ಎಲ್ಲರೂ ಮಿತವಾಗಿ ಬಳಸಬಹುದಾದ ಮನೆ ಮದ್ದು ಕಾಮ ಕಸ್ತೂರಿ

ದೇಹಕ್ಕೆ ಉಷ್ಣವಾದಾಗ ಬಹುತೇಕ ಮನೆಗಳಲ್ಲಿ ಅಜ್ಜಿಯಂದಿರು ದೇಹವನ್ನು ತಂಪು ಮಾಡುವ ಮನೆಮದ್ದಾಗಿ ಬಳಸುವ ಮೊದಲನೇ ಔಷಧವೆಂದರೆ ಅದು ಕಾಮಕಸ್ತೂರಿ. ಕಾಮಕಸ್ತೂರಿ ಬೀಜವು ದೇಹವನ್ನು ತಂಪು ಮಾಡುವುದಷ್ಟೇ ಅಲ್ಲ, ಹಲವು ಕಾಯಿಲೆಗಳನ್ನು ಗುಣಪಡಿಸುವ ಶಕ್ತಿಯನ್ನೂ ಹೊಂದಿದೆ. ಆಯುರ್ವೇದದಲ್ಲಿ ಕಾಮಕಸ್ತೂರಿಯನ್ನು ಕೆಮ್ಮು, ತಲೆ ನೋವು, ಭೇದಿ, ಜಂತುಹುಳುಗಳ ಸಮಸ್ಯೆಗಳನ್ನು ಗುಣಪಡಿಸಲು ಮತ್ತು ದೇಹದಿಂದ ವಿಷವನ್ನು ಹೊರಹಾಕಲು ಬಳಸುತ್ತಾರೆ. ಭಾವಪ್ರಕಾಶ ನಿಂಟು ಎಂಬ ಆಯುರ್ವೇದ ಗ್ರಂಥದ ಪ್ರಕಾರ ಕಾಮಕಸ್ತೂರಿ ದೇಹವನ್ನು ತಂಪುಗೊಳಿಸಲು ಅತ್ಯಂತ ಸಹಕಾರಿ. ಕಾಮಕಸ್ತೂರಿಯ ವಿಶೇಷತೆ ಯೇನೆಂದರೆ ಇದು ಶೀತ ಗುಣವನ್ನು ಹೊಂದಿದ್ದರೂ ಅಲರ್ಜಿ, ನೆಗಡಿ, ಕಫದಂತಹ ಸಮಸ್ಯೆಗಳಿಗೆ ಕಾರಣವಾಗುವುದಿಲ್ಲ. ಏಕೆಂದರೆ ಇದಕ್ಕೆ ಕಫ ಮತ್ತು ವಾತ ದೋಷಗಳನ್ನು ನಿಯಂತ್ರಿಸುವ ಗುಣವಿದೆ ಎಂದು ಆಯುರ್ವೇದ ಹೇಳುತ್ತದೆ. ಹಾಗಾಗಿ ಕಫದ ಭಯವಿಲ್ಲದೆ ಇದನ್ನು ಬಳಸಬಹುದು.

ಕಾಮಕಸ್ತೂರಿ ಬೀಜಗಳಲ್ಲಿ ಒಮೆಗಾ 3 ಕೂಡ ಹೇರಳವಾಗಿದೆ; ದೊಡ್ಡ ಪ್ರಮಾಣದಲ್ಲಿ ನಾರಿನಂಶವಿದೆ. ಹಾಗಾಗಿ ಇದನ್ನು ಬಳಸುತ್ತಿದ್ದರೆ ಕರುಳು ಮತ್ತು ಮಿದುಳು ಎರಡರ ಆರೋಗ್ಯವೂ ಚೆನ್ನಾಗಿರುತ್ತದೆ. ನಾರಿನಂಶವಿರುವ ಕಾರಣ ಮಲಬದ್ಧತೆಯಲ್ಲಿ ಇದು ತುಂಬಾ ಅನುಕೂಲಕರ. ಸಂಜೆಯ ಸಮಯದಲ್ಲಿ ಇದನ್ನು ಸೇವಿಸಿದರೆ ಮರುದಿನ ಸುಲಭವಾಗಿ ಮಲವಿಸರ್ಜನೆ ಆಗುತ್ತದೆ. ತೂಕ ಇಳಿಸಿಕೊಳ್ಳಲು ಡಯಟ್​ ಮಾಡುತ್ತಿರುವವರಿಗೆ ಅಸಿಡಿಟಿಯ ಸಮಸ್ಯೆ ಕಾಡಿದರೆ ಕಾಮಕಸ್ತೂರಿ ಬೀಜವನ್ನು ಸೇವಿಸುವುದು ಅತ್ಯುತ್ತಮವಾದ ಆಯ್ಕೆ. ಇದರಿಂದ ಹೊಟ್ಟೆ ತುಂಬಿದಂತೆ ಎನಿಸಿ ಹೊಟ್ಟೆ ಉರಿಯು ಕಡಿಮೆಯಾಗಿ ತೂಕ ಹೆಚ್ಚಾಗದಂತೆ ನೋಡಿಕೊಳ್ಳಲು ಸಹಾಯವಾಗುತ್ತದೆ. ಉಷ್ಣತೆಯಿಂದ ಬಳಲುತ್ತಿರುವವರು ಗುಲ್ಕಂದ್​ ಜತೆ ಇವನ್ನು ಸೇವಿಸಿದರೆ ದೇಹವು ಸದಾ ತಂಪಾಗಿರುತ್ತದೆ. ಈ ಬೀಜಗಳಲ್ಲಿ ವಿಟಮಿನ್​ ಕೆ ಇರುವ ಕಾರಣದಿಂದ ಮೂಳೆ, ಕೂದಲು ಮತ್ತು ಚರ್ಮದ ಆರೋಗ್ಯ ಚೆನ್ನಾಗಿ ರುತ್ತದೆ. ಇದರಲ್ಲಿ ಕಬ್ಬಿಣಾಂಶವು ಇರುವ ಕಾರಣ ರಕ್ತಹಿನತೆಯಲ್ಲಿಯೂ ಅನುಕೂಲಕರ. ಆಂಟಿಆಕ್ಸಿ ಡೆಂಟ್​ ಗಳಿಂದಾಗಿ ಕ್ಯಾನ್ಸರ್​ ಮತ್ತು ಅಲ್ಜೆಮರ್​ ನಂತಹ ರೋಗಗಳನ್ನು ದೂರವಿಡಲು ಇದು ಸಹಕರಿಸುತ್ತದೆ. ಇಷ್ಟು ಒಳ್ಳೆಯ ವಸ್ತುವಾದರೂ ಅತಿಯಾದ ಬಳಕೆ ಸರಿಯಲ್ಲ. ನಿತ್ಯ ಮೂರರಿಂದ ನಾಲ್ಕು ಗ್ರಾಂನಷ್ಟು ಬೀಜಗಳನ್ನು ಬಳಕೆ ಮಾಡಬಹುದು. ತರಕಾರಿ ಸಲಾಡ್​ಗಳಲ್ಲಿ, ಹಣ್ಣುಗಳಲ್ಲಿ, ಪಲ್ಯದಲ್ಲಿ, ಹಾಲಿನಲ್ಲಿ ಅಥವಾ ನೀರಿನಲ್ಲಿ ಹಾಕಿ ಸೇವಿಸಬಹುದು. ಗರ್ಭಾವಸ್ಥೆಯಲ್ಲಿ, ಚಿಕ್ಕ ಮಕ್ಕಳಲ್ಲಿ ಮತ್ತು ಎದೆಹಾಲು ಕೊಡುವ ಸಂದರ್ಭಗಳಲ್ಲಿ ಕಾಮ ಕಸ್ತೂರಿಯನ್ನು ವೈದ್ಯರ ಸಲಹೆಯ ಮೇರೆಗೇ ಬಳಸಬೇಕು.

(ಪ್ರತಿಕ್ರಿಯಿಸಿ: vvsudina@gmail.com)