World Costliest Mango: 1 ಕೆಜಿ ಮಾವಿಗೆ ಬರುತ್ತೆ ಲಕ್ಸುರಿ ಬೈಕ್! ಜಗತ್ತಿನ ಅತ್ಯಂತ ಕಾಸ್ಟ್ಲಿ ಹಣ್ಣಿನ ಬಗ್ಗೆ ನಿಮಗೆಷ್ಟು ಗೊತ್ತು?

ಜಪಾನ್ ದೇಶದ ಮಿಯಾಜಾಕಿ ನಗರದಲ್ಲಿ ಮೊದಲು ಬೆಳೆಯಲಾದ ಈ ಮಾವಿನ ಹಣ್ಣನ್ನು 'ಸೂರ್ಯನ ಮೊಟ್ಟೆ' (Egg of the Sun) ಎಂದು ಕರೆಯಲಾಗುತ್ತದೆ. ಸಾಮಾನ್ಯ ಮಾವಿನ ಹಣ್ಣುಗಳು ಹಳದಿ ಅಥವಾ ಹಸಿರು ಬಣ್ಣದಲ್ಲಿದ್ದರೆ, ಮಿಯಾಜಾಕಿ ಮಾವು ದಟ್ಟವಾದ ಕೆಂಪು ಅಥವಾ ನೇರಳೆ ಬಣ್ಣದಲ್ಲಿರುತ್ತದೆ.

ಬೆಲೆ ಎಷ್ಟು?: ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಈ ಮಾವಿನ ಹಣ್ಣಿನ ಬೆಲೆ ಒಂದು ಕೆಜಿಗೆ ಸುಮಾರು 2.5 ಲಕ್ಷದಿಂದ 3 ಲಕ್ಷ ರೂಪಾಯಿಗಳವರೆಗೆ ಇರುತ್ತದೆ!

ತೂಕ ಮತ್ತು ಗಾತ್ರ: ಒಂದೊಂದು ಹಣ್ಣು ಸುಮಾರು 350 ಗ್ರಾಂನಿಂದ 900 ಗ್ರಾಂವರೆಗೆ ತೂಕವಿರುತ್ತದೆ. ಅಂದರೆ ಕೇವಲ ಎರಡು ಹಣ್ಣುಗಳು ಸೇರಿ ಒಂದು ಕೆಜಿಯಾಗಬಹುದು.

ರುಚಿ: ಇದರಲ್ಲಿ ಸಕ್ಕರೆಯ ಪ್ರಮಾಣ ಶೇ. 15ಕ್ಕಿಂತ ಹೆಚ್ಚಿರುತ್ತದೆ. ಅತಿ ಹೆಚ್ಚಿನ ಸಿಹಿ ಮತ್ತು ಯಾವುದೇ ನಾರಿನಂಶವಿಲ್ಲದ ಬೆಣ್ಣೆಯಂತಹ ತಿರುಳು ಇದರ ವಿಶೇಷ.

ಹಿಂದೆ ಕೇವಲ ಜಪಾನ್‌ಗೆ ಸೀಮಿತವಾಗಿದ್ದ ಈ ತಳಿ ಈಗ ಭಾರತದ ರೈತರ ಗಮನವನ್ನೂ ಸೆಳೆದಿದೆ. ಮಧ್ಯಪ್ರದೇಶ, ಬಿಹಾರ ಮತ್ತು ಒಡಿಶಾದ ಕೆಲವು ರೈತರು ಮಿಯಾಜಾಕಿ ಮಾವನ್ನು ಯಶಸ್ವಿಯಾಗಿ ಬೆಳೆದಿದ್ದಾರೆ. ಮಧ್ಯಪ್ರದೇಶದ ರೈತರೊಬ್ಬರು ತಮ್ಮ ತೋಟದಲ್ಲಿ ಬೆಳೆದಿರುವ ಈ ಮಾವನ್ನು ಕಳ್ಳರಿಂದ ರಕ್ಷಿಸಲು ಸಿಕುರಿಟಿ ಗಾರ್ಡ್‌ಗಳು ಮತ್ತು ನಾಯಿಗಳನ್ನು ನೇಮಿಸಿಕೊಂಡ ಸುದ್ದಿ ಈ ಹಿಂದೆ ಭಾರಿ ವೈರಲ್ ಆಗಿತ್ತು.

ಕಟ್ಟುನಿಟ್ಟಿನ ಪೋಷಣೆ: ಈ ಮಾವನ್ನು ಬೆಳೆಯುವುದು ಅಷ್ಟು ಸುಲಭವಲ್ಲ. ಪ್ರತಿ ಹಣ್ಣಿಗೂ ಪ್ರತ್ಯೇಕವಾದ ನೆಟ್ (ಜಾಲರಿ) ಕಟ್ಟಿ ಸೂರ್ಯನ ಬೆಳಕು ಎಲ್ಲಾ ಕಡೆ ಸಮಾನವಾಗಿ ಬೀಳುವಂತೆ ನೋಡಿಕೊಳ್ಳಲಾಗುತ್ತದೆ.

ಗುಣಮಟ್ಟದ ಪರೀಕ್ಷೆ: ಪ್ರತಿ ಹಣ್ಣನ್ನು ತೂಕ, ಬಣ್ಣ ಮತ್ತು ಸಕ್ಕರೆಯ ಪ್ರಮಾಣದ ಆಧಾರದ ಮೇಲೆ ಕಟ್ಟುನಿಟ್ಟಾಗಿ ಪರಿಶೀಲಿಸಿದ ನಂತರವೇ ಮಾರುಕಟ್ಟೆಗೆ ಬಿಡಲಾಗುತ್ತದೆ.

ಔಷಧೀಯ ಗುಣ: ಇದರಲ್ಲಿ ಆಂಟಿ-ಆಕ್ಸಿಡೆಂಟ್‌ಗಳು, ಬೀಟಾ-ಕ್ಯಾರೋಟಿನ್ ಮತ್ತು ಫೋಲಿಕ್ ಆಸಿಡ್ ಸಮೃದ್ಧವಾಗಿದ್ದು, ಆರೋಗ್ಯಕ್ಕೆ ಅತ್ಯಂತ ಉತ್ತಮ ಎಂದು ಪರಿಗಣಿಸಲಾಗಿದೆ.

ಸಾಮಾನ್ಯವಾಗಿ ಹರಾಜಿನ ಮೂಲಕ ಮಾರಾಟವಾಗುವ ಈ ಮಾವನ್ನು ಶ್ರೀಮಂತರು ಉಡುಗೊರೆಯಾಗಿ ನೀಡಲು ಬಳಸುತ್ತಾರೆ. ಮಾವು ಪ್ರಿಯರಿಗಂತೂ ಇದು ಕೇವಲ ಹಣ್ಣಲ್ಲ, ಒಂದು ಅದ್ಭುತ ಕನಸಾಗಿದೆ,(ಏಜೆನ್ಸೀಸ್).