ತಿಂಗಳಿಗೆ ಎಷ್ಟು ಲೀಟರ್ ಎಣ್ಣೆ ಸೇವನೆ ಸುರಕ್ಷಿತ? ಅಡುಗೆಮನೆಯ ಈ ಸೂತ್ರ ತಿಳಿಯದಿದ್ದರೆ ಹೃದಯಕ್ಕೆ ಕಂಟಕ! Cooking Oil Limit

ಸಾಮಾನ್ಯವಾಗಿ ನಾಲ್ಕರಿಂದ ಐದು ಜನರಿರುವ ಭಾರತೀಯ ಕುಟುಂಬವೊಂದು ತಿಂಗಳಿಗೆ ಸುಮಾರು 5 ರಿಂದ 10 ಲೀಟರ್‌ವರೆಗೂ ಎಣ್ಣೆಯನ್ನು ಬಳಸುತ್ತದೆ. ಆದರೆ ವೈದ್ಯಕೀಯ ಹಾಗೂ ಹೃದ್ರೋಗ ತಜ್ಞರ ಪ್ರಕಾರ, ಈ ಅಭ್ಯಾಸವು ದೇಹಕ್ಕೆ ಗಂಭೀರ ಹಾನಿಯನ್ನು ಉಂಟುಮಾಡುತ್ತದೆ.

ಮಾಹಿತಿಯ ಪ್ರಕಾರ, ಆರೋಗ್ಯವಂತ ವಯಸ್ಕರು ದಿನಕ್ಕೆ 15 ರಿಂದ 20 ಮಿಲಿಲೀಟರ್‌ಗಳಿಗಿಂತ (3-4 ಟೀ ಚಮಚ) ಹೆಚ್ಚು ಎಣ್ಣೆ ಸೇವಿಸುವುದು ಆರೋಗ್ಯಕ್ಕೆ ಒಳ್ಳೆಯದಲ್ಲ ಎಂದು ಹೇಳುತ್ತಾರೆ.

ಈ ಸೂತ್ರದ ಪ್ರಕಾರ, ನಿಮ್ಮ ಮನೆಯಲ್ಲಿ ನಾಲ್ಕು ಜನರಿರುವ ಕುಟುಂಬವಿದ್ದರೆ, ತಿಂಗಳಿಗೆ ಒಟ್ಟು 2 ರಿಂದ 2.5 ಲೀಟರ್‌ಗಿಂತ ಹೆಚ್ಚು ಎಣ್ಣೆಯನ್ನು ಸೇವಿಸಬಾರದು. ಆದರೆ, ಹೆಚ್ಚಿನ ಭಾರತೀಯ ಮನೆಗಳಲ್ಲಿ 4 ಜನರ ಕುಟುಂಬಕ್ಕೆ ತಿಂಗಳಿಗೆ 5 ರಿಂದ 8 ಲೀಟರ್‌ಗೂ ಹೆಚ್ಚು ಎಣ್ಣೆ ಬಳಕೆಯಾಗುತ್ತಿದ್ದು, ಇದು ಅತ್ಯಂತ ಅಪಾಯಕಾರಿ ಅಭ್ಯಾಸವಾಗಿದೆ.

ಈಗಾಗಲೇ ಹೃದಯ ಕಾಯಿಲೆ, ಅಧಿಕ ರಕ್ತದೊತ್ತಡ ಅಥವಾ ಕೊಲೆಸ್ಟ್ರಾಲ್ ಸಮಸ್ಯೆಗಳಿಂದ ಬಳಲುತ್ತಿರರುವವರಿಗೆ ಈ ನಿಯಮವು ಇನ್ನಷ್ಟು ಕಠಿಣವಾಗಲಿದೆ. ಆದಾಗ್ಯೂ, ಈ ಸಮಸ್ಯೆ ಹೊಂದಿರುವವರು ತಿಂಗಳು ಪೂರ್ತಿ 750 ಮಿ ಲೀಟರ್​ಗಿಂತ ಹೆಚ್ಚು ಎಣ್ಣೆ ಸೇವಿಸುವುದು ಅಪಾಯಕಾರಿ ಎಂದು ಹೇಳಲಾಗುತ್ತದೆ.

ಮಾರುಕಟ್ಟೆಯಲ್ಲಿ ಸಾಸಿವೆ, ಸೂರ್ಯಕಾಂತಿ, ಸೋಯಾಬೀನ್, ಎಳ್ಳು, ತೆಂಗಿನಕಾಯಿ ಮತ್ತು ಆಲಿವ್ ಎಣ್ಣೆಯಂತಹ ವಿಧ ವಿಧವಾದ ಆಯ್ಕೆಗಳನ್ನು ನೋಡಬಹುದು. ಹೃದ್ರೋಗ ತಜ್ಞರ ಪ್ರಕಾರ, ಭಾರತೀಯ ಶೈಲಿಯ ತೀಕ್ಷ್ಣವಾದ ಒಗ್ಗರಣೆ ಮತ್ತು ಹೆಚ್ಚಿನ ತಾಪಮಾನದ ಅಡುಗೆಗೆ ಮರದಿಂದ ತಡಿದ ಗಾಣದ ಸಾಸಿವೆ ಎಣ್ಣೆ ಅತ್ಯಂತ ಸೂಕ್ತ ಮತ್ತು ಸುರಕ್ಷಿತ ಎಂದು ಹೇಳಲಾಗುತ್ತದೆ.

ಸಾಸಿವೆ ಎಣ್ಣೆ: ಇದರ ಹೊಗೆ ಬಿಂದು ತುಂಬಾ ಹೆಚ್ಚಿರುವುದರಿಂದ, ಅತಿಯಾಗಿ ಬಿಸಿ ಮಾಡಿದಾಗಲೂ ಅದರ ಗುಣಲಕ್ಷಣಗಳು ಉಳಿಯುತ್ತವೆ ಮತ್ತು ಯಾವುದೇ ಹಾನಿಕಾರಕ ರಾಸಾಯನಿಕಗಳು ಉತ್ಪತ್ತಿಯಾಗುವುದಿಲ್ಲ.

ಆಲಿವ್ ಎಣ್ಣೆ: ಆಲಿವ್ ಎಣ್ಣೆ ಆರೋಗ್ಯಕ್ಕೆ ಒಳ್ಳೆಯದಾದರೂ, ಇದು ಸಲಾಡ್ ಡ್ರೆಸ್ಸಿಂಗ್ ಅಥವಾ ಕಡಿಮೆ ಶಾಖದ ಅಡುಗೆಗೆ ಮಾತ್ರ ಸೂಕ್ತವಾಗಿದೆ. ಇದು ಡೀಪ್ ಫ್ರೈ ಅಥವಾ ಸ್ಟಿರ್-ಫ್ರೈಯಿಂಗ್‌ಗೆ ಸಂಪೂರ್ಣವಾಗಿ ಸೂಕ್ತವಲ್ಲ.

ಸಂಸ್ಕರಿಸಿದ ಎಣ್ಣೆಯ ಅಪಾಯಗಳು: ಅತಿಯಾದ ಶಾಖ ಮತ್ತು ರಾಸಾಯನಿಕ ಸಂಸ್ಕರಣೆಯ ಮೂಲಕ ತಯಾರಿಸಿದ ಸಂಸ್ಕರಿಸಿದ ಎಣ್ಣೆಯ ದೀರ್ಘಕಾಲೀನ ಬಳಕೆಯಿಂದ ದೇಹದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್​​ನ್ನು ಹೆಚ್ಚಿಸುತ್ತದೆ. ಜೊತೆಗೆ ಅಪಧಮನಿಗಳಲ್ಲಿ ಅಡಚಣೆಗೆ ಕಾರಣವಾಗಿದೆ.

ನಾವು ಪ್ರತಿನಿತ್ಯ ಸೇವಿಸುವ ಆಹಾರದಲ್ಲಿ ಹೆಚ್ಚುವರಿ ತುಪ್ಪ- ಎಣ್ಣೆ ಅಥವಾ ಕರಿದ ಆಹಾರವಿದ್ದರೆ ದೇಹದಲ್ಲಿ ಕೊಬ್ಬು ಸಂಗ್ರಹವಾಗಲು ಪ್ರಾರಂಭಿಸುತ್ತದೆ. ಇದರ ಪರಿಣಾಮವಾಗಿ ಬೊಜ್ಜು, ಮಧುಮೇಹ, ಅಧಿಕ ರಕ್ತದೊತ್ತಡ, ಚಯಾಪಚಯ ಅಸ್ವಸ್ಥತೆಗಳು ಮತ್ತು ನಂತರ ಹೃದಯಾಘಾತದಂತಹ ಸಮಸ್ಯೆಗಳು ಹೆಚ್ಚಾಗಲು ಪ್ರಾರಂಭಿಸುತ್ತದೆ. ಆರೋಗ್ಯ ಮತ್ತು ರುಚಿಯ ಸರಿಯಾದ ಸಮತೋಲನವನ್ನು ಕಾಪಾಡಿಕೊಳ್ಳಲು, ಅಡುಗೆಯಲ್ಲಿ 80 ಪ್ರತಿಶತ ಸಾಸಿವೆ ಎಣ್ಣೆ ಮತ್ತು 20 ಪ್ರತಿಶತ ತುಪ್ಪ ಅಥವಾ ಬೆಣ್ಣೆಯನ್ನು ಬಹಳ ಸೀಮಿತ ಪ್ರಮಾಣದಲ್ಲಿ ಬಳಸಲು ತಜ್ಞರು ಶಿಫಾರಸು ಮಾಡುತ್ತಾರೆ (ಏಜೆನ್ಸೀಸ್).