ಬೆರಳಿನಲ್ಲಿ ಉಂಗುರ ಸಿಲುಕಿ ಒದ್ದಾಡುತ್ತಿದ್ದೀರಾ? ನೋವಿಲ್ಲದೆ ಸುಲಭವಾಗಿ ತೆಗೆಯಲು ಇಲ್ಲಿದೆ ಸಿಂಪಲ್ ಟ್ರಿಕ್! Ring Stuck On Finger

ಹೀಗೆ ಉಂಗುರ ಸಿಲುಕಿಕೊಂಡಾಗ ಜನರು ಸಾಮಾನ್ಯವಾಗಿ ಭಯಭೀತರಾಗುತ್ತಾರೆ. ಗಾಬರಿಯಲ್ಲಿ ಅದನ್ನು ಬಲವಂತವಾಗಿ ಎಳೆದು ತೆಗೆಯಲು ಪ್ರಯತ್ನಿಸುತ್ತಾರೆ. ಆದರೆ, ಈ ರೀತಿ ಮಾಡುವುದರಿಂದ ಬೆರಳಿನ ಚರ್ಮವು ಸಿಪ್ಪೆ ಸುಲಿಯುತ್ತದೆ, ರಕ್ತ ಒಸರಬಹುದು ಮತ್ತು ಬೆರಳು ಕೆಂಪಗಾಗಿ ಊತ ಮತ್ತಷ್ಟು ಹೆಚ್ಚಾಗುತ್ತದೆ. ಬೆರಳಿಗೆ ರಕ್ತ ಪರಿಚಲನೆ ಸ್ಥಗಿತಗೊಂಡಾಗ ನೋವು ಅಸಹನೀಯವಾಗುತ್ತದೆ. ಕೊನೆಗೆ ಬೇರೆ ದಾರಿ ಕಾಣದೆ ಆಭರಣವನ್ನು ಕತ್ತರಿಸಲು ಮುಂದಾಗುತ್ತಾರೆ. ಆದರೆ, ನಿಮ್ಮ ಅಮೂಲ್ಯವಾದ ಉಂಗುರಕ್ಕೆ ಯಾವುದೇ ಹಾನಿ ಮಾಡದೆ, ಬೆರಳಿಗೂ ನೋವಾಗದಂತೆ ಅತ್ಯಂತ ಸರಳವಾಗಿ ಅದನ್ನು ಹೊರತೆಗೆಯಲು ಕೆಲವು ಅದ್ಭುತ ಗೃಹೋಪಾಯಗಳು ಇಲ್ಲಿವೆ.

ನಿಮ್ಮ ಬೆರಳು ತುಂಬಾ ಊದಿಕೊಂಡಿದ್ದರೆ, ಮೊದಲು ಒಂದು ಬಟ್ಟಲಿಗೆ ತಣ್ಣೀರು ಮತ್ತು ಐಸ್​ಕ್ಯೂಬ್​ಗಳಿಂದ ತುಂಬಿಸಿ. ನಂತರ ಈ ತಣ್ಣೀರಿನಲ್ಲಿ ನಿಮ್ಮ ಬೆರಳನ್ನು ಕೆಲವು ನಿಮಿಷಗಳ ಕಾಲ ಅದ್ದಿ. ಕೋಲ್ಡ್​ ನಿಮ್ಮ ಬೆರಳಿನಲ್ಲಿರುವ ರಕ್ತನಾಳಗಳನ್ನು ಸಂಕುಚಿತಗೊಳಿಸುತ್ತದೆ ಮತ್ತು ಊತವನ್ನು ಕಡಿಮೆ ಮಾಡುತ್ತದೆ. ಇದರಿಂದಾಗಿ ಉಂಗುರವನ್ನು ಬೆರಳಿನಿಂದ ಹೊರ ತೆಗೆಯಲು ಸುಲಭವಾಗುತ್ತದೆ.

ನಿಮ್ಮ ಬೆರಳಿನಲ್ಲಿ ಉಂಗುರ ಸಿಲುಕಿಕೊಂಡಿದ್ದರೆ ಅದನ್ನು ಹೊರ ತೆಗೆಯಲು ಸೋಪಿನ ನೊರೆ ಉತ್ತಮ. ನಿಮ್ಮ ಬೆರಳಿಗೆ ಸೋಪಿನ ನೊರೆ, ಪಾತ್ರೆ ತೊಳೆಯುವ ಜೆಲ್ ಅಥವಾ ಶಾಂಪೂವನ್ನು ಹೇರಳವಾಗಿ ಹಚ್ಚಿ ನೊರೆ ಬರುವ ರೀತಿಯಲ್ಲಿ ಉಜ್ಜಿರಿ. ನಂತರ ಉಂಗುರವನ್ನು ವೃತ್ತಾಕಾರದಲ್ಲಿ ನಿಧಾನವಾಗಿ ತಿರುಗಿಸಿ ಮೇಲಕ್ಕೆ ಎಳೆಯಿರಿ.

ಇದು ವೈದ್ಯರೂ ಬಳಸುವ ಅತ್ಯಂತ ಸುರಕ್ಷಿತ ಮತ್ತು ವೈಜ್ಞಾನಿಕ ವಿಧಾನವಾಗಿದೆ. ಒಂದು ಗಟ್ಟಿ ದಾರ ಅಥವಾ ಹಲ್ಲು ಸ್ವಚ್ಛಗೊಳಿಸುವ ದಾರವನ್ನು ತೆಗೆದುಕೊಂಡು, ಅದರ ಒಂದು ತುದಿಯನ್ನು ಉಂಗುರದ ಒಳಗಿನಿಂದ ತೂರಿಸಿ ಮುಂಭಾಗಕ್ಕೆ ಎಳೆದುಕೊಳ್ಳಿ. ನಂತರ, ಉಳಿದ ದಾರವನ್ನು ಉಂಗುರದ ಮುಂದಿರುವ ಇಡೀ ಬೆರಳಿನ ಸುತ್ತಲೂ ಗಟ್ಟಿಯಾಗಿ ಸುತ್ತಿ. ಇದು ಬೆರಳಿನ ಊತವನ್ನು ಒತ್ತಿ ಹಿಡಿಯಲು ಸಹಾಯ ಮಾಡುತ್ತದೆ. ಕೊನೆಯದಾಗಿ, ಉಂಗುರದ ಒಳಗಿರುವ ದಾರದ ಮೊದಲ ತುದಿಯನ್ನು ಹಿಡಿದು ನಿಧಾನವಾಗಿ ವಿರುದ್ಧ ದಿಕ್ಕಿನಲ್ಲಿ ಬಿಚ್ಚುತ್ತಾ ಬನ್ನಿ. ದಾರ ಬಿಚ್ಚಿಕೊಳ್ಳುತ್ತಿದ್ದಂತೆ, ಉಂಗುರವು ಯಾವುದೇ ನೋವಿಲ್ಲದೆ ತಾನಾಗಿಯೇ ಬೆರಳಿನಿಂದ ಜಾರಿ ಹೊರಬರುತ್ತದೆ.

ಒಣ ಚರ್ಮದಿಂದಾಗಿ ಉಂಗುರ ಸಿಲುಕಿಕೊಂಡಿದ್ದರೆ, ನಿಮ್ಮ ಬೆರಳಿಗೆ ವ್ಯಾಸಲೀನ್, ಸಾಸಿವೆ ಎಣ್ಣೆ ಅಥವಾ ತೆಂಗಿನ ಎಣ್ಣೆಯನ್ನು ಹೇರಳವಾಗಿ ಹಚ್ಚಿ. ನಿಮ್ಮ ಬೆರಳನ್ನು ನಯಗೊಳಿಸಿದ ನಂತರ, ಉಂಗುರವನ್ನು ವೃತ್ತಾಕಾರವಾಗಿ ತಿರುಗಿಸಿ. ಇದು ಚರ್ಮಕ್ಕೆ ಹಾನಿಯಾಗದಂತೆ ತಡೆಯುತ್ತದೆ. ಮತ್ತು ಉಂಗುರವು ಸುಲಭವಾಗಿ ಹೊರಬರಲು ಅನುವು ಮಾಡಿಕೊಡುತ್ತದೆ.

ನಿಮ್ಮ ಬೆರಳು ತುಂಬಾ ಊದಿಕೊಂಡಿದ್ದರೆ, ನಿಮ್ಮ ಕೈಯನ್ನು ಹೃದಯ ಮಟ್ಟಕ್ಕಿಂತ 5-10 ನಿಮಿಷಗಳ ಕಾಲ ಮೇಲಕ್ಕೆತ್ತಿ. ಇದು ಹೆಚ್ಚುವರಿ ದ್ರವ ಮತ್ತು ರಕ್ತದ ಹರಿವನ್ನು ಬೆರಳಿನ ಕೆಳಗೆ ಸೆಳೆಯುತ್ತದೆ. ಇದರಿಂದ ತಕ್ಷಣವೇ ಊತವನ್ನು ಕಡಿಮೆ ಮಾಡಿ ಉಂಗುರವನ್ನು ತೆಗೆದುಹಾಕಲು ಸಹಾಯ ಮಾಡುತ್ತದೆ (ಏಜೆನ್ಸೀಸ್​).