ವಾಹನಗಳ ವಿಮಾ ಪ್ರೀಮಿಯಂ ಇನ್ನು ಮುಂದೆ ಬದಲಾಗಲಿದ್ದು, ವಾಹನಗಳನ್ನು ಓಡಿಸಿದ್ದಷ್ಟಕ್ಕೇ ವಿಮೆ ಪಾವತಿಸುವಂಥ (ಪೇ ಆಸ್ ಯು ಡ್ರೖೆವ್) ವ್ಯವಸ್ಥೆ ಜಾರಿಗೆ ಬರಲಿದೆ. ಇದಕ್ಕಾಗಿ ಅತ್ಯಾಧುನಿಕ ತಂತ್ರಜ್ಞಾನದ ನೆರವನ್ನು ಪಡೆಯಲಾಗುತ್ತದೆ. ವಾಹನ ಬಳಕೆ ಹಾಗೂ ಚಾಲನಾ ಇತಿಹಾಸದ ಆಧಾರದಲ್ಲಿ ಅವರಿಂದ ಡ್ಯಾಮೇಜ್ ವಿಮೆ ಪಡೆಯಲು ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (ಐಆರ್ಡಿಎ) ವಿಮಾ ಕಂಪನಿಗಳಿಗೆ ಅವಕಾಶ ಕಲ್ಪಿಸಿದೆ. ಇದರೊಂದಿಗೆ ವ್ಯಕ್ತಿಗಳು, ಅಂದರೆ ವಾಹನ ಮಾಲಿಕರು ತಮ್ಮ ಪ್ರತಿಯೊಂದು ವಾಹನಕ್ಕೆ ಪ್ರತ್ಯೇಕವಾಗಿ ವಿಮೆ ಪಡೆಯುವ ಬದಲು ವಿವಿಧ ವಾಹನಗಳು, ಅಂದರೆ ಬೈಕ್ ಮತ್ತು ಕಾರುಗಳಿಗೆ ಫ್ಲೋಟರ್ ಪಾಲಿಸಿಗಳನ್ನು ಪಡೆಯಲು ಇದರಿಂದ ಸಾಧ್ಯವಾಗಲಿದೆ. ಈ ಸಂಬಂಧ ಪ್ರಾಧಿಕಾರ ಗುರುವಾರ ಅಧಿಸೂಚನೆ ಹೊರಡಿಸಿದೆ.
