ಚಿಕನ್​ ಅಥವಾ ಮಟನ್​? ಇವರೆಡರಲ್ಲಿ ಮಧುಮೇಹಿಗಳಿಗೆ ಯಾವುದು ಉತ್ತಮ? ಇಲ್ಲಿದೆ ನೋಡಿ ಉತ್ತರ

Chicken vs Mutton: ಡಯಬಿಟೀಸ್​ ಅಥವಾ ಸಕ್ಕರೆ ಕಾಯಿಲೆ ಇಂದು ಬಹುತೇಕರಲ್ಲಿ ತೀರ ಸಾಮಾನ್ಯವಾಗಿಬಿಟ್ಟಿದೆ. 40ರ ನಂತರದಲ್ಲಿ ಮಾತ್ರವಲ್ಲ, ಈಗ ಚಿಕ್ಕ ವಯಸ್ಸಿನ ಮಕ್ಕಳಲ್ಲೂ ಶುಗರ್​ ಸಮಸ್ಯೆಗಳು ಕಾಡುತ್ತಿರುವುದು ನಿಜಕ್ಕೂ ಆತಂಕಕಾರಿ. ಈ ಸಮಸ್ಯೆಯಿಂದ ದೂರವಿರಲು, ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಹೆಚ್ಚಿಸಿಕೊಳ್ಳದಂತೆ ಆಹಾರದಲ್ಲಿ ಪಥ್ಯ ಮಾಡಬೇಕು ಮತ್ತು ವ್ಯಾಯಾಮವನ್ನು ರೂಢಿಸಿಕೊಳ್ಳಬೇಕು. ಅದರಲ್ಲೂ, ಅತಿ ಮುಖ್ಯವಾಗಿ ಸೇವಿಸುವ ಆಹಾರದ ಮೇಲಂತು ಬಹಳ ಗಮನ ವಹಿಸಬೇಕು.

ಮಧುಮೇಹದಿಂದ ಬಳಲುತ್ತಿರುವವರಿಗೆ ಎಲ್ಲಾ ಆಹಾರಗಳು ಸೂಕ್ತವಲ್ಲ ಎನ್ನಲಾಗಿದೆ. ಸ್ವೀಟ್ಸ್​, ಸಕ್ಕರೆ ಅಂಶವಿರುವ ಆಹಾರಗಳಿಂದ ದೂರವಿರುವುದು ಮತ್ತು ಯಾವುದು ತಮಗೆ ಉತ್ತಮವೋ, ಅವುಗಳನ್ನು ಹೆಚ್ಚಾಗಿ ಸೇವಿಸುವುದು ಒಳಿತು. ಹಾಗೆ ನೋಡುವುದಾದರೆ, ಕೋಳಿ ಮಾಂಸ ಅಥವಾ ಮಟನ್ ಇವುಗಳ ಪೈಕಿ ಮಧುಮೇಹಿಗಳಿಗೆ ಯಾವುದು ಬೆಸ್ಟ್​ ಎಂಬುದನ್ನು ಇಲ್ಲಿ ತಿಳಿಯೋಣ ಬನ್ನಿ.

ಮಧುಮೇಹದಿಂದ ಬಳಲುತ್ತಿರುವ ಜನರು ಮಟನ್ ತಿನ್ನುವುದನ್ನು ಸಂಪೂರ್ಣವಾಗಿ ನಿಲ್ಲಿಸುವ ಅಗತ್ಯವಿಲ್ಲ. ಬದಲಿಗೆ ಮಿತವಾಗಿ ಸೇವಿಸಿದರೆ ಯಾವುದೇ ಸಮಸ್ಯೆ ಇರುವುದಿಲ್ಲ ಎಂದು ಅನೇಕ ವೈದ್ಯಕೀಯ ತಜ್ಞರು ಹೇಳ್ತಾರೆ. ವಾಸ್ತವವಾಗಿ, ಮಟನ್ ಕೆಂಪು ಮಾಂಸದ ವರ್ಗಕ್ಕೆ (ರೆಡ್​ ಮೀಟ್) ಸೇರಿದ್ದು, ಇದು ಸತು, ಕಬ್ಬಿಣ ಮತ್ತು ವಿಟಮಿನ್ ಬಿ12 ನಂತಹ ಪೋಷಕಾಂಶಗಳಿಂದ ಸಮೃದ್ಧವಾಗಿದೆ.

ಹಾಗಿದ್ದರೂ, ಮಧುಮೇಹದಿಂದ ಬಳಲುತ್ತಿರುವ ಜನರು ಆಸೆಯಿಂದ ಹೆಚ್ಚಾಗಿ ಸೇವಿಸಿದರೆ ಕೆಲವು ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ಮಟನ್‌ನಲ್ಲಿ ಕೊಬ್ಬು ಅಧಿಕವಾಗಿದೆ, ಇದು ದೇಹದಲ್ಲಿ ಇನ್ಸುಲಿನ್ ಪ್ರತಿರೋಧವನ್ನು ಹೆಚ್ಚಿಸುತ್ತದೆ ಮತ್ತು ಕೆಂಪು ಮಾಂಸದ ಅತಿಯಾದ ಸೇವನೆಯಿಂದ ಹೃದಯ ಸಮಸ್ಯೆಗಳ ಅಪಾಯವೂ ಇದೆ ಎಂದು ಹೇಳಲಾಗಿದೆ.

ಮಟನ್​ಗಿಂತ ಕೋಳಿ ಮಾಂಸ ಒಳ್ಳೆಯದು, ಆದರೆ, ಎಣ್ಣೆಯಲ್ಲಿ ಕರಿದ ಚಿಕನ್ ಮತ್ತು ಮಸಾಲೆಯುಕ್ತ ಕರಿಗಳಿಂದ ಕೂಡಿರುವ ಚಿಕನ್​ ತಿನ್ನುವುದು ತೊಂದರೆಯೇ. ಕೋಳಿ ಮಾಂಸದಲ್ಲಿ ಪ್ರೋಟೀನ್ ಅಧಿಕವಾಗಿದ್ದು, ಕೊಬ್ಬು ಕಡಿಮೆ ಇರುತ್ತದೆ. ಇದನ್ನು ತಿಂದಾಗ ರಕ್ತದಲ್ಲಿನ ಸಕ್ಕರೆ ಮಟ್ಟ ಹಠಾತ್ ಏರಿಕೆಯಾಗುವುದಿಲ್ಲ ಮತ್ತು ಹೊಟ್ಟೆ ತುಂಬಿದ ಅನುಭವ ಕಾಡುತ್ತದೆ. ವಾಸ್ತವವಾಗಿ, ಬೇಯಿಸಿದ ಕೋಳಿ ಮಾಂಸ, ಗ್ರಿಲ್ಡ್ ಕೋಳಿ ಮಾಂಸ ಅಥವಾ ಕಡಿಮೆ ಎಣ್ಣೆಯಿಂದ ಬೇಯಿಸಿದ ಚರ್ಮರಹಿತ ಕೋಳಿ ಮಾಂಸವು ಆರೋಗ್ಯಕ್ಕೆ ಒಳ್ಳೆಯದು ಎನ್ನಲಾಗಿದೆ,(ಏಜೆನ್ಸೀಸ್).

ವಿಶೇಷ ಸೂಚನೆ: ಇಲ್ಲಿರುವ ಮಾಹಿತಿ ಅಂತರ್ಜಾಲದಿಂದ ಸಂಗ್ರಹಿಸಲಾಗಿದೆ. ನಿಮಗೆ ಅನುಮಾನ ಅಥವಾ ಹೆಚ್ಚಿನ ಮಾಹಿತಿಯ ಅಗತ್ಯವಿದ್ದಲ್ಲಿ, ಒಮ್ಮೆ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.