ಹೌದು! ಕೋಪ ನಮ್ಮ ಜೀವನದ ಬಹುತೇಕ ಸಂದರ್ಭಗಳಲ್ಲಿ ಆವರಿಸಿಕೊಂಡುಬಿಡುತ್ತದೆ. ಹೇಗೆ ಬಿಟ್ಟ ಬಾಣವನ್ನು ಮರಳಿ ಪಡೆಯಲಾಗುವುದಿಲ್ಲವೋ ಹಾಗೆಯೇ ಕೋಪದಲ್ಲಿ ಆಡುವ ಬೇಡದ ಮಾತುಗಳನ್ನೂ ಮರಳಿ ಪಡೆಯಲಾಗದು. ಅವು ಎದುರಿಗಿರುವವರನ್ನು ನೋಯಿಸಿದರೆ, ಖುಷಿಯಲ್ಲಿರುವಾಗ ಆಡುವ ಮಾತುಗಳು ನಮ್ಮ ಬಗ್ಗೆ ನಮಗೇ ತಿಳಿಯದಂತೆ ಹಲವಾರು ವಿಷಯಗಳನ್ನು ನಾಲಿಗೆಯಿಂದ ಜಾರಿಸಿಬಿಡುತ್ತವೆ. ಅಂತೆಯೇ ಆತಂಕದಲ್ಲಿ ಇರುವಾಗ ಆಡುವ ಮಾತುಗಳು ದೌರ್ಬಲ್ಯವನ್ನು ಎದುರಾಳಿಗೆ ತಿಳಿಯುವಂತೆ ಮಾಡುತ್ತವೆ. ಆದ್ದರಿಂದ ಕೋಪ, ಖುಷಿ, ಉದ್ವೇಗ, ಆತಂಕದಲ್ಲಿ ಇರುವಾಗ ನಮ್ಮ ಅಂತರಾತ್ಮದೊಡನೆಯೇ ಮಾತನಾಡುವುದು ಒಳಿತು. ಇನ್ನು ಸತ್ಯದ ನುಡಿಗಳು ಆ ಕ್ಷಣ ನೋವನ್ನುಂಟು ಮಾಡಿದರೂ ಅವುಗಳೇ ವಾಸ್ತವ. ಅವುಗಳನ್ನು ಸ್ವೀಕರಿಸದೇ ಬೇರೆ ದಾರಿಯಿಲ್ಲ. ವಾಸ್ತವಿಕತೆಗಳನ್ನು ಅರಿತು ಅದನ್ನು ಸ್ವೀಕರಿಸುವ ಮನಸ್ಥಿತಿ, ಗುಣ ಇಲ್ಲದಿರುವಾಗ ಸಂಘರ್ಷ ಉಂಟಾಗುತ್ತದೆ. ಆದ್ದರಿಂದ ಸತ್ಯದ ಮಹತ್ವವನ್ನು ಅರಿಯುತ್ತ ಅವುಗಳನ್ನೇ ಆಡುವ ಸಂಕಲ್ಪ ನಮ್ಮದಾಗಲಿ.
