ಸಿಕಲ್ ಸೆಲ್ ಅನೀಮಿಯಾದಿಂದ ಉಂಟಾಗುವ ದೀರ್ಘಕಾಲದ ನೋವು, ಆಯಾಸಕ್ಕೆ ಬ್ರೇಕ್​; ಇಲ್ಲಿದೆ ಸಿಂಪಲ್​ ಟಿಪ್ಸ್

ನೋವು ನಿವಾರಣೆ ಮತ್ತು ಅಂಗಾಂಶಗಳ ದುರಸ್ತಿ ಆಗಬೇಕೆಂದರೆ ದೇಹದಲ್ಲಿ ಯಾವುದೇ ಅಡೆತಡೆಯಿಲ್ಲದೆ ರಕ್ತ ಪರಿಚಲನೆಯಾಗುವುದು ಅಗತ್ಯವಾಗಿದೆ. ದೇಹದಾದ್ಯಂತ ನಿರಂತರ ರಕ್ತ ಪರಿಚಲನೆಯಿಂದಾಗಿ ಮೂಳೆಗಳು, ಕೀಲುಗಳು, ಸ್ನಾಯುಗಳು ಮತ್ತು ಸ್ನಾಯುರಜ್ಜುಗಳ (tendons) ಆರೋಗ್ಯಕ್ಕೆ ಅಗತ್ಯವಾದ ಪೋಷಕಾಂಶಗಳು ಮತ್ತು ಆಮ್ಲಜನಕ ಒದಗುತ್ತದೆ. ನೋವು ಮುಕ್ತವಾಗಿರಲು ಮತ್ತು ದಿನನಿತ್ಯದ ಚಟುವಟಿಕೆಗಳನ್ನು ಸರಾಗವಾಗಿ ಮಾಡಲು ನಿರಂತರ ರಕ್ತ ಪರಿಚಲನೆಯು ಸಹಾಯ ಮಾಡುತ್ತದೆ.

ಆದರೆ, 'ಸಿಕಲ್ ಸೆಲ್' ಎಂಬ ಆನುವಂಶಿಕ ಕಾಯಿಲೆಯಿಂದ ಬಳಲುತ್ತಿರುವವರಲ್ಲಿ, ಕೆಂಪು ರಕ್ತಕಣಗಳು (RBCs) ಅರ್ಧಚಂದ್ರಾಕಾರ ಅಥವಾ ಕುಡುಗೋಲಿನ ಆಕಾರಕ್ಕೆ ಬದಲಾಗುತ್ತವೆ. ಹಾಗಾಗಿ ಇದನ್ನು ಕುಡಗೋಲು ಕಣ ರಕ್ತಹೀನತೆ ಅಥವಾ ಕುಡಗೋಲು ಕಣ ರೋಗ ಎಂದೂ ಕರೆಯುತ್ತಾರೆ. ಇದರಿಂದಾಗಿ ಕೆಂಪು ರಕ್ತಕಣಗಳು, ರಕ್ತನಾಳಗಳ ಮೂಲಕ ಸ್ನಾಯುಗಳು, ಮೂಳೆಗಳು ಮತ್ತು ಕೀಲುಗಳಿಗೆ ಸರಾಗವಾಗಿ ಚಲಿಸಲು ಕಷ್ಟವಾಗುತ್ತದೆ. ರಕ್ತ ಪರಿಚಲನೆ ಮತ್ತು ಪೋಷಕಾಂಶಗಳ ಪೂರೈಕೆಯಲ್ಲಿನ ಅಡಚಣೆಯಾದಾಗ ತೀವ್ರ ನೋವು ಉಂಟಾಗುತ್ತದೆ. ಮತ್ತಿದು ದೇಹದ ಭಾಗಗಳ ಕಾರ್ಯಕ್ಷಮತೆಯನ್ನು ಕಡಿಮೆ ಮಾಡುತ್ತದೆ.

ಭಾರತದಲ್ಲಿ ಸಿಕಲ್ ಸೆಲ್ ಕಾಯಿಲೆಯಿಂದ ಬಳಲುತ್ತಿರುವವರ ಸಂಖ್ಯೆ ದೊಡ್ಡದಾಗಿದೆ. ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವಾಲಯದ ಅಡಿಯಲ್ಲಿರುವ CSIR (ವೈಜ್ಞಾನಿಕ ಮತ್ತು ಕೈಗಾರಿಕಾ ಸಂಶೋಧನಾ ಮಂಡಳಿ) ಪ್ರಕಾರ, 2023 ರಲ್ಲಿ, ಜಾಗತಿಕವಾಗಿ ಸಿಕಲ್ ಸೆಲ್‌ನೊಂದಿಗೆ ಜನಿಸಿದ ಮಕ್ಕಳಲ್ಲಿ ಶೇಕಡಾ 14.5 ರಷ್ಟು ಭಾರತದ್ದಾಗಿದ್ದು, ಆ ವರ್ಷ 42,000 ಕ್ಕೂ ಹೆಚ್ಚು ನವಜಾತ ಶಿಶುಗಳು ಬಾಧಿತವಾಗಿದ್ದವು. ಇಂತಹ ಪರಿಸ್ಥಿತಿಯಲ್ಲಿ, ಇದರಿಂದ ಬರುವ ದೀರ್ಘಕಾಲದ ನೋವು ಮತ್ತು ಆಯಾಸವನ್ನು ನಿರ್ವಹಿಸುವುದು ಅತ್ಯಂತ ಅಗತ್ಯವಾಗಿದೆ.

ಫಿಸಿಯೋಥೆರಪಿ ಮೂಲಕ ನೋವಿನ ನಿರ್ವಹಣೆ ಸ್ನಾಯುಗಳ ಬಲವನ್ನು ಹೆಚ್ಚಿಸುತ್ತದೆ ಮತ್ತು ಕೀಲುಗಳ ಬಿಗಿತವನ್ನು ಕಡಿಮೆ ಮಾಡುತ್ತದೆ ಸಿಕಲ್ ಸೆಲ್ ಅನಿಮಿಯಾ ಇರುವವರಿಗೆ ಫಿಸಿಯೋಥೆರಪಿ ತುಂಬಾ ಪ್ರಯೋಜನಕಾರಿ. ಏಕೆಂದರೆ ಇದು ಸ್ನಾಯುಗಳ ಶಕ್ತಿ ಕುಂದದಂತೆ ತಡೆಯುತ್ತದೆ. ಇದು ದೇಹದ ಮೆಟಬಾಲಿಸಂ ಹೆಚ್ಚಿಸುವ ಮೂಲಕ ಸ್ನಾಯುಗಳ ಆರೋಗ್ಯವನ್ನು ಸುಧಾರಿಸುತ್ತದೆ ಮತ್ತು ದಿನನಿತ್ಯದ ಕೆಲಸಗಳನ್ನು ಸುಲಭವಾಗಿಸಲು ಸಹಾಯ ಮಾಡುತ್ತದೆ.

ಕೀಲುಗಳ ಬಿಗಿತ ಕಡಿಮೆಯಾಗಿ, ಅವುಗಳ ಚಲನೆಯ ಸಾಮರ್ಥ್ಯ (range of motion) ಹೆಚ್ಚಾದಾಗ ಗಾಯಗಳಾಗುವ ಅಪಾಯ ಕಡಿಮೆಯಾಗುತ್ತದೆ ಮತ್ತು ದೈನಂದಿನ ಚಟುವಟಿಕೆಗಳನ್ನು ಸ್ವತಂತ್ರವಾಗಿ ಮಾಡಲು ಸಾಧ್ಯವಾಗುತ್ತದೆ. ಫಿಸಿಯೋಥೆರಪಿಸ್ಟ್‌ಗಳು ಮಾಡುವ ಮಸಾಜ್ ಥೆರಪಿಯಿಂದ ನೋವು ಕಡಿಮೆಯಾಗುವುದಲ್ಲದೆ ಆತಂಕ ಮತ್ತು ಖಿನ್ನತೆ ಸಹ ಕಡಿಮೆಯಾಗುತ್ತದೆ.

ದೈಹಿಕ ಚಿಕಿತ್ಸೆಯಂತೆ, ಸಿಕಲ್ ಸೆಲ್ ಸಮಸ್ಯೆ ಇರುವವರು ಆಕ್ವಾ ಥೆರಪಿಯನ್ನು (ನೀರಿನಲ್ಲಿ ಮಾಡುವ ಚಿಕಿತ್ಸೆ) ಸಹ ಆಯ್ಕೆ ಮಾಡಿಕೊಳ್ಳಬಹುದು. ನೀರಿನ ಆಧಾರಿತ ಫಿಸಿಯೋಥೆರಪಿ ಸೆಷನ್‌ಗಳು ಸ್ನಾಯು ಮತ್ತು ಮೂಳೆಗಳ ನೋವನ್ನು ಕಡಿಮೆ ಮಾಡಲು ಹೆಚ್ಚು ಪ್ರಯೋಜನಕಾರಿ ಎಂದು ಹಿಂದಿನ ಅನೇಕ ಸಂಶೋಧನೆಗಳು ದೃಢಪಡಿಸಿವೆ.

2020 ರ 'ಜರ್ನಲ್ ಆಫ್ ಪೀಡಿಯಾಟ್ರಿಕ್ ಹೆಮಟಾಲಜಿ/ಆಂಕಾಲಜಿ'ಯಲ್ಲಿ ಪ್ರಕಟವಾದ ಅಧ್ಯಯನದ ಪ್ರಕಾರ, ಸಮೀಕ್ಷೆಯಲ್ಲಿ ಭಾಗವಹಿಸಿದ ಹೆಚ್ಚಿನ ಆರೋಗ್ಯ ತಜ್ಞರು ಸಿಕಲ್ ಸೆಲ್ ಕಾಯಿಲೆ ಇರುವವರನ್ನು ಫಿಸಿಯೋಥೆರಪಿ ಸೆಷನ್‌ಗಳಿಗೆ ರೆಫರ್ ಮಾಡಲು ಸಮ್ಮತಿಸಿದ್ದಾರೆ.

ಕೀಲುಗಳ ಚಲನೆ ಸುಲಭವಾದಾಗ ನಡಿಗೆ ಮತ್ತು ಲಘು ಜಾಗಿಂಗ್‌ನಂತಹ ಚಟುವಟಿಕೆಗಳನ್ನು ಮಾಡುವುದು ಸುಲಭವಾಗುತ್ತದೆ. ಇದು ಹೃದಯ ಮತ್ತು ಶ್ವಾಸಕೋಶದ ಆರೋಗ್ಯವನ್ನು ಸುಧಾರಿಸುತ್ತದೆ. ಫಿಸಿಯೋಥೆರಪಿ ಕಾರ್ಯಕ್ರಮದ ಭಾಗವಾಗಿ ರೂಪಿಸಲಾದ ಕಸ್ಟಮೈಸ್ಡ್ ವ್ಯಾಯಾಮಗಳು ದೇಹದಲ್ಲಿ ರಕ್ತ ಪರಿಚಲನೆ ಮತ್ತು ಆಮ್ಲಜನಕದ ಮಟ್ಟವನ್ನು ಸುಧಾರಿಸುತ್ತವೆ. ಇದು ಸಂತೋಷ ನೀಡುವ 'ಸೆರೊಟೋನಿನ್' ಮತ್ತು ಮೂಡ್ ಚೆನ್ನಾಗಿಡುವ 'ಆಕ್ಸಿಟೋಸಿನ್' ಹಾರ್ಮೋನ್‌ಗಳನ್ನು ಹೆಚ್ಚಿಸುತ್ತದೆ. ಇದರಿಂದ ಆಯಾಸದ ಮಟ್ಟ ಅದಾಗಿಯೇ ಕಡಿಮೆಯಾಗುತ್ತದೆ.

ಸಿಕಲ್ ಸೆಲ್ ಕಾಯಿಲೆ ಇರುವ ಮಕ್ಕಳಲ್ಲಿ ದೀರ್ಘಕಾಲದ ನೋವು ಮತ್ತು ಆಯಾಸವು ದೈಹಿಕ ತೊಂದರೆಗಳನ್ನು ಉಂಟುಮಾಡುವುದಲ್ಲದೆ, ತೀವ್ರ ಮಾನಸಿಕ ಒತ್ತಡಕ್ಕೂ ಕಾರಣವಾಗುತ್ತದೆ. ದಿನಗಳು ಕಳೆದಂತೆ, ಈ ಒತ್ತಡ ಮತ್ತು ಆತಂಕವು ಅವರ ಒಟ್ಟಾರೆ ಬೆಳವಣಿಗೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ದೈಹಿಕ ನಮ್ಯತೆ (ಫ್ಲೆಕ್ಸಿಬಿಲಿಟಿ) ಮತ್ತು ಚಲನೆ ಸುಧಾರಿಸಿದಾಗ, ಮಕ್ಕಳು ಪಠ್ಯೇತರ ಚಟುವಟಿಕೆಗಳಲ್ಲಿ ಭಾಗವಹಿಸಲು ಸಾಧ್ಯವಾಗುತ್ತದೆ. ಇದು ಅವರ ಒಟ್ಟಾರೆ ದೈಹಿಕ ಮತ್ತು ಮಾನಸಿಕ ಬೆಳವಣಿಗೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

ಪೋಷಕರು ಫಿಸಿಯೋಥೆರಪಿಸ್ಟ್ ಜೊತೆ ಸೇರಿ, ಮನೆಯಲ್ಲಿಯೇ ಮಕ್ಕಳ ವ್ಯಾಯಾಮದ ದಿನಚರಿಯನ್ನು ಮೇಲ್ವಿಚಾರಣೆ ಮಾಡುವ ಮೂಲಕ ತಮ್ಮ ಆರೈಕೆಯ ಜವಾಬ್ದಾರಿಯನ್ನು ಇನ್ನಷ್ಟು ಉತ್ತಮವಾಗಿ ನಿಭಾಯಿಸಬಹುದು.

ಮೆದುಳಿಗೆ ರಕ್ತ ಪೂರೈಸುವ ರಕ್ತನಾಳಗಳಲ್ಲಿ ಹಠಾತ್ ಬ್ಲಾಕೇಜ್ ಉಂಟಾದಾಗ ಇಸ್ಕೆಮಿಕ್ ಸ್ಟ್ರೋಕ್ ಉಂಟಾಗುತ್ತದೆ. ಸಕಾಲಿಕ ವೈದ್ಯಕೀಯ ಚಿಕಿತ್ಸೆಯಿಂದ ಜೀವ ಉಳಿಸಬಹುದಾದರೂ, ಇದು ಸ್ನಾಯುಗಳ ದೌರ್ಬಲ್ಯವನ್ನು ಉಂಟುಮಾಡುತ್ತದೆ ಮತ್ತು ದೇಹದ ಸಮತೋಲನವನ್ನು ತಪ್ಪಿಸುತ್ತದೆ.

ಫಿಸಿಯೋಥೆರಪಿ ಸೆಷನ್‌ಗಳು ಮೆದುಳಿನ ನ್ಯೂರೋಪ್ಲಾಸ್ಟಿಸಿಟಿಯನ್ನು (neuroplasticity) ಸುಧಾರಿಸುತ್ತದೆ. ಇದು ಹಾನಿಗೊಳಗಾದ ಮೋಟಾರ್ ಕಾರ್ಯಕ್ಷಮತೆಯನ್ನು ಸರಿಪಡಿಸುತ್ತದೆ ಮತ್ತು ದೇಹದ ಬ್ಯಾಲೆನ್ಸ್ ಅನ್ನು ಹೆಚ್ಚಿಸುತ್ತದೆ. ಇದರ ಜೊತೆಗೆ, ಕೀಲು ಮತ್ತು ಮೂಳೆಗಳ ಆರೋಗ್ಯ ಸುಧಾರಿಸುವುದರಿಂದ ದಿನನಿತ್ಯದ ಕೆಲಸಗಳನ್ನು ಸ್ವತಂತ್ರವಾಗಿ ಮಾಡಲು ಸಹಾಯವಾಗುತ್ತದೆ.

ಯೋಗದಲ್ಲಿನ ಸಂಘಟಿತ ದೇಹದ ಚಲನೆಗಳು ನೋವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತವೆ. ದೇಹದ ಚಲನೆ ಸುಧಾರಿಸುವುದು, ಒತ್ತಡ ಮತ್ತು ಆತಂಕ ಕಡಿಮೆಯಾಗುವುದು ಮತ್ತು ಉಸಿರಾಟದ ಜಾಗೃತಿಯು ರಕ್ತದ ಹರಿವು ಹಾಗೂ ನಿದ್ರೆಯ ಗುಣಮಟ್ಟವನ್ನು ಉತ್ತಮಗೊಳಿಸುತ್ತದೆ. ಇದು ಒಟ್ಟಾರೆ ಆರೋಗ್ಯವನ್ನು ವೃದ್ಧಿಸುತ್ತದೆ.

ಸಿಕಲ್ ಸೆಲ್ ಅನಿಮಿಯಾ ಇರುವವರ ದಿನಚರಿಯಲ್ಲಿ ಆಕ್ಯುಪೇಷನಲ್ ಥೆರಪಿಯನ್ನು (Occupational therapy) ಸೇರಿಸುವುದರಿಂದ, ಅವರು ಆಯಾಸದ ಮಟ್ಟವನ್ನು ನಿರ್ವಹಿಸಲು ಮತ್ತು ದಿನನಿತ್ಯದ ಚಟುವಟಿಕೆಗಳನ್ನು ಮಾಡಲು ಶಕ್ತಿಯನ್ನು ಹೇಗೆ ಉಳಿಸಿಕೊಳ್ಳಬೇಕು (energy conservation)ಎಂದು ಹೇಳುತ್ತಾರೆ ಡಾ. ಭಾರತಿ ಜಾಜೂ.