ಮಹಿಳೆಯರ ಬಗ್ಗೆ ವಿಶೇಷ ಕಾಳಜಿ ಇದ್ದ ಮೆಹೆರ್ ಬಾಲ್ಯವಿವಾಹದ ವಿರುದ್ಧ ಶಾರದಾ ಕಾಯ್ದೆ ತರುವಲ್ಲಿ ಮಹತ್ವದ ಪಾತ್ರ ವಹಿಸಿದರು. ಪ್ಯಾರಿಸ್ನಲ್ಲಿ ಒಲಿಂಪಿಕ್ಸ್ನ ಟೆನ್ನಿಸ್ ಸ್ಪರ್ಧೆಯಲ್ಲಿ ಭಾರತೀಯ ಸಂಸ್ಕೃತಿಯಾದ ಸೀರೆ ಉಟ್ಟುಕೊಂಡೇ ಭಾಗವಹಿಸಿದರು. ವಿಮಾನ ನಡೆಸಿದ ಭಾರತದ ಪ್ರಥಮ ಮಹಿಳೆಯಾದರು. ವಿಶ್ವಪರ್ಯಟನ ಮಾಡಿ ಅಮೆರಿಕದ ರಾಷ್ಟ್ರಪತಿ, ಇಂಗ್ಲೆಂಡಿನ ರಾಣಿ ಇವರನ್ನೆಲ್ಲ ಭೇಟಿಯಾಗಿ ಭಾರತದ ಸಂಸ್ಕೃತಿಯ ಮಹತ್ವ ವಿವರಿಸಿದರು. ಸಾಯುವ ಮುನ್ನ, ‘ನನ್ನ ಎಲ್ಲ ಸಂಪತ್ತನ್ನು ಮಾನವಕುಲದ ಒಳಿತಿಗೆ ಮೀಸಲಾಗಿಡಿ’ ಎಂದು ಹೇಳಿ ಪ್ರಾಣಬಿಟ್ಟರು. ದೊರಾಬ್ಜಿ ಟಾಟಾ ಅಂದು ಬಿಡಿಸಿ ತಂದ ಆ ವಜ್ರವನ್ನು ಮಾರಿ ಮೆಹೆರ್ ಇಚ್ಛೆಯಂತೆ ಟ್ರಸ್ಟ್ ಒಂದನ್ನು ಸ್ಥಾಪಿಸಿ ಭಾರತದಲ್ಲಿಯೇ ಪ್ರಥಮವಾಗಿ ಸಂಶೋಧನೆ, ಕ್ಯಾನ್ಸರ್ ಚಿಕಿತ್ಸೆ ಒಳಗೊಂಡ ದೊಡ್ಡದಾದ ‘ಟಾಟಾ ಮೆಮೋರಿಯಲ್ ಹಾಸ್ಪಿಟಲ್’ನ್ನು ಮುಂಬೈಯಲ್ಲಿ ಕಟ್ಟಿಸಿ, ಸಾರ್ಥಕ ಶ್ರದ್ಧಾಂಜಲಿ ಅರ್ಪಿಸಿದರು. ಅಂದು ಅವರು ಕೊಟ್ಟ ಆ ವಜ್ರವು ದೇಶದ ಪ್ರತಿಷ್ಠಿತ ಉದ್ಯೋಗ ಸಮೂಹವನ್ನು ಉಳಿಸಿತು. ಇಂದು ಸಾವಿರಾರು ಜನರ ಜೀವ ಉಳಿಸುತ್ತಿದೆ. ಅವರ ಜುಬಿಲಿ ಡೈಮಂಡ್ ಇಂದಿಗೂ ಹೊಳೆಯುತ್ತಿದೆ. ಮೆಹೆರ್ ಜೀವನ ನಮಗೆಲ್ಲ ಸ್ಪೂರ್ತಿ. ಅಲ್ಲದೆ, ಇತರರ ಸಂಕಷ್ಟಕ್ಕಾಗಿ ಮಿಡಿಯುವಾಗ, ಆ ನಿಟ್ಟಿನಲ್ಲಿ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುವಾಗ ದೊರೆಯುವ ಸಂತೃಪ್ತಿಯೂ ಅನನ್ಯ ಎಂಬುದಕ್ಕೆ ಸಾಕ್ಷಿ.
