ಯೋಗ ಕ್ಷೇಮ: ಅಂತಾರಾಷ್ಟ್ರೀಯ ಯೋಗ ದಿನ ಮತ್ತು ಉದ್ದೇಶಗಳು

* ಯಾವಾಗ ಮೊದಲ ಅಂತಾರಾಷ್ಟ್ರೀಯ ಯೋಗದಿನವನ್ನು ಆಚರಿಸಲಾಯಿತು? ಅದರ ಉದ್ದೇಶಗಳು ಯಾವುವು?

| ಗೋಪಾಲ 27 ವರ್ಷ, ಕಾರವಾರ

21 ಜೂನ್ 2015ರಂದು ವಿಶ್ವದಾದ್ಯಂತ ಮೊದಲ ಅಂತಾರಾಷ್ಟ್ರೀಯ ಯೋಗದಿನವನ್ನು ಆಚರಿಸಲಾಯಿತು. ನವದೆಹಲಿಯಲ್ಲಿ 84 ರಾಷ್ಟ್ರಗಳ ಗಣ್ಯರು ಸೇರಿದಂತೆ 35,985 ಜನರು 21 ಯೋಗಾಸನಗಳನ್ನು (ಯೋಗಭಂಗಿಗಳು) 35 ನಿಮಿಷಗಳ ಕಾಲ ಪ್ರದರ್ಶಿಸಲು ಆಯುಷ್ ಸಚಿವಾಲಯದವರು ಅಗತ್ಯ ವ್ಯವಸ್ಥೆಗಳನ್ನು ಮಾಡಿದರು.

ದಿನಾಚರಣೆಯ ಉದ್ದೇಶಗಳು: ಜನರಿಗೆ ಯೋಗದ ಬಗೆಗಿನ ಮಾಹಿತಿ ಮತ್ತು ನೈಸರ್ಗಿಕ ಪ್ರಯೋಜನಗಳನ್ನು ತಿಳಿಸುವುದು. ಯೋಗದ ಪ್ರಯೋಜನಗಳ ಬಗ್ಗೆ ಜನರಿಗೆ ಅರಿವು ಮೂಡಿಸಿ ಮತ್ತು ಅವುಗಳನ್ನು ಪ್ರಕೃತಿಯೊಂದಿಗೆ ಸಂಪರ್ಕಪಡಿಸುವುದು. ವಿಶ್ವದೆಲ್ಲೆಡೆ ಆರೋಗ್ಯ ಸವಾಲಿನ ರೋಗಗಳ ಪ್ರಮಾಣವನ್ನು ಕಡಿಮೆ ಮಾಡುವುದು. ಪ್ರಪಂಚದಾದ್ಯಂತ ಬೆಳವಣಿಗೆ, ಅಭಿವೃದ್ಧಿ ಮತ್ತು ಶಾಂತಿಯನ್ನು ಹರಡುವುದು. ದೈಹಿಕ ಮತ್ತು ಮಾನಸಿಕ ಕಾಯಿಲೆಗಳ ಬಗ್ಗೆ ಜನರಿಗೆ ಅರಿವು ಮೂಡಿಸುವುದು ಮತ್ತು ಯೋಗದ ಮೂಲಕ ಪರಿಹಾರಗಳನ್ನು ಒದಗಿಸುವುದು. ದಿನಚರಿಯಲ್ಲಿ ಯೋಗದ ಉಪಯುಕ್ತತೆಯ ಬಗ್ಗೆ ಜನರಿಗೆ ತಿಳಿಸಿ ಪ್ರಪಂಚದಾದ್ಯಂತ ಅಭಿವೃದ್ಧಿ ಮತ್ತು ಶಾಂತಿ ಹರಡುವುದು. ಯೋಗದ ಸಮಗ್ರ ಪ್ರಯೋಜನಗಳ ಕಡೆಗೆ ವಿಶ್ವಾದ್ಯಂತ ಜನರ ಗಮನ ಸೆಳೆಯಲು, ಯೋಗದ ಮೂಲಕ ಜನರಲ್ಲಿ ಜಾಗತಿಕ ಸಮನ್ವಯವನ್ನು ಬಲಪಡಿಸಲು, ಕಾರ್ಯನಿರತ ವೇಳಾಪಟ್ಟಿಯಿಂದ ಆರೋಗ್ಯಕ್ಕಾಗಿ ಒಂದು ದಿನ ಕಳೆಯಲು, ಸಮುದಾಯಗಳನ್ನು ಹೆಚ್ಚು ಹತ್ತಿರ ತರಲು, ಇದು ಮನಸ್ಸಿನ ಶಾಂತಿ, ಒತ್ತಡರಹಿತ ವಾತಾವರಣದಲ್ಲಿ ಬದುಕಲು ಅಗತ್ಯವಾದ ಸ್ವಯಂ ಅರಿವಿಗಾಗಿ ಧ್ಯಾನದ ಅಭ್ಯಾಸವನ್ನು ಬೆಳೆಸುವ ಗುರಿಯನ್ನು ಹೊಂದಿದೆ.

* ವಿಶ್ವ ಯೋಗದಿನದ ಲಾಂಛನದ ಬಗ್ಗೆ ತಿಳಿಸಿ.

| ಈಶ್ವರ 54 ವರ್ಷ, ರಾಮನಗರ

ವಿಶ್ವ ಯೋಗದಿನದ ಲಾಂಛನದಲ್ಲಿ ವ್ಯಕ್ತಿಯ ದೇಹದ ಬಣ್ಣ ನೀಲಿಯಾಗಿದೆ. ಇದು ನೀರಿನ ಅಂಶವನ್ನು ಪ್ರತಿಬಿಂಬಿಸುತ್ತದೆ. ವ್ಯಕ್ತಿಯ ಮುಂದೆ ಕಂದು ಮತ್ತು ಹಸಿರು ಎಲೆಗಳನ್ನು ತೋರಿಸಲಾಗಿದೆ. ಹಸಿರು ಎಲೆಗಳು ಪ್ರಕೃತಿ ಮತ್ತು ಕಂದು ಎಲೆಗಳನ್ನು ಸಂಕೇತಿಸುತ್ತದೆ ಮತ್ತು ಸೌರಶಕ್ತಿಯು ಸ್ಪೂರ್ತಿಯ ಮೂಲವಾಗಿದೆ.

ಇದಲ್ಲದೆ, ಈ ಲಾಂಛನದ ಕೆಳಭಾಗದಲ್ಲಿ ‘ಸಾಮರಸ್ಯ ಮತ್ತು ಶಾಂತಿಗಾಗಿ ಯೋಗ’ ಬರೆಯಲಾಗಿದೆ. ಯೋಗದ ಸಹಾಯದಿಂದ ಜನರು ಸಾಮರಸ್ಯ ಮತ್ತು ಶಾಂತಿಯನ್ನು ಸಾಧಿಸುತ್ತಾರೆ. ಯೋಗವು ಭಾರತದ ಪುರಾತನ ಸಂಪ್ರದಾಯದ ಒಂದು ಅಮೂಲ್ಯ ಕೊಡುಗೆ. ಇದು ದೇಹ ಮತ್ತು ಮನಸ್ಸನ್ನು ಚಿಂತನೆಯೊಂದಿಗೆ, ಮತ್ತು ಕಾರ್ಯವನ್ನು ಸಫಲತೆಯೊಂದಿಗೆ, ಮನುಷ್ಯ-ಪ್ರಕೃತಿಯೊಂದಿಗಿನ ಹೊಂದಾಣಿಕೆಯನ್ನು ಒಟ್ಟಾಗಿರಿಸುತ್ತದೆ.