ಅವನು ಸುಗ್ರೀವ. ವಾನರರಾಜ. ಮಹಾಬಲಿಷ್ಠ. ಮರ್ಯಾದಾ ಪುರುಷೋತ್ತಮ ಶ್ರೀರಾಮನೊಂದಿಗೆ ಸಖ್ಯ ಬೆಳೆಸಿ ಸೀತಾಮಾತೆಯನ್ನು ಹುಡುಕಿಸಿ ಕರೆತರುವ ಜವಾಬ್ದಾರಿ ತೆಗೆದುಕೊಂಡ. ಹನುಮಂತನ ಮೂಲಕ ಸೀತೆ ಲಂಕೆಯಲ್ಲಿರುವ ವಿಚಾರ ತಿಳಿದು, ತನ್ನ ಸಮಗ್ರವಾದ ಕಪಿಸೈನ್ಯವನ್ನು ತೆಗೆದುಕೊಂಡು, ಲಂಕೆಯಮೇಲೆ ಯುದ್ಧಕ್ಕೆ ಹೊರಟರು. ಸಾಗರದಲ್ಲಿ ಸೇತುಬಂಧನ ಮಾಡಿ, ಲಂಕೆಯನ್ನು ತಲುಪಿದರು. ಅಲ್ಲಿ ಸುವೇಲಪರ್ವತ. ಬಹುಎತ್ತರದ ಶಿಖರ. ವಿಶಾಲಸ್ಥಳ. ಮನಮೋಹಕ ವಾತಾವರಣ. ಅಲ್ಲಿನ ಪರಿಸರಸೌಂದರ್ಯವನ್ನು ಕಣ್ತುಂಬಿಕೊಳ್ಳಲು ಸುವೇಲಪರ್ವತವನ್ನು ಏರುತ್ತಾರೆ. ಮೇಲೆ ನಿಂತು ನೋಡಿದರೆ ಲಂಕಾಪಟ್ಟಣ ಸುಂದರವಾಗಿ ಕಾಣಿಸುತ್ತಿದೆ. ಅಲ್ಲಿ ರಾವಣನ ಅಂತಃಪುರ. ಅಲ್ಲಿ ರಾವಣ ತನ್ನ ಸಚಿವರೊಂದಿಗೆ ಮಾತನಾಡುತ್ತಿರುವ ದೃಶ್ಯ ಕಾಣಿಸಿತು. ರಾವಣನನ್ನು ಕಂಡೊಡನೆಯೇ ಸುಗ್ರೀವನಿಗೆ ಎಲ್ಲಿಲ್ಲದ ಕೋಪ ಉಂಟಾಗಿ, ತಾನು ನಿಂತ ಸ್ಥಳದಿಂದಲೇ ಜೋರಾಗಿ ಹಾರಿ, ನೇರವಾಗಿ ರಾವಣನ ಮುಂದೆ ನಿಂತ. ಕ್ಷಣದಲ್ಲೇ ರಾವಣನೊಂದಿಗೆ ಯುದ್ಧವನ್ನೇ ಆರಂಭಿಸಿದ. ಖಡ್ಗಯುದ್ಧ, ಮಲ್ಲಯುದ್ಧ, ಜಂಘಾಯುದ್ಧ, ವಕ್ಷಸ್ಥಳಯುದ್ಧ ಹೀಗೆ ನಾನಾವಿಧವಾಗಿ ಘೊರವಾದ ಯುದ್ಧವನ್ನೇ ಮಾಡಿ, ರಾವಣನನ್ನು ನಿಶ್ಶಕ್ತನನ್ನಾಗಿ ಮಾಡಿದ. ಅಷ್ಟೇ ಅಲ್ಲ, ‘ನಾನು ಶ್ರೀರಾಮನ ದಾಸ ಸುಗ್ರೀವ. ಸೀತಾಮಾತೆಯನ್ನು ಬಿಡದಿದ್ದರೆ ನಿನಗೆ ಅನರ್ಥ ಕಾದಿದೆ’ ಎಂದು ಎಚ್ಚರಿಕೆಯನ್ನೂ ಕೊಟ್ಟು ಮರಳಿ ಬಂದ ಸುಗ್ರೀವ.
