ರೈತ ಮುಂದೆ ಮುಂದೆ ನಡೆದ. ಅವನ ಹಿಂದೆ ರಾಜನೂ ಸೈನಿಕರೂ ಕುದುರೆಗಳ ಮೇಲೆ ಹಿಂಬಾಲಿಸಿದರು. ಅಲ್ಲೊಂದು ಹೊಲ ಕಂಡು ರಾಜನು, ‘ಇಲ್ಲಿ ಮೇವು ಸಮೃದ್ಧವಾಗಿದೆ. ಅಲ್ಲವಾ?’ ಎಂದಾಗ, ರೈತ, ‘ಮುಂದಿನ ಹೊಲದಲ್ಲಿ ಇದಕ್ಕಿಂತಲೂ ಹುಲುಸಾದ ಮೇವಿದೆ. ಬೇಗ ಬನ್ನಿ, ಹೋಗೋಣ’ ಎಂದ. ಹೀಗೆಯೇ ಎಷ್ಟೋ ಹೊಲಗಳು ದಾಟಿ ಆಯಿತು. ಅದೇ ಉತ್ತರವನ್ನೇ ಹೇಳುತ್ತ ರೈತ ತನ್ನ ಹೊಲಕ್ಕೇ ಕರೆದುಕೊಂಡು ಬಂದ. ಅಲ್ಲಿ ಮೇವು ಅಷ್ಟೇನೂ ಹುಲುಸಾಗಿ ಬೆಳೆದಿರಲಿಲ್ಲ. ಆದರೂ ರೈತ ಹೇಳಿದ-‘ನೋಡಿ ಸ್ವಾಮಿ, ಈ ಹೊಲದಲ್ಲಿ ಕುದುರೆಗಳನ್ನು ಧಾರಾಳವಾಗಿ ಮೇಯಲು ಬಿಡಬಹುದು’. ರೈತನ ಮೇಲೆ ಕೆಂಗಣ್ಣು ಬೀರುತ್ತ ರಾಜ, ‘ನನ್ನ ಕಣ್ಣಿಗೆ ಮಣ್ಣೇರುಚುತ್ತಿಯಾ? ಈ ಕಳಪೆ ಜೋಳದ ಮೊಟಕುಗರಿಗಳನ್ನು ಮೇಯಲು ಕುದುರೆಗಳನ್ನು ಬಿಡಬೇಕಾ? ಈ ಮೊದಲಿನ ಹೊಲಗಳಲ್ಲಿ ಒಳ್ಳೆಯ ಮೇವಿದ್ದರೂ ಸುಳ್ಳು ಹೇಳಿ ಇಲ್ಲಿಗೇಕೆ ಕರೆದುಕೊಂಡು ಬಂದೆ?’ ಎಂದು ಪ್ರಶ್ನಿಸಿದ.
