ಮಹಿಳೆಯರಲ್ಲಿ PCOS ಮತ್ತು PCOD ಸಮಸ್ಯೆ: ಲಕ್ಷಣ, ವ್ಯತ್ಯಾಸ ಮತ್ತು ಪರಿಹಾರಗಳು ಏನು? PCOS vs PCOD

PCOS vs PCOD: ಇತ್ತೀಚಿನ ದಿನಗಳಲ್ಲಿ ಮಹಿಳೆಯರಲ್ಲಿ PCOS ಮತ್ತು PCOD ಎಂಬ ಪದಗಳು ಹೆಚ್ಚು ಕೇಳಿಬರುತ್ತಿವೆ. ಅನಿಯಮಿತ ಮುಟ್ಟಿನ ಚಕ್ರ, ತೂಕ ಹೆಚ್ಚಳ, ಮೊಡವೆ, ಮುಖದಲ್ಲಿ ಅನಗತ್ಯ ಕೂದಲು ಬೆಳೆಯುವುದು ಸೇರಿದಂತೆ ಹಲವು ಲಕ್ಷಣಗಳು ಕಾಣಿಸಿಕೊಂಡಾಗ ಕೆಲವರು ಅದನ್ನು PCOS ಅಥವಾ PCOD ಎಂದುಕೊಳ್ಳುತ್ತಾರೆ. ಆದರೆ ಈ ಎರಡೂ ಒಂದೇ ಸಮಸ್ಯೆಯೇ? ಅಥವಾ ಇವೆರಡರ ನಡುವೆ ವ್ಯತ್ಯಾಸವಿದೆಯೇ? ಮಹಿಳೆಯರು ತಿಳಿದುಕೊಳ್ಳಬೇಕಾದ ಪ್ರಮುಖ ಮಾಹಿತಿಯನ್ನು ಇಲ್ಲಿ ನೋಡೋಣ.

PCOS (Polycystic Ovary Syndrome) ಒಂದು ಹಾರ್ಮೋನ್ ಮತ್ತು ಮೆಟಾಬಾಲಿಕ್ ಸಮಸ್ಯೆಯಾಗಿದ್ದು, ಅಂಡೋತ್ಪತ್ತಿ (ovulation) ಮತ್ತು ದೇಹದ ಹಾರ್ಮೋನ್ ಸಮತೋಲನದ ಮೇಲೆ ಪರಿಣಾಮ ಬೀರಬಹುದು. ಕೆಲವು ಮಹಿಳೆಯರಲ್ಲಿ ಆಂಡ್ರೋಜನ್‌ಗಳ ಪ್ರಮಾಣ ಹೆಚ್ಚಾಗಬಹುದು. ಇದರಿಂದ ಮುಟ್ಟಿನ ಚಕ್ರ ಅನಿಯಮಿತವಾಗುವುದು, ಮೊಡವೆ, ಮುಖ ಅಥವಾ ದೇಹದಲ್ಲಿ ಹೆಚ್ಚುವರಿ ಕೂದಲು ಬೆಳೆಯುವುದು ಮುಂತಾದ ಲಕ್ಷಣಗಳು ಕಾಣಿಸಿಕೊಳ್ಳಬಹುದು. PCOS ಇರುವ ಪ್ರತಿಯೊಬ್ಬ ಮಹಿಳೆಯಲ್ಲೂ ಒಂದೇ ರೀತಿಯ ಲಕ್ಷಣಗಳು ಇರಬೇಕೆಂದಿಲ್ಲ. ಕೆಲವರಲ್ಲಿ ತೂಕ ಹೆಚ್ಚಳ ಅಥವಾ ಇನ್ಸುಲಿನ್ ಪ್ರತಿರೋಧದಂತಹ ಮೆಟಾಬಾಲಿಕ್ ಸಮಸ್ಯೆಗಳೂ ಕಂಡುಬರಬಹುದು.

PCOD (Polycystic Ovary Disease) ಎಂಬ ಪದ ಅಂಡಾಶಯಗಳಲ್ಲಿ ಹಾರ್ಮೋನ್‌ಗಳ ಅಸಮತೋಲನದಿಂದ ಅಂಡೋತ್ಪತ್ತಿ ಸರಿಯಾಗಿ ನಡೆಯದ ಪರಿಸ್ಥಿತಿಯನ್ನು ವಿವರಿಸಲು ಬಳಸಲಾಗುತ್ತದೆ. ಇದರಿಂದ ಮುಟ್ಟಿನ ದಿನಾಂಕಗಳಲ್ಲಿ ವ್ಯತ್ಯಾಸ, ತೂಕ ಹೆಚ್ಚಳ ಅಥವಾ ಮೊಡವೆ ಮುಂತಾದ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ಆದರೆ PCOD ಎಂಬ ಪದವನ್ನು ವೈದ್ಯಕೀಯ ಕ್ಷೇತ್ರದಲ್ಲಿ PCOSಗಿಂತ ವಿಭಿನ್ನವಾದ ಅಧಿಕೃತ ಸಿಂಡ್ರೋಮ್ ಎಂದು ಎಲ್ಲ ಸಂದರ್ಭಗಳಲ್ಲೂ ಪರಿಗಣಿಸಲಾಗುವುದಿಲ್ಲ. ಆದ್ದರಿಂದ ಕೇವಲ ಸ್ಕ್ಯಾನ್‌ನಲ್ಲಿ ಸಣ್ಣ ಸಣ್ಣ ಸಿಸ್ಟ್‌ಗಳು ( ಸಿಸ್ಟ್​ ಎಂದರೆ ದೇಹದ ವಿವಿಧ ಭಾಗಗಳಲ್ಲಿ ರೂಪುಗೊಳ್ಳುವ ದ್ರವ, ಗಾಳಿ ಅಥವಾ ಅರೆ-ಘನ ಪದಾರ್ಥದಿಂದ ತುಂಬಿದ ಸಣ್ಣ ಚೀಲ ಅಥವಾ ಪೊರೆಯಂತಹ ಗಡ್ಡೆ) ಕಾಣಿಸಿಕೊಂಡಿವೆ ಎಂಬ ಕಾರಣಕ್ಕೆ PCOS ಇದೆ ಎಂದು ತೀರ್ಮಾನಿಸಬಾರದು.

PCOS ಒಂದು ಹಾರ್ಮೋನ್ ಮತ್ತು ಮೆಟಾಬಾಲಿಕ್ ಸಿಂಡ್ರೋಮ್ ಆಗಿದ್ದು, ದೇಹದ ಹಲವು ವ್ಯವಸ್ಥೆಗಳ ಮೇಲೆ ಪರಿಣಾಮ ಬೀರಬಹುದು. PCOD ಎಂಬ ಪದವನ್ನು ಅಂಡೋತ್ಪತ್ತಿ ಮತ್ತು ಅಂಡಾಶಯಕ್ಕೆ ಸಂಬಂಧಿಸಿದ ಸಮಸ್ಯೆಗಳನ್ನು ವಿವರಿಸಲು ಬಳಸಲಾಗುತ್ತದೆ. ಅಂಡಾಶಯದಲ್ಲಿ ಸಿಸ್ಟ್‌ಗಳು ಕಾಣಿಸಿಕೊಳ್ಳುವುದೇ PCOS ಪತ್ತೆಗೆ ಏಕೈಕ ಮಾನದಂಡವಲ್ಲ. ವೈದ್ಯರು ಮುಟ್ಟಿನ ಚಕ್ರ, ಹಾರ್ಮೋನ್ ಮಟ್ಟ, ದೈಹಿಕ ಲಕ್ಷಣಗಳು ಮತ್ತು ಅಗತ್ಯವಿದ್ದರೆ ಅಲ್ಟ್ರಾಸೌಂಡ್ ಸೇರಿದಂತೆ ಹಲವು ಅಂಶಗಳನ್ನು ಪರಿಗಣಿಸುತ್ತಾರೆ.

PCOS ಅಥವಾ PCODಗೆ ಸಂಬಂಧಿಸಿದಂತೆ ಕೆಲವು ಮಹಿಳೆಯರಲ್ಲಿ ಮುಟ್ಟಿನ ಚಕ್ರ ಅನಿಯಮಿತವಾಗುವುದು, ಅಂಡೋತ್ಪತ್ತಿಯಲ್ಲಿ ತೊಂದರೆ, ತೂಕ ಹೆಚ್ಚಾಗುವುದು, ಮೊಡವೆ, ಚರ್ಮದಲ್ಲಿ ಎಣ್ಣೆಯಂಶ ಹೆಚ್ಚಾಗುವುದು ಅಥವಾ ಮುಖದಲ್ಲಿ ಹೆಚ್ಚುವರಿ ಕೂದಲು ಬೆಳೆಯುವುದು ಕಂಡುಬರಬಹುದು. ಆದರೆ ಈ ಲಕ್ಷಣಗಳು ಬೇರೆ ಆರೋಗ್ಯ ಸಮಸ್ಯೆಗಳಲ್ಲೂ ಕಾಣಿಸಿಕೊಳ್ಳಬಹುದು.

ಅಂಡೋತ್ಪತ್ತಿ ನಿಯಮಿತವಾಗಿ ನಡೆಯದಿದ್ದರೆ ಗರ್ಭಧಾರಣೆಗೆ ತೊಂದರೆ ಉಂಟಾಗಬಹುದು. ಆದರೆ, PCOS ಅಥವಾ PCOD ಇದ್ದರೆ ಗರ್ಭಧಾರಣೆ ಸಾಧ್ಯವಿಲ್ಲ ಎಂದರ್ಥವಲ್ಲ. ಸರಿಯಾದ ವೈದ್ಯಕೀಯ ಸಲಹೆ, ಜೀವನಶೈಲಿಯಲ್ಲಿ ಬದಲಾವಣೆ ಮತ್ತು ಅಗತ್ಯವಿದ್ದರೆ ಸೂಕ್ತ ಚಿಕಿತ್ಸೆಯ ಮೂಲಕ ಮಹಿಳೆಯರು ಯಶಸ್ವಿಯಾಗಿ ಗರ್ಭಧಾರಣೆ ಸಾಧ್ಯವಿದೆ.

ಮುಟ್ಟಿನ ಚಕ್ರ ಪದೇಪದೆ ಅನಿಯಮಿತವಾಗುತ್ತಿದ್ದರೆ, ಹಲವು ತಿಂಗಳುಗಳ ಕಾಲ ಮುಟ್ಟು ಬಾರದಿದ್ದರೆ, ಅತಿಯಾದ ಮೊಡವೆ ಅಥವಾ ಅನಗತ್ಯ ಕೂದಲು ಬೆಳವಣಿಗೆ ಕಂಡುಬಂದರೆ, ತೂಕದಲ್ಲಿ ಗಮನಾರ್ಹ ಬದಲಾವಣೆ ಕಂಡುಬಂದರೆ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.

PCOS ಅಥವಾ PCOD ಬಗ್ಗೆ ಸ್ವಯಂ ನಿರ್ಣಯ ಮಾಡಿಕೊಳ್ಳುವುದಕ್ಕಿಂತ ಸ್ತ್ರೀರೋಗ ತಜ್ಞರ ಸಲಹೆ ಪಡೆಯುವುದು ಮುಖ್ಯ. ಸಮಯಕ್ಕೆ ಸರಿಯಾಗಿ ಸಮಸ್ಯೆಯನ್ನು ಗುರುತಿಸಿ ಆಹಾರ, ವ್ಯಾಯಾಮ, ನಿದ್ರೆ ಮತ್ತು ಅಗತ್ಯ ಚಿಕಿತ್ಸೆಯ ಮೂಲಕ ನಿರ್ವಹಿಸುವುದು ಆರೋಗ್ಯಕರ ಜೀವನಕ್ಕೆ ಸಹಾಯ ಮಾಡಬಹುದು.

ಗಮನಿಸಿ: ಈ ಮಾಹಿತಿಯನ್ನು ಅಂತರ್ಜಾಲದಿಂದ ಸಂಗ್ರಹಿಸಲಾಗಿದೆ ಮತ್ತು ಮಾಹಿತಿ ಉದ್ದೇಶಗಳಿಗಾಗಿ ಮಾತ್ರ ಪ್ರಸ್ತುತ ಪಡಿಸಲಾಗಿದೆ. ಇದನ್ನು “ವಿಜಯವಾಣಿ ಡಾಟ್ ನೆಟ್” ದೃಢಪಡಿಸುವುದಿಲ್ಲ. ಯಾವುದೇ ಸಲಹೆಯನ್ನು ಅನುಸರಿಸುವ ಮೊದಲು ವೈದ್ಯರನ್ನು ಸಂಪರ್ಕಿಸುವುದು ಯಾವಾಗಲೂ ಉತ್ತಮ, (ಏಜೆನ್ಸೀಸ್​).