ಮೂವತ್ತರ ವಯಸ್ಸಿನಲ್ಲಿಯೇ ಯಶಸ್ವಿ ಕೈಗಾರಿಕೋದ್ಯಮಿ ಎನಿಸಿಕೊಂಡು, ಅಮೆರಿಕದ ಶ್ರೀಮಂತರಲ್ಲೊಬ್ಬರಾದವರು ಆಂಡ್ರೂವ್ ಕಾರ್ನೆಗಿ. ಅವರು ಮರಣಕಾಲದಲ್ಲೊಮ್ಮೆ ತಮ್ಮ ಸೆಕ್ರೆಟರಿಯನ್ನು ಪ್ರಶ್ನಿಸುತ್ತ, ‘ಸರಿಯಾಗಿ ಯೋಚಿಸಿ ಪ್ರಾಮಾಣಿಕವಾಗಿ ಹೇಳು. ದೇವರು ನಿನ್ನೆದುರು ಬಂದು, ನೀನು ಸೆಕ್ರೆಟರಿಯಾಗೇ ಇರಲು ಬಯಸುವೆಯೋ ಅಥವಾ ಕಾರ್ನೆಗಿಯಾಗಲು ಬಯಸುವೆಯೋ ಎಂದು ಕೇಳಿದರೆ ಏನೆಂದು ಉತ್ತರಿಸುವೆ?’ ಎಂದಾಗ ಆತ ‘ಸರ್, ಸತ್ಯವನ್ನೇ ಹೇಳುತ್ತೇನೆ. ನಾನು ಸೆಕ್ರೆಟರಿಯೇ ಆಗಿರಲು ಬಯಸುವೆ. ಪ್ರತಿದಿನ ಆಫೀಸಿಗೆ ಎಲ್ಲರಿಗಿಂತ ಮುಂಚೆ ಬಂದು, ಎಲ್ಲರಿಗಿಂತ ಕೊನೆಯಲ್ಲಿ ಹೋಗುತ್ತೀರಿ. ಸರಿಯಾಗಿ ಊಟ ನಿದ್ರೆ, ವಿಶ್ರಾಂತಿಗಳಿಲ್ಲದೆ ಕೆಲಸದಲ್ಲಿ ತಲ್ಲೀನರಾಗಿರುತ್ತೀರಿ. ಎಷ್ಟೊಂದು ಕಷ್ಟ ಪಡುತ್ತೀರಿ. ಗಳಿಸಿರುವುದಕ್ಕಿಂತ ಹೆಚ್ಚಿನ ಹೆಸರು ಮತ್ತು ಹಣ ಗಳಿಸಲು ಸದಾ ಯೋಚನೆ, ಚಿಂತೆಯಲ್ಲಿ ಮುಳುಗಿರುತ್ತೀರಿ. ಸಮಾಧಾನದ ಜೀವನ ಕೊಡದ ಶ್ರೀಮಂತಿಕೆ ಇದ್ದರೆಷ್ಟು ಬಿಟ್ಟರೆಷ್ಟು? ನಾನಂತೂ ಈ ಜನುಮದಲ್ಲಿ ಕಾರ್ನೆಗಿ ಆಗಲಾರೆ’ ಎಂದ.
