್ಲಿರುವ ಕರ್ಕ್ಯುಮಿನ್, ಗ್ರೀನ್ ಟೀಯಲ್ಲಿರುವ ಕಾಟೆಕಿನ್, ಶುಂಠಿಯಲ್ಲಿರುವ ಜಿಂಜೆರಾಲ್, ಬೆಳ್ಳುಳ್ಳಿಯಲ್ಲಿರುವ ಅಲಿಸಿನ್ ಅಂಶಗಳು ದೇಹದಲ್ಲಿರುವ ವೈರಾಣುಗಳ ಶಕ್ತಿಯನ್ನು ಕುಂದಿಸಿ ರೋಗನಿರೋಧಕ ಶಕ್ತಿಯನ್ನು ವೃದ್ಧಿಸುವಲ್ಲಿ ಮುಖ್ಯ ಪಾತ್ರ ವಹಿಸುತ್ತವೆ. ಕಾಮಕಸ್ತೂರಿ ಬೀಜ ಸೇರಿಸಿದ ಲಿಂಬು ಮತ್ತು ಜೇನುತುಪ್ಪ ಮಿಶ್ರಿತ ನೀರನ್ನು ಅಗಾಗ ಕುಡಿಯುತ್ತಿರಬೇಕು. ಕಾಳುಮೆಣಸಿನ ಪುಡಿ ಹಾಗೂ ಶುಂಠಿ ಸೇರಿಸಿದ ನೆಲ್ಲಿಕಾಯಿ ಪೇಯವನ್ನು ಬೆಳಗ್ಗೆ ಎದ್ದ ಕೂಡಲೇ ಕುಡಿಯುವುದು ಉತ್ತಮ. ಜ್ಯೇಷ್ಠಮಧುವಿನ ಕಷಾಯವನ್ನು ಜೇನುತುಪ್ಪದೊಂದಿಗೆ ಸೇವಿಸಿ. ದಿನಕ್ಕೆರಡು ಬಾರಿ ಗ್ರೀನ್ ಟೀ ಸೇವಿಸಿ. ಜರ್ನಲ್ ಆಫ್ ಲ್ಯುಕೋಸೈಟ್ ಬಯಾಲಜಿಯ ವರದಿಯಲ್ಲಿ ಒಮೆಗಾ 3 ಕೊಬ್ಬಿನಾಂಶ ರೋಗನಿರೋಧಕ ಶಕ್ತಿ ಹೆಚ್ಚಿಸುತ್ತದೆ ಎಂದು ತಿಳಿಸಿದೆ.
