ನಂದೊಂದು ಕಥೆ: ಎಲ್ಲವೂ ಹಂಗಿಸುತ್ತಿವೆ, ಏನು ಮಾಡಲಿ?

ಹೆಂಡತಿ ಹಾಗೂ ಮಗನ ಜತೆ ನನ್ನದು ಸುಖಿ ಕುಟುಂಬ. ಒಂದು ಮೂರ್ಖ ಕೆಲಸದಿಂದ ಈಗ ಚಿಂತಿಸುವಂತೆ ಆಗಿದೆ. ನಮ್ಮದು ಬಡ ಕುಟುಂಬವಾದರೂ ಬೆಂಗಳೂರಿನಲ್ಲಿ ಸ್ವಂತ ಮನೆ ಕಟ್ಟಬೇಕೆನ್ನುವ ಕನಸು. ಯಾರಿಗೋ ಒಂದು ಲಕ್ಷ ರೂಪಾಯಿ ಕೊಟ್ಟು ಮೋಸ ಹೋಗಿದ್ದೇನೆ. ನನ್ನ ಹೆಂಡತಿ ಸಮಾಧಾನ ಮಾಡುತ್ತಾಳೆ. ನಾನೂ ಈಗ ಸಮಾಧಾನ ಮಾಡಿಕೊಂಡಿದ್ದೇನೆ. ಆದರೆ ನನ್ನ ಸುತ್ತ ಕೆಲವು ವಿಚಿತ್ರ ಘಟನೆಗಳು ನಡೆಯುತ್ತಿವೆ ಎನಿಸುತ್ತಿದೆ.

1) ದಿನಕ್ಕೊಮ್ಮೆಯಾದರೂ ಯಾರಾದರೂ ಸೈಟು ಮನೆಗಳ ಬಗ್ಗೆ ನನ್ನ ಹತ್ತಿರವೇ ಮಾತಾಡುತ್ತಾರೆ. 2) ನಮ್ಮ ಮನೆಗೆ ಬರುವ ದಿನ ಪತ್ರಿಕೆಯಲ್ಲಿ ಪ್ರತಿನಿತ್ಯ ಸೈಟು ಮನೆಗಳ ಜಾಹೀರಾತುಗಳ ಕರಪತ್ರಗಳು ಬಂದು ಬೀಳುತ್ತವೆ. 3) ನನಗಿಂತ ಕಡಿಮೆ ಸಂಬಳ ಇರುವವನು ಗೃಹಪ್ರವೇಶಕ್ಕೆ ಕರೆಯುತ್ತಾನೆ. 4) ಹೊಸವರ್ಷದ ಕ್ಯಾಲೆಂಡರ್ ಹಿಂದೆ ಇರುವ ವರ್ಷ ಭವಿಷ್ಯದಲ್ಲಿ ನನ್ನ ರಾಶಿಗೆ ಈ ವರ್ಷ ಹೊಸಮನೆ ಕಟ್ಟುವ ಯೋಗ ಎಂದಿದೆ. ಹೀಗೇ ಇನ್ನೂ ಏನೇನೋ... ಈ ಘಟನೆಗಳೆಲ್ಲಾ ನೀನು ಮೂರ್ಖ ದುಡ್ಡು ಕಳಕೊಂಡೆ ಎಂದು ಹಂಗಿಸುತ್ತಿವೆಯೇ? ಅಥವಾ ಸ್ವಂತ ಮನೆಯಾಗುವ ಯೋಗವಿದೆ ಎಂದೇ ಹೇಳುತ್ತಿವೆಯೇ? ಇಂಥ ಪ್ರಶ್ನೆಗಳಿಂದ ಕೆಲಸದಲ್ಲಿ ಗಮನ ಹರಿಸಲು ಕಷ್ಟವಾಗುತ್ತಿದೆ. ರಾತ್ರಿ ನಿದ್ದೆ ಬರುವುದಿಲ್ಲ. ಊಟ ಸೇರುತ್ತಿಲ್ಲ. ನನಗೆ ಮಾನಸಿಕ ರೋಗವೇನಾದರೂ ಬರುತ್ತಿದೆಯೇ?

ನೀವೀಗ ಮುಖ್ಯವಾಗಿ ನಿಮ್ಮ ಮನಸ್ಸಿಗೆ ಒಂದು ಟ್ರೖೆನಿಂಗ್ ಕೊಡಬೇಕಾಗಿದೆ. ನಿಮಗಿನ್ನೂ 38 ವರ್ಷ. ಮುಂದಿನ ಬದುಕು ವಿಶಾಲವಾಗಿಯೇ ಇದೆ. ಇನ್ನೊಂದು ನಾಲ್ಕು ವರ್ಷದ ನಂತರ ಮನೆಕಟ್ಟುವ ಸಾಧ್ಯತೆ ಖಂಡಿತಾ ಬರಬಹುದು. ಗಂಡಹೆಂಡತಿ ಇಬ್ಬರೂ ಉದ್ಯೋಗದಲ್ಲಿರುವುದರಿಂದ ಬ್ಯಾಂಕಿನಲ್ಲಿ ಸಾಲ ತೆಗೆದರೂ ತಿಂಗಳು ತಿಂಗಳಿಗೆ ಕಂತು ಕಟ್ಟುವುದು ಕಷ್ಟವೇನಾಗಲಾರದು. ಇಂಥ ಸಕಾರಾತ್ಮಕ ಕನಸುಗಳನ್ನು ನೀವು ಯೋಚಿಸಬೇಕು. ಎಲ್ಲಕ್ಕಿಂತ ಮುಖ್ಯವಾಗಿ ಸುತ್ತಲಿನ ಪರಿಸರ ನಿಮಗೆ ಯಾವ ಸಂದೇಶವನ್ನೂ ಕೊಡುತ್ತಿಲ್ಲ ಎನ್ನುವುದನ್ನು ಮನಗಾಣಬೇಕು. ಆಫೀಸಿನಲ್ಲಿ ಸೈಟು ಮನೆ ಬಗ್ಗೆ ಮಾತಾಡುವುದು, ದಿನಪತ್ರಿಕೆಯಲ್ಲಿ ಕರಪತ್ರ ಬರುವುದು, ನೆಂಟರು ಗೃಹಪ್ರವೇಶಕ್ಕೆ ಆಹ್ವಾನಿಸುವುದು, ವರ್ಷಭವಿಷ್ಯದಲ್ಲಿ ಮನೆಯ ಬಗ್ಗೆ ಇರುವುದು ಇವು ಯಾವುವೂ ನಿಮಗಾಗಿಯೆಂದು ಈಗ ಹುಟ್ಟಿದ ವಿಷಯಗಳಲ್ಲ. ಇವು ದಿನನಿತ್ಯದ ವಿದ್ಯಮಾನಗಳು. ಅದಕ್ಕೂ ನೀವು ಸೈಟಿನ ಬಗ್ಗೆ ಚಿಂತಿಸುವುದಕ್ಕೂ ಆದಷ್ಟು ಥಳಕು ಹಾಕುವುದನ್ನು ಪ್ರಯತ್ನ ಪೂರ್ವಕವಾಗಿ ನಿಲ್ಲಿಸಬೇಕಾಗುತ್ತದೆ. ‘ಇಂಥ ವಿಷಯಗಳಿಗೆ ನಾನು ಹೆಚ್ಚು ಗಮನವನ್ನು ಕೊಡುವುದಿಲ್ಲ, ಇವು ನನಗಾಗಿ ಹುಟ್ಟಿದ ವಿಷಯಗಳಲ್ಲ, ಸಹಜವಾಗಿ ಇಂಥ ವಿದ್ಯಮಾನಗಳು ನಮ್ಮ ಸುತ್ತ ನಡೆಯುತ್ತಲೇ ಇರುತ್ತವೆ’ ಎಂದು ಪದೇಪದೇ ಹೇಳಿಕೊಳ್ಳುತ್ತಿರಬೇಕು. ನಿಮ್ಮ ಎರಡು ಮಾತು ಸ್ವಲ್ಪ ಗಂಭೀರವಾಗಿದೆ. ರಾತ್ರಿ ನಿದ್ದೆ ಬರುತ್ತಿಲ್ಲವೆನ್ನುವುದು ಮತ್ತು ಊಟ ಬೇಡವೆನಿಸುವುದು ಒಳ್ಳೆಯ ಲಕ್ಷಣವಲ್ಲ. ಈ ಬಗ್ಗೆ ಒಮ್ಮೆ ವೈದ್ಯರನ್ನು ಕಾಣಬೇಕಾಗುತ್ತದೆ. ಅಲಕ್ಷ್ಯ ಮಾಡಿದರೆ ಒತ್ತಡ ಜಾಸ್ತಿಯಾಗಿ ಮನೋವೈದ್ಯರ ಹತ್ತಿರ ಹೋಗಬೇಕಾಗುತ್ತದೆ. ಈಗ ಜನರಲ್ ಫಿಸಿಷಿಯನ್ ಹತ್ತಿರ ಹೋಗಿ ನಿದ್ದೆ ಬರಲು ಮತ್ತು ಊಟ ಸೇರಲು ಮಾತ್ರೆಗಳನ್ನು ಕೊಡುತ್ತಾರಾ ವಿಚಾರಿಸಿ.

ಶಾಂತಾ ನಾಗರಾಜ್ ಅವರಿಂದ ಉಚಿತ ಸಲಹೆಗಾಗಿ (ಸಂಜೆ 6ರಿಂದ 8) ಈ ಕೆಳಗಿನ ವಿಳಾಸದಲ್ಲಿ ನೇರವಾಗಿ ಭೇಟಿ ಮಾಡಬಹುದು. ಮೊದಲೇ ಅಪಾಯಿಂಟ್​ವೆುಂಟ್ ತೆಗೆದುಕೊಳ್ಳುವ ಅಗತ್ಯವಿಲ್ಲ. ಪ್ರತಿ ಸೋಮವಾರ: ಅರುಣಚೇತನ, ಕ್ಲೂನಿ ಕಾನ್ವೆಂಟ್ ಎದುರು, ಎಂ.ಇ.ಎಸ್ ಕಾಲೇಜ್ ಹಿಂಭಾಗ, ಮಲ್ಲೇಶ್ವರ, ಬೆಂಗಳೂರು. ಪ್ರತಿ ತಿಂಗಳ ಕೊನೆಯ ಗುರುವಾರ: ನಚಿಕೇತ ಮನೋವಿಕಾಸ ಕೇಂದ್ರ, 14ನೇ ಕ್ರಾಸ್, ಎಂ.ಸಿ. ಲೇಔಟ್, ವಿಜಯನಗರ, ಬೆಂಗಳೂರು. ಪತ್ರ ಬರೆಯುವವರು ವಿಜಯವಾಣಿ ಲಲಿತಾ ಪುರವಣಿಗೆ ಬರೆಯಬೇಕು.