ಕನಕದಾಸರ ‘ರಾಮಧಾನ್ಯ ಚರಿತೆ’ಯಲ್ಲಿ ಮೇಲ್ವರ್ಗದ ಆಹಾರ ಧಾನ್ಯವಾದ ಭತ್ತ ಹಾಗೂ ಕೆಳವರ್ಗದ ಆಹಾರ ಧಾನ್ಯವಾದ ನರೆದಲೆಗ(ರಾಗಿ) ನಡುವಿನ ಶ್ರೇಷ್ಠತೆಯ ಕಾಳಗ ವಿಶಿಷ್ಟವಾಗಿ ಬಣ್ಣಿಸಲ್ಪಟ್ಟಿದೆ. ಭತ್ತ ಮತ್ತು ನರೆದಲೆಗ ನಡುವೆ ಶ್ರೇಷ್ಠತೆಯ ವಾಕ್ಸಮರ ನಡೆದು ಕೊನೆಗೆ ನಿರ್ಣಯಕ್ಕೆಂದು ರಾಮನ ಮೊರೆಹೋಗುತ್ತವೆ. ಎರಡೂ ಧಾನ್ಯಗಳ ವಾದ ಆಲಿಸಿದ ರಾಮ ಆ ಕ್ಷಣವೇ ಯಾವುದೇ ತೀರ್ಪು ನೀಡದೆ ಪರಾಂಬರಿಸಿ ನೋಡುವ ತನ್ನ ನ್ಯಾಯಶೀಲಗುಣವನ್ನು ಪ್ರಕಟಿಸುತ್ತಾನೆ. ಆ ಎರಡೂ ಧಾನ್ಯಗಳಿಗೆ ಆರು ತಿಂಗಳ ಸೆರೆವಾಸ ವಿಧಿಸಿ ನಂತರ ಅವುಗಳ ಶ್ರೇಷ್ಠತೆ ನಿರ್ಧರಿಸೋಣ ಎಂದು ಸೂಚಿಸುತ್ತಾನೆ. ಸೆರೆವಾಸದ ಅವಧಿ ಮುಗಿದ ಬಳಿಕ ರಾಮ ಎಲ್ಲ ರಾಜರು, ಮುನಿಗಳ ಸಮ್ಮುಖದಲ್ಲಿ ಸಭೆ ಸೇರಿಸಿ ಧಾನ್ಯಗಳನ್ನು ತರಿಸುತ್ತಾನೆ. ಇವೆರಡರ ಪೈಕಿ ಯಾವುದು ಸತ್ವಯುತವಾದ ಧಾನ್ಯವೆಂದು ನಿಷ್ಪಕ್ಷಪಾತವಾಗಿ ನಿರ್ಣಯಿಸುವಂತೆ ಕೋರುತ್ತಾನೆ. ಸೆರೆವಾಸದಲ್ಲಿದ್ದ ಭತ್ತ ಮುಗ್ಗಿ ತನ್ನ ಕಾಂತಿಯನ್ನು ಕಳೆದುಕೊಂಡಿದ್ದರೆ, ನರೆದಲೆಗ ಸ್ವಲ್ಪವೂ ಕಾಂತಿಯನ್ನು ಕಳೆದುಕೊಳ್ಳದೆ ಮತ್ತಷ್ಟು ಕಾಂತಿಯುತವಾಗಿ, ಸತ್ವಯುತವಾಗಿ ಹೊಳಪು ಪಡೆದಿತ್ತು. ಆಸ್ಥಾನಿಗರು ನರೆದಲೆಗವೇ ಸತ್ವಯುತವಾದ ಶ್ರೇಷ್ಠ ಧಾನ್ಯವೆಂದು ತೀರ್ಪು ಮಂಡಿಸಿದರು. ರಾಮ ಸಂತೋಷದಿಂದ ನರೆದಲೆಗಕ್ಕೆ ‘ರಾಘವ’ ಎಂದು ತನ್ನ ಹೆಸರನ್ನೇ ಇಡುತ್ತಾನೆ. ಅಂದಿನಿಂದ ನರೆದಲೆಗ ‘ರಾಗಿ’ ಎಂದು ಪ್ರಖ್ಯಾತಿ ಪಡೆಯಿತು. ಭತ್ತ ಸೋಲಿನಿಂದ ತಲೆತಗ್ಗಿಸಿತು. ಆಗ ರಾಮ, ‘ದೇವತೆಗಳಿಗೆ ಪರಮಾನ್ನ ನೀನು, ನೀನೆಂದೂ ಕೀಳಲ್ಲ’ ಎಂದು ಸಮಾಧಾನಪಡಿಸಿ, ವಾಸ್ತವ ಅರಿತು, ರಾಗ-ದ್ವೇಷಗಳನ್ನು ಬಿಟ್ಟು ರಾಗಿಯೊಂದಿಗೆ ಸ್ನೇಹದಿಂದ ಬಾಳುವಂತೆ ಸೂಚಿಸಿದ.
