ನೌಕರನ ಜಾಣ್ಮೆಗೆ ಖುಷಿ ಪಟ್ಟು, ‘ಇದು ನಿನಗೆ ಹೇಗೆ ತಿಳಿಯಿತು’ ಎಂದು ಕೇಳಿದಾಗ, ‘ಕುದುರೆ ಹುಲ್ಲು ತಿನ್ನುವಾಗ ತಲೆ ಮೇಲೆತ್ತಿ ತಿನ್ನದೇ ಹಸುವಿನಂತೆ ಬಗ್ಗಿ ತಿನ್ನುವುದನ್ನು’ ನೋಡಿದೆ ಎಂದ. ರಾಜ ಆತನ ಗ್ರಹಿಕೆಯನ್ನು ಮೆಚ್ಚಿ ಅವನಿಗೆ ದವಸಧಾನ್ಯ, ಕುರಿ, ಕೋಳಿಗಳನ್ನು ಬಹುಮಾನವಾಗಿ ನೀಡಿ, ರಾಣಿಯ ಅಂತಃಪುರದ ಮೇಲ್ವಿಚಾರಕನನ್ನಾಗಿ ನೇಮಿಸಿದ. ಕೆಲ ದಿನಗಳ ತರುವಾಯ ರಾಣಿಯ ಗುಣಸ್ವಭಾವದ ಬಗ್ಗೆ ವಿಚಾರಿಸಿದಾಗ- ‘ರಾಣಿಯವರೇನೋ ಒಳ್ಳೆಯವರೇ. ಆದರೆ ಅವರು ರಾಜಕುಟುಂಬದಿಂದ ಬಂದವರಲ್ಲ’ ಎಂದ. ರಾಣಿಯ ತಾಯಿಯನ್ನು ರಾಜ ಕೇಳಿದಾಗ, ‘ನನಗೆ ಮಗಳು ಹುಟ್ಟುವಾಗಲೇ ನಿಮ್ಮ ತಂದೆ ನಿಮಗೇ ಅವಳನ್ನು ಮದುವೆ ಮಾಡಿಸಬೇಕು’ ಎಂದು ಮಾತು ಪಡೆದಿದ್ದರು. ಆದರೆ ಹುಟ್ಟಿದ ಮಗಳು ನಾಲ್ಕೇ ತಿಂಗಳಲ್ಲಿ ಸತ್ತು ಹೋದದ್ದರಿಂದ ದನಕಾಯುವವರ ಬಳಿ ಹೆಣ್ಣುಮಗಳನ್ನು ದತ್ತು ಪಡೆದು ಸಾಕಿದೆವು’ ಎಂದಳು. ‘ರಾಣಿ ರಾಜಮನೆತನದವಳಲ್ಲ ಎಂದು ನಿನಗೆ ಹೇಗೆ ತಿಳಿಯಿತು?’ ಎಂದಾಗ, ‘ವೇಷಭೂಷಣ ರಾಣಿಯಂತಿದ್ದರೂ ಅವರಲ್ಲಿ ರಾಜಮನೆತನದ ಘನತೆ, ಗಾಂಭೀರ್ಯದ ಬದಲಿಗೆ ಒಬ್ಬ ಹಳ್ಳಿಹೆಂಗಸಿನ ನಡೆಯನ್ನು ಗಮನಿಸಿದೆ’ ಎಂದ.
