ಆಗ ಅಮಾತ್ಯ ಕೂಡಲೇ, ‘ಇದು ನಮ್ಮ ಆಸ್ಥಾನದ ಮತ್ತೊಬ್ಬ ಪಂಡಿತರಿಗೂ ಗೊತ್ತು’ ಎನ್ನುತ್ತಲೇ ಎರಡನೇ ಬಾರಿ ಕೇಳಿಸಿಕೊಂಡ ಅದೇ ಶ್ಲೋಕವನ್ನು ಮತ್ತೊಬ್ಬ ಪಂಡಿತನಿಂದ ಹೇಳಿಸಿದ. ಮಾತ್ರವಲ್ಲ, ಅದೇ ಶ್ಲೋಕವನ್ನು ಮೂರು, ನಾಲ್ಕು ಹೀಗೆ ಕ್ರಮವಾಗಿ ಆಸ್ಥಾನ ಪಂಡಿತರಲ್ಲಿ ಆ ಶ್ಲೋಕವನ್ನು ತಮಗೆಲ್ಲ ಈಗಾಗಲೇ ತಿಳಿದಿರುವ ಹಳೆಯ ಶ್ಲೋಕ ಎಂಬಂತೆ ಹೇಳಿಸಿ ಬಿಟ್ಟ ಆ ಪ್ರಧಾನ ಅಮಾತ್ಯ. ರಾಜ ಮೌನವಾದ. ಆತನಿಗೆ ಈ ರೀತಿ ಶ್ಲೋಕಕ್ಕಾಗಿ ಬೊಕ್ಕಸದ ಹಣ ಬಹುಮಾನವಾಗಿ ಬಳಸಿದರೆ, ರಾಜ್ಯದ ಆರ್ಥಿಕ ಪರಿಸ್ಥಿತಿ ಎಲ್ಲಿಗೆ ತಲುಪಬಹುದೆನ್ನುವುದನ್ನು ಅಮಾತ್ಯ ತನ್ನ ಚಾಣಾಕ್ಷ ನಡೆಯಿಂದ ತೋರಿದ್ದ. ಇತ್ತ ಬಹುಮಾನಕ್ಕಾಗಿ ಹೊಸ ಶ್ಲೋಕ ಹೇಳುವವರಿಗೆ ಆಸ್ಥಾನದ ಬಾಗಿಲು ಮುಚ್ಚುವಂತೆ ಮಾಡಿದ್ದ ಆ ಅಮಾತ್ಯ.
