ಹಸಿ ಚಿಕನ್​ ಅನ್ನು ಫ್ರಿಡ್ಜ್‌ನಲ್ಲಿ ಎಷ್ಟು ದಿನಗಳವರೆಗೆ ಇಡಬಹುದು? ಇಲ್ಲಿದೆ ಉಪಯುಕ್ತ ಮಾಹಿತಿ...! Uncooked Chicken

Uncooked Chicken : ಭಾನುವಾರದ ರಜೆ ಬಂತೆಂದರೆ ಸಾಕು ಮಾಂಸಾಹಾರಿಗಳ ಮನೆಯಲ್ಲಿ ಚಿಕನ್ ಘಮಘಮಿಸಲೇಬೇಕು. ಚಿಕನ್ ಬಿರಿಯಾನಿ, ಕಬಾಬ್, ಗ್ರೇವಿ, ಫ್ರೈ ಹೀಗೆ ಬಗೆಬಗೆಯ ಖಾದ್ಯಗಳನ್ನು ಸವಿಯಲು ಹೆಚ್ಚಿನವರು ಇಷ್ಟಪಡುತ್ತಾರೆ. ಇತ್ತೀಚಿನ ದಿನಗಳಲ್ಲಿ ಸಮಯ ಉಳಿಸಲು ಹಾಗೂ ಆಫರ್‌ಗಳ ಲಾಭ ಪಡೆಯಲು ಅನೇಕರು ಒಟ್ಟಿಗೆ ಹೆಚ್ಚಿನ ಪ್ರಮಾಣದಲ್ಲಿ ಚಿಕನ್ ಖರೀದಿಸಿ ತಂದು ಫ್ರಿಡ್ಜ್‌ನಲ್ಲಿ ಸಂಗ್ರಹಿಸಿಡುತ್ತಾರೆ. ಆದರೆ, ಹಸಿ ಚಿಕನ್ ಅನ್ನು ಎಷ್ಟು ದಿನಗಳ ಕಾಲ ಸುರಕ್ಷಿತವಾಗಿ ಇಡಬಹುದು ಮತ್ತು ಅದನ್ನು ಹೇಗೆ ಬಳಸಬೇಕು ಎಂಬ ಬಗ್ಗೆ ಬಹುತೇಕರಲ್ಲಿ ಸ್ಪಷ್ಟತೆ ಇರುವುದಿಲ್ಲ. ಸರಿಯಾದ ಜ್ಞಾನವಿಲ್ಲದೆ ಸಂಗ್ರಹಿಸಿಟ್ಟರೆ, ಅದರಲ್ಲಿ ಬ್ಯಾಕ್ಟೀರಿಯಾಗಳು ಬೆಳೆದು ಆಹಾರ ವಿಷಪೂರಿತವಾಗುವ ಅಪಾಯವಿರುತ್ತದೆ.

ಸಾಮಾನ್ಯವಾಗಿ ಹಸಿ ಚಿಕನ್ ಅನ್ನು ರೆಫ್ರಿಜರೇಟರ್‌ನ ಸಾಧಾರಣ ಚಿಲ್ಲರ್ ವಿಭಾಗದಲ್ಲಿ (ಅಂದರೆ ಸುಮಾರು 4°C ಅಥವಾ ಅದಕ್ಕಿಂತ ಕಡಿಮೆ ತಾಪಮಾನದಲ್ಲಿ) ಕೇವಲ 1 ರಿಂದ 2 ದಿನಗಳವರೆಗೆ ಮಾತ್ರ ಸುರಕ್ಷಿತವಾಗಿ ಇಡಬಹುದು. ಅದಕ್ಕಿಂತ ಹೆಚ್ಚಿನ ದಿನಗಳ ಕಾಲ ಇಡಲು ಯೋಜಿಸಿದ್ದರೆ, ಖರೀದಿಸಿದ ತಕ್ಷಣವೇ ಅದನ್ನು ಫ್ರೀಜರ್‌ಗೆ ವರ್ಗಾಯಿಸುವುದು ಉತ್ತಮ. ಫ್ರೀಜರ್‌ನಲ್ಲಿ ಅಂದರೆ –18°C ಅಥವಾ ಅದಕ್ಕಿಂತ ಕಡಿಮೆ ತಾಪಮಾನದಲ್ಲಿ ಚಿಕನ್ ಅನ್ನು ತಿಂಗಳುಗಟ್ಟಲೆ ಸಂಗ್ರಹಿಸಿಡಬಹುದು. ಇಡೀ ಕೋಳಿ ಮಾಂಸವನ್ನು ಸುಮಾರು ಒಂದು ವರ್ಷದವರೆಗೆ ಫ್ರೀಜರ್‌ನಲ್ಲಿ ಉತ್ತಮ ಸ್ಥಿತಿಯಲ್ಲಿರುತ್ತದೆ. ಇನ್ನು ಕತ್ತರಿಸಿದ ಚಿಕನ್ ತುಂಡುಗಳನ್ನು ಒಂಬತ್ತು ತಿಂಗಳವರೆಗೆ ಹಾಗೂ ಮಸಾಲೆಯುಕ್ತ ಚಿಕನ್ ಅನ್ನು ಮೂರರಿಂದ ನಾಲ್ಕು ತಿಂಗಳವರೆಗೆ ಇಡಬಹುದು.

ಚಿಕನ್ ಸಂಗ್ರಹಿಸುವಾಗ ಅದನ್ನು ಗಾಳಿಯಾಡದ ಆಹಾರ ದರ್ಜೆಯ ಕಂಟೇನರ್ ಅಥವಾ ಫ್ರೀಜರ್ ಬ್ಯಾಗ್‌ನಲ್ಲಿ ಇಡುವುದು ಅತ್ಯಗತ್ಯ. ಪ್ಯಾಕೇಜ್‌ನ ಮೇಲೆ ಖರೀದಿಸಿದ ದಿನಾಂಕ ಮತ್ತು ಸಂಗ್ರಹಿಸಿದ ದಿನಾಂಕವನ್ನು ಬರೆದಿಡುವುದು ಉತ್ತಮ ಅಭ್ಯಾಸವಾಗಿದೆ. ಪ್ರಮುಖವಾಗಿ, ಚಿಕನ್‌ನಿಂದ ಹೊರಬರುವ ರಸವು ಫ್ರಿಡ್ಜ್‌ನಲ್ಲಿರುವ ಇತರ ಆಹಾರಗಳ ಮೇಲೆ ತೊಟ್ಟಿಕ್ಕದಂತೆ ತಡೆಯಲು, ಅದನ್ನು ಯಾವಾಗಲೂ ರೆಫ್ರಿಜರೇಟರ್‌ನ ಅತ್ಯಂತ ಕೆಳಗಿನ ಕಪಾಟಿನಲ್ಲಿ ಇಡಬೇಕು. ಇಲ್ಲದಿದ್ದರೆ ಆ ರಸದ ಮೂಲಕ ಬ್ಯಾಕ್ಟೀರಿಯಾಗಳು ಇತರ ಆಹಾರ ಪದಾರ್ಥಗಳಿಗೆ ಹರಡುವ ದೊಡ್ಡ ಅಪಾಯವಿರುತ್ತದೆ.

ಫ್ರೀಜರ್‌ನಿಂದ ತೆಗೆದ ತಣ್ಣನೆಯ ಚಿಕನ್ ಅನ್ನು ಕರಗಿಸಲು ಕಿಚನ್ ಕೌಂಟರ್ ಮೇಲೆ ಗಂಟೆಗಳ ಕಾಲ ಹಾಗೆಯೇ ಇಡಬೇಡಿ. ಚಿಕನ್ ಕರಗಿಸಲು ಅತ್ಯಂತ ಸುರಕ್ಷಿತ ಮಾರ್ಗವೆಂದರೆ, ಅದನ್ನು ಮುಂಚಿತವಾಗಿ ಫ್ರೀಜರ್‌ನಿಂದ ತೆಗೆದು ರೆಫ್ರಿಜರೇಟರ್ ಒಳಗೆ ಇಡುವುದು ಅಥವಾ ಸೀಲ್ ಮಾಡಿದ ಪ್ಯಾಕೇಜ್ ಅನ್ನು ತಣ್ಣೀರಿನಲ್ಲಿ ಮುಳುಗಿಸಿಡುವುದು. ಇದರೊಂದಿಗೆ ಮೈಕ್ರೋವೇವ್‌ನ ಡಿಫ್ರಾಸ್ಟ್ ಮೋಡ್ ಅನ್ನು ಸಹ ಬಳಸಬಹುದು. ಆದರೆ, ಒಮ್ಮೆ ಹೀಗೆ ಕರಗಿಸಿದ (Defrosted) ಚಿಕನ್ ಅನ್ನು ಯಾವುದೇ ಕಾರಣಕ್ಕೂ ಮರಳಿ ಫ್ರೀಜರ್‌ಗೆ ಇಡಬಾರದು ಎಂಬುದನ್ನು ನೆನಪಿನಲ್ಲಿಡಿ.

ನೀವು ಖರೀದಿಸಿದ ಅಥವಾ ಸಂಗ್ರಹಿಸಿಟ್ಟ ಚಿಕನ್‌ನಲ್ಲಿ ಅಸಾಮಾನ್ಯ ವಾಸನೆ, ಜಿಗುಟುತನ ಅಥವಾ ಬಣ್ಣ ಬದಲಾವಣೆ ಕಂಡುಬಂದರೆ ಅದನ್ನು ತಕ್ಷಣವೇ ಎಸೆಯಿರಿ, ಬಳಸಬೇಡಿ. ಇದರೊಂದಿಗೆ, ಚಿಕನ್ ಬೇಯಿಸುವಾಗ ಅದರ ಒಳಗಿನ ಭಾಗವೂ ಚೆನ್ನಾಗಿ ಬೇಯುವಂತೆ ನೋಡಿಕೊಳ್ಳುವುದು ಅತ್ಯಂತ ಮುಖ್ಯವಾಗಿದೆ. ಚಿಕನ್ ಅನ್ನು ಸರಿಯಾದ ತಾಪಮಾನದಲ್ಲಿ ಸಂಗ್ರಹಿಸಿ, ಸ್ವಚ್ಛತೆಯಿಂದ ನಿರ್ವಹಿಸಿದಾಗ ಮಾತ್ರ ಅದು ಆರೋಗ್ಯಕ್ಕೆ ಸುರಕ್ಷಿತವಾಗಿರುತ್ತದೆ.

ಹೀಗಾಗಿ, ಒಟ್ಟಿಗೆ ಹೆಚ್ಚಿನ ಪ್ರಮಾಣದಲ್ಲಿ ಚಿಕನ್ ಖರೀದಿಸುವಾಗ ಅದನ್ನು ತಕ್ಷಣವೇ ಸಣ್ಣ ಸಣ್ಣ ಪ್ಯಾಕೆಟ್‌ಗಳಾಗಿ ಮಾಡಿ ಫ್ರೀಜರ್‌ನಲ್ಲಿಡುವುದು ಜಾಣತನದ ಕ್ರಮವಾಗಿದೆ. ಹೀಗೆ ಮಾಡುವುದರಿಂದ ನಮಗೆ ಬೇಕಾದಾಗ ಕೇವಲ ಒಂದು ಪ್ಯಾಕೆಟ್ ಅನ್ನು ಮಾತ್ರ ಹೊರಗೆ ತೆಗೆದು ಸುಲಭವಾಗಿ ಬಳಸಿಕೊಳ್ಳಬಹುದು ಹಾಗೂ ಇಡೀ ಚಿಕನ್ ಹಾಳಾಗುವುದನ್ನು ತಡೆಯಬಹುದು, (ಏಜೆನ್ಸಿಸ್​).